షార్ట్‌ ఫిల్మ్‌లో బెస్ట్‌ యాక్టర్‌గా ‘సైమా’ అవార్డ్‌ అందుకున్న సూర్య భరత్‌ చంద్ర హీరోగా పరిచయమవుతోన్న చిత్రం ‘మొదటి ఆట’. ప్రియా దేశపాగ్‌ హీరోయిన్‌గా నటిస్తున్నారు. జగదీష్‌ కె.కె. దర్శకత్వంలో కిరణ్‌ కుమార్‌ రఘుపతి నిర్మిస్తున్న ఈ సినిమా మొదటి షెడ్యూల్‌ పూర్తి చేసుకుంది. జగదీశ్‌ కె.కె. మాట్లాడుతూ– ‘‘ప్రస్తుత పరిస్థితుల్లో సినిమా రంగంలో హీరోగా ఎదగాలనుకునే కుర్రాడు పడే కష్టాలు ఏంటి? ఈ సమయంలో తనకు పరిచయమైన అమ్మాయితో ప్రేమలో పడటం.. ఆ తర్వాత ఎలాంటి సమస్యలు ఎదురయ్యాయి? హీరో కావాలనే తన కల నెరవేరిందా? లేదా? అనే కథాంశంతో తెరకెక్కుతోన్న చిత్రమిది. విజయనగరం, అరకులలో ఈ సినిమా తర్వాతి షెడ్యూల్‌ ప్రారంభించి, చిత్రీకరణ పూర్తి చేస్తాం’’ అన్నారు. ‘‘మంచి కథాంశంతో ప్రేక్షకులను మెప్పించే విధంగా రూపొందుతోన్న చిత్రమిది. మూడు ఫైట్స్, నాలుగు పాటలు ఉన్నాయి’’ అన్నారు కిరణ్‌ కుమార్‌ రఘుపతి. రాఖీ, దశరథ్, సతీష్, రేణుక తదితరులు నటిస్తున్న ఈ చిత్రానికి సహనిర్మాతలు: బి.శారద, వి.నర్సింహారావు, సంగీతం: వంశీ కాంత్‌ రేఖానా, కెమెరా: ఆర్‌.కె. నాయుడు.
