ప్రముఖ సంగీత దర్శకుడు కీరవాణి తనయుడు శ్రీసింహా వరుస సినిమాలతో దూసుకెళ్తున్నాడు. ఇటీవల ‘దొంగలున్నారు జాగ్రత్త’తో తెలుగు ప్రేక్షకులను పలకరించిన శ్రీసింహా.. తాజాగా మరో చిత్రం ‘బాగ్‌ సాలే’ ని రిలీజ్ చేసేందుకు రెడీ అవుతున్నాడు. ప్రణీత్‌ సాయి దర్శకత్వం వహిస్తున్న ఈ క్రైమ్ కామెడీ చిత్రాన్ని వేదాన్ష్ క్రియేటివ్ వర్క్స్, బిగ్ బెన్, సినీ వ్యాలీ మూవీస్ సినిమా బ్యానర్లపై అర్జున్ దాస్యన్, యష్ రంగినేని, కళ్యాణ్ సింగనమల నిర్మిస్తున్నారు.
తాజాగా ఈ చిత్రం ఫస్ట్ లుక్‌ని విడుదల చేశారు మేకర్స్‌. ఈ సందర్భంగా నిర్మాత అర్జున్ దాస్యన్ మాట్లాడుతూ.. ‘ఈతరం ప్రేక్షకులని అలరించే కథతో థ్రిల్లింగ్ క్రైమ్ కామెడీ గా తెరకెక్కుతున్న చిత్రం 'భాగ్ సాలే'. ఏం చేసైనా అనుకున్నది సాధించాలనుకునే ఒక యువకుడి పాత్ర చుట్టూ తిరిగే ఈ కథ ఆద్యంతం థ్రిల్ చేస్తుంది’ అన్నారు. ఈ చిత్రంలో నేహా సొలంకి హీరోయిన్ గా నటించగా, జాన్ విజయ్, నందిని రాయ్ ప్రతినాయక పాత్రలు పోషించారు. కాల భైరవ సంగీతం అందిస్తున్న ఈ చిత్రంలో రాజీవ్ కనకాల, వైవా హర్ష, సత్య, సుదర్శన్, వర్షిణి తదితరులు ఇతర పాత్రల్లో నటించారు.
