ఇంఫాల్‌: కాంగ్రెస్‌ పార్టీ ఇచ్చిన విప్‌ను ధిక్కరించి సోమవారం జరిగిన ఒక్క రోజు అసెంబ్లీ సమావేశానికి కొంత మంది కాంగ్రెస్‌ ఎమ్మెల్యేలు డుమ్మా కొట్టిన సంగతి తెలిసిందే. గైర్హాజరైన 8 మంది ఎమ్మెల్యేల్లో ఆరుగురు తమ రాజీనామాలను స్పీకర్‌ యుమ్నమ్‌ కెంచంద్‌ సింగ్‌కు సమర్పించారు. అయితే వీరిలో ఐదుగురి రాజీనామాలను ఆమోదిస్తున్నట్లు స్పీకర్‌ తెలిపారు. ఈ ఆరుగురు ఎమ్మెల్యేలు కాంగ్రెస్‌ సభ్యత్వానికి కూడా రాజీనామాలు పంపారు. బీజేపీ నేతృత్వంలోని సంకీర్ణ ప్రభుత్వానికి అసెంబ్లీలో 29 ఎమ్మెల్యేల బలం ఉండగా, కాంగ్రెస్‌కు 24 మంది ఎమ్మెల్యేలున్నారు. బలపరీక్షకు కాంగ్రెస్‌ ఎమ్మెల్యేలు 8 మంది రాకపోవడంతో ప్రభుత్వం అవిశ్వాసం నుంచి గట్టెక్కింది.
