Virat Kohli: భారీ విజయం.. కోహ్లి బర్త్‌డే వేడుక.. వీడియో వైరల్‌

6 Nov, 2021 10:53 IST|Sakshi
PC: Indiancricket Team Instagram

Virat Kohli Birthday Celebration After Beat Scotland Video Goes Viral: టీ20 ప్రపంచకప్‌-2021 టోర్నీలో సెమీస్‌ రేసులో నిలవాలంటే తప్పక గెలవాల్సిన మ్యాచ్‌లో టీమిండియా సత్తా చాటింది. స్కాట్లాండ్‌పై అద్భుత విజయంతో రన్‌రేటు భారీగా మెరుగుపరుచుకుంది. తొలుత 85 పరుగులకే ప్రత్యర్థి జుట్టను ఆలౌట్‌ చేసి.. 6.3 ఓవర్లలోనే లక్ష్యాన్ని ఛేదించి.. 8 వికెట్ల తేడాతో జయభేరి మోగించింది. ఈ గెలుపు ద్వారా భారత జట్టు తమ కెప్టెన్‌ విరాట్‌ కోహ్లికి.. పుట్టినరోజున గొప్ప కానుక అందించింది.

కాగా టీమిండియా సారథి కోహ్లి నవంబరు 5న 33వ వసంతంలో అడుగుపెట్టిన సంగతి తెలిసిందే. ఈ నేపథ్యంలో మ్యాచ్‌ అనంతరం టీమిండియా డ్రెస్సింగ్‌రూంలో సంబరాలు చేసుకున్నారు. మెంటార్‌ ఎంఎస్‌ ధోని సహా ఇతర సిబ్బంది సమక్షంలో కోహ్లి పుట్టినరోజు వేడుక సంతోషంగా జరిగింది. ఇందుకు సంబంధించిన వీడియోను టీమిండియా ఇన్‌స్టా పేజీలో షేర్‌ చేయగా వైరల్‌ అవుతోంది. 

A post shared by Team India (@indiancricketteam)

‘‘అద్భుత విజయం తర్వాత విరాట్‌ కోహ్లి బర్త్‌డే ఇలా’’ అన్న క్యాప్షన్‌తో పంచుకున్న ఈ వీడియో అభిమానులను ఆకర్షిస్తోంది. ఇక జన్మదినాన అద్భుత విజయం సాధించడం.. ఈ సందర్భంలో తన సతీమణి అనుష్క శర్మ, చిన్నారి కుమార్తె వామిక తనతో పాటే కలిసి ఉండటం అన్నింటికంటే గొప్ప విషయమని కోహ్లి పేర్కొన్నాడు. 

చదవండి: Virat Kohli: పుట్టినరోజున సంతోషం.. జడ్డూ సూపర్‌.. నవంబరు 7న ఏం జరుగుతుందో మరి!

మరిన్ని వార్తలు