సాక్షి, హైదరాబాద్‌: రోడ్డు ప్రమాదాల నియంత్రణ కోసం విస్తృతమైన సేవలందిస్తున్న రహదారి భద్రతా నిపుణుడు, డిప్యూటీ ట్రాన్స్‌పోర్ట్‌ కమిషనర్‌ పుప్పాల శ్రీనివాస్‌కు లైఫ్‌టైమ్‌ అచీవ్‌మెంట్‌ అవార్డ్‌ లభించింది. శనివారం అహ్మదాబాద్‌లో జరిగిన ఓహెచ్‌ఎస్‌ఎస్‌ఏఐ ఫౌండేషన్‌ 7వ వార్షికోత్సవం సందర్భంగా ఆరోగ్యం, భద్రత, పర్యావరణం, సుస్థిరత అంశాల్లో విశేష సేవలందించిన ప్రముఖులకు అవార్డులను అందజేశారు.
ఈ సందర్భంగా రహదారి భద్రతపై విస్తృతంగా పని చేయడంతో పాటు, పలు జాతీయ, అంతర్జాతీయ సదస్సుల్లో పాల్గొని రోడ్డు భద్రతపై పరిశోధన పత్రాలను అందజేసినందుకుగాను పుప్పాల శ్రీనివాస్‌కు ఈ పురస్కారం దక్కింది. రోడ్డు ప్రమాదాల నియంత్రణ కోసం యువతను, విద్యార్థులను లక్ష్యంగా చేసుకుని అనేక అవగాహన కార్యక్రమాలను నిర్వహించారు. మూడు దశాబ్దాలుగా ఈ రంగంలో పుప్పాల చేస్తున్న సేవలు అభినందనీయమని, దేశంలో రహదారిభద్రతా ఉద్యమానికి ఎంతో దోహదం చేశాయని ఈ సందర్భంగా ప్రశంసించారు.
