కొత్తగూడ: మహబూబాబాద్‌ జిల్లా కొత్తగూడ మండలం ఓటాయి అటవీ ప్రాంతంలో పులి కదలికలు కలకలం సృష్టించాయి. కొత్తగూడ, తాడ్వాయి మండలాల సరిహద్దులోని మొసలి మడుగు వాగు సమీపంలో సోమవారం ఓ ఎద్దు కళేబరం కనిపించడంతో అటవీ అధికారులు దానిని పరిశీలించారు. పులి, పులిపిల్ల అడుగులను అక్కడ గుర్తించారు. పాద ముద్రలనుబట్టి రెండు రోజుల క్రితమే పులి ఆ ప్రాంతంలో సంచరించి నట్లు అంచనా వేశారు. దీంతో అటు వైపుగా పశువులను తీసుకెళ్లవద్దని ఫారెస్ట్‌ రేంజర్‌ వజ్రత్‌ స్థానికులకు సూచించారు.
