భారతదేశంలో 29వ రాష్ట్రంగా ఏర్పడింది తెలంగాణ. దాదాపు 2,500 ఏళ్ల చరిత్ర ఉన్న ఈ ప్రాంతానికి పోరాటల గడ్డగా పేరొందింది. దేశానికి స్వాతంత్ర్యం వచ్చాక కూడా దాదాపు 13 నెలలపాటు నిజాం పాలనలోనే ఉండిపోయింది ఈ ప్రాంతం. ఆపై సైనిక చర్య ‘ఆపరేషన్‌ పోలో’ ద్వారా దేశంలో విలీనం అయ్యింది. 

26 జనవరి 1950 న ఆనాటి కేంద్రం సివిల్ సర్వెంట్ ఎం.కె.వెల్లోడిని హైదరాబాద్ స్టేట్ తొలి ముఖ్యమంత్రిగా నియమించింది. అటుపై నిజాం స్టేట్ (మహారాష్ట్ర, కర్నాటక రాష్ట్రాలలోని పలు ప్రాంతాలతో కూడిన తెలంగాణ) కు తొలిసారిగా 1952 లో ప్రజాస్వామిక ఎన్నికలు జరగ్గా.. తొలి ముఖ్యమంత్రిగా బూర్గుల రామకృష్ణారావు బాధ్యతలు చేపట్టారు. 

2008 లో నియోజకవర్గాల పునర్విభజన చట్టం ద్వారా తెలంగాణ రీజియన్‌లో 119 అసెంబ్లీ నియోజకవర్గాలు.. అందులో 19 స్థానాలు ఎస్సీలకు, 12 స్థానాలు ఎస్టీలకు రిజర్వు అయ్యాయి. దశాబ్దాలుగా ఆంధ్రప్రదేశ్‌లో భాగంగా కొనసాగిన తెలంగాణ.. 2009లో జరిగిన మలిదశ ఉద్యమం.. తదనంతర రాజకీయ పరిణామాలు, చివరకు ఆంధ్రప్రదేశ్ పునర్వ్యవస్థీకరణ చట్టం ద్వారా 2014 జూన్ 2 వ తేదీ (అపాయింటెడ్ డే) స్వతంత్ర రాష్ట్రంగా ఆవిర్భవించింది. 

2014లో తొలిసారి తెలంగాణ రాష్ట్రంలో ఎన్నికలు(ప్రత్యేక రాష్ట్ర ప్రకటన వెలువడిన తర్వాత) జరిగాయి. ఆపై 2019లో సార్వత్రిక ఎన్నికలతో పాటు తెలంగాణ ఎన్నికలు జరగాల్సి ఉండగా.. ముందస్తుకు వెళ్లింది అప్పటి తెలంగాణ ప్రభుత్వం. దీంతో 2018లోనే ఎన్నికలు జరిగాయి. అటుపై ప్రభుత్వ నిర్ణయంతో జిల్లాల సంఖ్య పెరిగింది. 

ప్రస్తుతం  హైదరాబాద్ రాజధానిగా 33 జిల్లాలతో కూడిన తెలంగాణలో 119 అసెంబ్లీ స్థానాలు ఉన్నాయి.  గత రెండు దఫాల ఎన్నికల్లో భారత రాష్ట్ర సమితి(పూర్వపు తెలంగాణ రాష్ట్ర సమితి) ప్రభుత్వాన్ని ఏర్పాటు చేసింది. మూడో దఫా తెలంగాణ అసెంబ్లీ 2023 ఎన్నికల్లో భాగంగా.. నవంబర్ 30 వ తేదీన పోలింగ్ జరగనుంది. ఎన్నికల సంఘం లెక్కల ప్రకారం.. 3.26 కోట్ల మంది ఓటర్లు తమ ఓటు హక్కుతో ఆయా పార్టీల భవిష్యత్తును తేల్చనున్నారు.