ఈతకు వెళ్లిన బాలుడు గల్లంతు

స్నేహితులతో కలిసి రైవస్‌ కాలువలో ఈతకు వెళ్లిన బాలుడు గల్లంతయ్యాడు. వివరాలలోకి వెళితే పసుపుతోటకు చెందిన దువ్వరపాటి శివ (15) స్నేహితులతో కలిసి మధురానగర్‌ శివాలయం వద్ద రైవస్‌ కాలువలో ఈత కొట్టడానికి వెళ్లాడు. శివాలయం సమీపంలోని వంతెన పైనుంచి కాలువలోకి దూకుతూ ఈత కొడుతూ స్నేహితులతో ఉల్లాసంగా గడిపాడు. శివ వంతెన పైనుంచి మూడుసార్లు దూకి ఈత కొట్టిన తరువాత నాలుగో సారి దూకాడు. దూకిన తరువాత ఎంతకీ పైకి రాకపోవడంతో భయపడిన స్నేహితులు పారిపోయారు. సమాచారం తెలుసుకున్న శివ తండ్రి శాంతారావు, బంధువులు ఘటనాస్థలానికి చేరుకుని రైవస్‌కాలువలో గాలింపు చర్యలు చేపట్టారు. మాచవచం పోలీసులకు సమాచారం అందించారు. సీఐ ఉమామహేశ్వరరావు ఘటనాస్థలానికి చేరుకుని వివరాలు సేకరించారు. రైవస్‌ కాలువలో నీటి ప్రవాహం అధికంగా ఉండటంతో ఆ ఉధృతికి కొట్టుకు పోయి ఉండవచ్చని భావిస్తున్నారు. పదో తరగతి చదివే కుమారుడు గల్లంతుకావడంతో తండ్రి శాంతారావు చేస్తున్న ఆర్తనాదాలు చూపరులను కంటతడిపెట్టించాయి. ఈ ఘటనతో పసుపుతోటలో విషాధచాయలు అలముకున్నాయి.