అధికారులకు మోదం.. భక్తులకు ఖేదం!

సాక్షి, విజయవాడ : ఇంద్రకీలాద్రిపైన భక్తులు ఏ క్యూలైన్లో వచ్చినప్పటికీ అమ్మవారి ములవిగ్రహాన్ని దర్శనం చేసుకునే సమయంలో అర్చకులు శఠగోపం పెట్టి కుంకుమ ప్యాకెట్లు ఇచ్చేవారు. దీంతో భక్తులు ఎంతో సంతృప్తి చెందేవారు. చివరకు ఉచిత దర్శనం లైన్లో కూడా ఇదే పద్ధతి ఉండేది. అయితే ఇప్పుడు తిరుపతి తరహాలో అంటూ.. శఠగోపం పెట్టే విధానాన్ని పూర్తిగా మార్చివేశారు. రూ.300 టికెట్‌ కొనుక్కుని వచ్చే భక్తులు, వీవీఐపీలకు మాత్రమే అమ్మవారి సన్నిధిలో శఠగోపం (పాదుకలు) అర్చకులు పెట్టేందుకు ఈవో సూర్యకుమారి అనుమతిచ్చారు. రూ.20 టికెట్‌ కొనుగోలు చేసి ముఖమండపం ద్వారా వచ్చే భక్తులకు అమ్మవారి సన్నిధిలో శఠారీ లభించదు. వస్త్రంతో తయారు చేసిన హుండీలు పెట్టిన చోటకు వచ్చిన తరువాత అక్కడ పాదుకలతో ఆశీర్వాదం లభిస్తుంది. ఇక సాధారణ భక్తుల పరిస్థితి మరీ దారుణం. దర్శనం చేసుకుని రావి చెట్టు వద్దకు వచ్చిన తరువాత అక్కడ అర్చకుడు ఎక్కడ ఉన్నాడో గుర్తించి శఠగోపం పెట్టించుకోవాల్సి ఉంది. అర్చకులు ఉండేందుకు కనీసం స్పష్టమైన ప్రదేశం కూడా లేదు. దీంతో భక్తులు  నానా ఇబ్బందులు పడుతున్నారు. ఇదే విషయాన్ని పలువురు భక్తులు ఈవో దృష్టికి తీసుకెళ్లినా పట్టించుకోని విషయం స్పష్టమవుతోంది.