‘తెలంగాణ వారికే ఉద్యోగాలు’

సాక్షి, హైదరాబాద్‌: తెలంగాణ రాష్ట్రంలో ఇక నుంచి తెలంగాణ ప్రాంతం వారికే ఉద్యోగావకాశాలు ఉంటాయని తెలంగాణ ఏఈఈల సంఘం హర్షం వ్యక్తంచేసింది. ఉమ్మడి ఏపీలో తెలంగాణ వాళ్లు మొత్తం ఉద్యోగాల్లో 25% రిక్రూట్‌ అయ్యేవాళ్లని ఆ సంఘం అధ్యక్షుడు చక్రధర్‌ అన్నారు. 5వ జోన్‌లో ఆదిలాబాద్‌ వాళ్లు, 6వ జోన్‌లో మహబూబ్‌నగర్‌ నుంచి 1% మాత్రమే రిక్రూట్‌ అయ్యేవారని తెలిపారు. రాష్ట్రంలో ప్రస్తుతం 7 జోన్‌లు చేయడం వల్ల ప్రతి ప్రాంతం నుంచి సమానంగా రిక్రూట్‌ అవుతారన్నారు.

ఇంతకుముందు 40% ఓపెన్‌ కోటాలో వేరే రాష్ట్రం వాళ్లు వచ్చే అవకాశం ఉండేది, కానీ ఇప్పుడు ఓపెన్‌ కోటా 5% కావడం వల్ల 95% ఉద్యోగాలు స్థానికులకే దక్కుతాయన్నారు. డీఎస్పీ, డీపీఆర్వో పోస్టులు రాష్ట్రస్థాయిగా రిక్రూట్‌మెంట్‌ జరిగేది. ఇప్పుడు మల్టీజోన్‌లో రిక్రూట్‌ అవడం వల్ల అన్ని ప్రాంతాలకు ప్రాధాన్యత కలుగుతుందన్నారు. తొలిసారిగా కేబినెట్‌ సమావేశానికి ఉద్యోగ సంఘ ప్రతినిధులను పిలిచి, వారి అభిప్రాయాలను గౌరవించడం మంచి పరిణామమన్నారు.