గౌతమ్‌ కృష్ణ, పూజితా పొన్నడ జంటగా నటించిన చిత్రం ‘ఆకాశ వీధుల్లో..’. గౌతమ్‌ కృష్ణ దర్శకత్వంలో మనోజ్‌ డీజే, డా. మణికంఠ నిర్మించిన ఈ చిత్రం నేడు విడుదల కానుంది. ఈ సందర్భంగా హైదరాబాద్‌లో జరిగిన ప్రీ రిలీజ్ ఈవెంట్‌లో గౌతమ్‌ కృష్ణ మాట్లాడుతూ – ‘‘ఓ కామన్‌మేన్‌ రాక్‌స్టార్‌ ఎలా అయ్యాడు? అన్నదే ఈ సినిమా కథ. ‘ఆకాశవీధుల్లో...’ పక్కా యూత్‌ఫుల్‌ చిత్రం. ఈ సినిమా ఓ స్లో పాయిజన్‌. యూత్‌ బాగా కనెక్ట్‌ అవుతారు. నాకు ఎలాంటి బ్యాగ్రౌండ్‌ లేదు.
ఈ సినిమా కోసం చాలా హార్డ్‌వర్క్‌ చేశాం’’ అన్నారు. ‘‘గౌతమ్‌ ఎమ్‌బీబీఎస్‌ చదువుతున్నప్పుడే ఈ సినిమా చేస్తానని అన్నాడు. మెడిసిన్‌ పూర్తి చేయమన్నాను. పీజీ కూడా పూర్తయ్యేది. కానీ సినిమాలపై ఇష్టంతో ఈ రంగంలోకి వచ్చాడు. గౌతమ్‌కృష్ణ చాలా తెలివైనవాడు. సినిమా అద్భుతంగా వచ్చింది’’ అన్నారు నిర్మాత మనోజ్‌. ‘‘నేను ఇండస్ట్రీకి వచ్చి నాలుగేళ్లవుతోంది. దాదాపు ఇరవై సినిమాలు చేశాను. కానీ ఓ మంచి సినిమా చేశాననే తృప్తి ఈ సినిమాతో కలిగింది’’ అన్నారు పూజిత.
