మెల్‌బోర్న్‌: ఫార్ములావన్‌ సీజన్‌లో వరుసగా మూడో విజయం సాధించాలని ఆశించిన వరల్డ్‌ చాంపియన్‌ మాక్స్‌ వెర్‌స్టాపెన్‌ (రెడ్‌బుల్‌)కు నిరాశ ఎదురైంది. ఆదివారం జరిగిన ఆస్ట్రేలియన్‌ గ్రాండ్‌ప్రి రేసును ‘పోల్‌ పొజిషన్‌’తో ఆరంభించిన వెర్‌స్టాపెన్‌ కారు ఇంజిన్‌లో సమస్య తలెత్తడంతో నాలుగో ల్యాప్‌లోనే వైదొలిగాడు.
ఈ అవకాశాన్ని సద్వినియోగం చేసుకున్న ఫెరారీ జట్టు డ్రైవర్‌ కార్లోస్‌ సెయింజ్‌ జూనియర్‌ విజేతగా అవతరించాడు. నిర్ణీత 58 ల్యాప్‌ల రేసును సెయింజ్‌ అందరికంటే వేగంగా ఒక గంటా 20 నిమిషాల 26.843 సెకన్లలో ముగించి ఈ సీజన్‌లో తొలి విజయాన్ని అందుకున్నాడు.
ఇక ఫెరారీకే చెందిన చార్లెస్‌ లెక్‌లెర్క్‌ రెండో స్థానంలో నిలిచాడు. 2022 బహ్రెయిన్‌ గ్రాండ్‌ప్రి తర్వాత ఇద్దరు ఫెరారీ డ్రైవర్లు టాప్‌–2లో నిలిచారు. సీజన్‌లోని నాలుగో రేసు జపాన్‌ గ్రాండ్‌ప్రి ఏప్రిల్‌ 7న జరుగుతుంది.
