ఉగాండా రన్నర్‌ జాషువా చెప్టెగయ్‌ ఘనత
మొనాకో: ప్రతిష్టాత్మక డైమండ్‌ లీగ్‌ అథ్లెటిక్స్‌ మీట్‌లో ఉగాండా రన్నర్‌ జాషువా చెప్టెగయ్‌ పురుషుల 5 వేల మీటర్ల విభాగంలో కొత్త ప్రపంచ రికార్డు నెలకొల్పాడు. 23 ఏళ్ల చెప్టెగయ్‌ 5 వేల మీటర్ల రేసును 12 నిమిషాల 35.36 సెకన్లలో పూర్తి చేసి విజేతగా నిలిచాడు. ఈ క్రమంలో 16 ఏళ్లుగా కెనెనిసా బెకెలె (ఇథియోపియా–12ని:37.35 సెకన్లు) పేరిట ఉన్న ఈ ప్రపంచ రికార్డును చెప్టెగయ్‌ బద్దలు కొట్టాడు. గత ఏడాది దోహాలో జరిగిన ప్రపంచ అథ్లెటిక్స్‌ చాంపియన్‌షిప్‌లో చెప్టెగయ్‌ స్వర్ణ పతకాన్ని సాధించి ప్రపంచ చాంపియన్‌గా నిలిచాడు.
