పెళ్లికి నిరాకరించిన యువకుడిపై చీటింగ్‌ కేసు

యల్లనూరు (యల్లనూరు) : నిశ్చితార్థం జరిగితే సగం పెళ్లైనట్లు భావిస్తారు. తాంబూలాలు పుచ్చుకున్నారు. కట్నం డబ్బులూ తీసుకున్నారు. పెళ్లి ఘడియలు సమీపించే సమయానికి కాబోయే వరుడు పెళ్లి చేసుకోనంటూ అడ్డం తిరిగాడు. దీంతో అతనిపై చీటింగ్‌ కేసు నమోదు చేశారు పోలీసులు. తాడిపత్రికి చెందిన వినోద్‌కుమార్‌కు యల్లనూరు మండలానికి చెందిన ఓ యువతితో నిశ్చితార్థమైంది. గత నెల 24న తాంబూలాలు సైతం తీసుకున్నారు. రూ.3 లక్షల వరకు కట్నం డబ్బులూ ముట్టాయి. ఇప్పుడు పెళ్లి ఇష్టం లేదంటూ మొండికేయడంతో అతనితో పాటు కుటుంబ సభ్యులపైనా యువతి తండ్రి ఫిర్యాదు మేరకు చీటింగ్‌ కేసు గురువారం నమోదు చేసినట్లు యల్లనూరు ఎస్‌ఐ శ్రీనివాస్‌ తెలిపారు.