పెళ్లిళ్లకు ఆ సీజన్ బాగుంటుంది!

ఈ మధ్య తాప్సీ సినిమాలు చేయడంతో పాటు పెళ్లికి సంబంధించిన ప్లాన్స్ చేస్తూ బిజీగా ఉంటున్నారు. ఓహో.. తాప్సీకి పెళ్లి ఫిక్సయ్యిందేమో అనుకుంటున్నారా? అదేం కాదు. బిజినెస్‌లో భాగంగా ఈ ప్లాన్స్ చేస్తున్నారు. పెద్ద పెద్దవాళ్లంతా వెడ్డింగ్ ప్లానర్స్‌ని సంప్రతించి, పెళ్లి వేడుకలకు సంబంధించిన మొత్తం బాధ్యతలను వాళ్లకు అప్పగించేస్తారు. ప్రస్తుతం మార్కెట్లో ఈ వ్యాపారం జోరుగా సాగుతోంది. అందుకే తాప్సీ తన చెల్లెలు షగున్‌తో కలిసి ‘వెడ్డింగ్ ఫ్యాక్టరీ’ పేరుతో వ్యాపారం మొదలుపెట్టారు.

అయితే, తాప్సీ ఈ బిజినెస్‌ని ధనార్జనే ధ్యేయంగా మొదలుపెట్టలేదు. అదొక కారణం మాత్రమే అంటున్నారు. ఈ బిజినెస్ అంటే ఆమెకు చాలా ఇష్టం. ఇప్పటివరకూ తాప్సీ, షగున్ కొన్ని వివాహ వేడుకలను సక్సెస్‌ఫుల్‌గా చేశారు. పెళ్లికి వర్షాకాలం చాలా బాగుంటుందని తాప్సీ చెబుతూ - ‘‘మాన్‌సూన్‌లో వాతావరణం బాగుంటుంది. చాలా చల్లగా, ఆహ్లాదకరంగా ఉంటుంది కాబట్టి, మన మూడ్ కూడా దాదాపు అలానే ఉంటుంది.

 పైగా, వర్షాకాలంలో ఎక్కువగా తిరగలేం. అందుకని ఏదైనా వేడుకకు వెళితే అక్కడ గంటలు గంటలు గడుపుతాం. ఆ విధంగా. బంధువులు, స్నేహితులతో వేడుక ప్రాంగణం కళకళలాడిపోతుంది. వేడిగా ఉండదు కాబట్టి, మేకప్ చెరగదు. హ్యాపీగా పట్టుచీరలు కట్టుకోవచ్చు. ఎన్ని నగలైనా పెట్టుకోవచ్చు. అదే సమ్మర్ అనుకోండి.. ఇంత భారీగా రెడీ కాలేం. అందుకే మ్యారేజెస్‌కి మాన్‌సూన్ బెస్ట్ అంటున్నా’’ అని చెప్పారు.