హైదరాబాద్: తమ పార్టీ నుంచి బయటకు వెళ్లిపోయిన వారిని కాంగ్రెస్ పార్టీలో చేర్చుకోవడాన్ని టీఆర్ఎస్ నేత హరీష్ రావు తప్పుబట్టారు. టీఆర్ఎస్ పార్టీ నుంచి బయటకు వెళ్లిపోయిన నేతలను కాంగ్రెస్ పార్టీలో ఏ విధంగా చేర్చుకుంటారని ప్రశ్నించారు. ప్రస్తుతం కాంగ్రెస్ పార్టీ వ్యవహారిస్తున్నతీరు ఏ మాత్రం సరిగా లేదంటూ విమర్శించారు. టీఆర్ఎస్ నుంచి బయటకు వెళ్లిపోయిన విజయశాంతిని కాంగ్రెస్ పార్టీలో చేర్చుకోవడాన్ని ఉద్దేశిస్తూ.. ఈ తరహా వైఖరి వల్ల ఇరు పార్టీల మధ్య నెలకొన్న సామరస్య పూర్వక వాతావరణం కాస్తా కలుషితం అయ్యేదిగా ఉందని మండిపడ్డారు.
ఒక వైపు విలీనం అంటూ పార్టీ నేతలను కాంగ్రెస్ లో చేర్చుకోవడం ఎంతవరకూ సమంజసమని నిలదీశారు. కాంగ్రెస్ నేతలు నోటితో మాట్లాడి నొసటితో వెక్కిరిస్తున్నారన్నారు. టీఆర్ఎస్ పై జైరాం రమేష్ వ్యాఖ్యలను అది ఆయన బాధ్యతారాహిత్యానికి నిదర్శనమని హరీష్ పేర్కొన్నారు.
