స్టైలిష్‌ స్టార్‌ అల్లు అర్జున్‌, త్రివిక్రమ్‌ శ్రీనివాస్ కాంబినేషన్‌లో తెరకెక్కుతున్న ఈసినిమాకు ‘అల వైకుంఠపురములో...’ అనే టైటిల్‌ను ఫిక్స్‌ చేశారు. స్వాతంత్ర్యదినోత్సవ కానుకగా ఈ సినిమా టైటిల్‌ లోగో పాటు టీజర్‌ను రిలీజ్ చేశారు. ఈ టీజర్‌లో బన్నీ చెప్పిన డైలాగ్‌ తన మీద తానే సెటైర్‌ వేసుకున్నట్టుగా ఉందంటున్నారు ఫ్యాన్స్‌.
మురళీ శర్మ ‘ఏరా గ్యాప్‌ ఇచ్చావ్‌’ అంటే.. బన్నీ సమాధానంగా ‘ఇవ్వలేదు.. వచ్చింది’ అంటాడు. ‘నా పేరు సూర్య’ తరువాత లాంగ్‌ గ్యాప్‌ తీసుకున్న బన్నీ ఈ సినిమాలో నటిస్తున్నాడు. ఈ గ్యాప్‌కు సంబంధించే టీజర్‌లో ఆ డైలాగ్‌ను చెప్పినట్టుగా ఉంది. బన్నీ సరసన పూజా హెగ్డే హీరోయిన్‌గా నటిస్తున్న ఈ సినిమాలో సుశాంత్‌, నివేదా పేతురాజ్‌, సీనియర్ నటి టబులు కీలక పాత్రల్లో నటిస్తున్నారు. తమన్‌ సంగీతమందిస్తుండగా గీతా ఆర్ట్స్‌, హారికా అండ్‌ హాసిని క్రియేషన్స్‌ సంస్థలు సంయుక్తంగా ఈ సినిమాను నిర్మిస్తున్నాయి.
