లక్నో : చిన్నారులకు విద్యాబుద్ధులు నేర్పాల్సిన టీచర్‌ తరగతి గదిలోనే పొగతాగుతున్న వీడియో సోషల్‌ మీడియాలో వైరల్‌ కావడంతో సదరు ఉపాధ్యాయుడిని సస్పెండ్‌ చేసిన ఘటన యూపీలో వెలుగు చూసింది. మహ్మదాబాద్‌లోని ఓ ప్రైమరీ స్కూల్‌ టీచర్‌ క్లాస్‌రూంలో పొగతాగుతున్న దృశ్యాలు సోషల్‌ మీడియాలో వైరల్‌ అయ్యాయి. ఈ వీడియోను చూసిన జిల్లా విద్యాశాఖాధికారి డివిజన్‌ అధికారిని సదరు స్కూల్‌కు పంపగా వీడియోలోని వ్యక్తి ఆ టీచరేనని వెల్లడైంది. క్లాస్‌రూంలో పొగతాగిన టీచర్‌ను తక్షణమే సస్పెండ్‌ చేశామని జిల్లా ప్రాథమిక విద్యాశాఖాధికారి అజయ్‌ కుమార్‌ తెలిపారు. విద్యార్ధులపై ఉపాధ్యాయుల వ్యవహారశైలి ప్రభావం చూపుతుందని, ఉపాధ్యాయులెవరూ పొగతాగరాదని, క్లాస్‌రూమ్‌లో ఇలా చేయడం క్షమించరాని విషయమని ఆయన స్పష్టం చేశారు. ఈ వీడియోలో తరగతి గదిలో విద్యార్ధుల ముందే టీచర్‌ దర్జాగా పొగతాగుతున్న దృశ్యాలు కలకలం రేపాయి.
ఆ టీచర్‌ క్లాస్‌రూమ్‌లోనే దర్జాగా..
6 Oct, 2019 08:23 IST