విచక్షణ కోల్పోవడానికి, విజ్ఞతను ప్రదర్శించడానికి ఎర్రబస్సు, విమానం తేడా లేదని నిరూపించారు వాళ్లు. విమానంలో సౌండ్ తగ్గించమన్నందుకు ఓ అయిదుగురు మహిళలు.. తోటి ప్రయాణీకులతో గొడవకు దిగారు. బాల్టిమోర్ నుంచి లాస్ ఏంజెల్స్ కు వెళుతున్న ఓ విమానంలో ఈ ఘర్షణ చోటుచేసుకుంది.
వివరాల్లోకి వెళితే మద్యం మత్తులో జోగుతున్న ఐదుగురు మహిళలు బిగ్గరగా సంగీతాన్ని వింటున్నారు. అయితే సౌండ్ తగ్గించమని తోటి ప్రయాణీకులు.. వారికి పలుమార్లు విజ్ఞప్తి చేశారు. అయితే ఈ బృందం సౌండ్ తగ్గించకపోగా..మరింత పెంచి తోటి ప్రయాణికులను గేలి చేసింది. దీంతో చిర్రెత్తుకొచ్చిన ప్రయాణీకులు.. మహిళలపై దాడికి దిగారు. ఈ సందర్భంగా ఇరువర్గాలు పిడిగుద్దులు కురిపించుకున్నారు. జుట్టు, జుట్టు పట్టి లాక్కున్నారు. ఈ దృశ్యాలను తోటి ప్రయాణికులెవరో సెల్ఫోన్ లో చిత్రీకరించి ఇంటర్ నెట్ లో పోస్ట్ చేశారు. ఈ వీడియో సోషల్ మీడియాలో వైరల్ అయింది.
