అనుష్క.. నయనతార.. త్రిష.. తమన్నా.. అంజలి.. పూర్ణ.. ఏంటీ? వీళ్లందరూ కలసి ఒక సినిమాలో యాక్ట్‌ చేయబోతున్నారేమో అనుకుంటున్నారా? అదేం కాదు. ఒకవైపు గ్లామరస్‌ రోల్స్‌ చేయడంతో పాటు వీళ్లంతా లేడీ ఓరియంటెడ్‌ సినిమాలతోనూ తమ సత్తా చాటారు. ఈ లిస్టులోకి తాజాగా కాజల్ అగర్వాల్‌ చేరారని చెన్నై టాక్‌.
‘చంద్రముఖి’ ఫేమ్‌ పి. వాసు తమిళ, తెలుగు భాషల్లో ఓ లేడీ ఓరియంటెడ్‌ సినిమా తెరకెక్కించేందుకు సన్నాహాలు చేస్తున్నారట. ఈ సినిమాకు కాజల్ అగర్వాల్‌ అయితే బాగుంటుందనుకున్నారట. కాజల్‌ను కలిసి కథ వినిపించారని కోలీవుడ్‌ సమాచారం. లేడీ ఓరియంటెడ్‌ మూవీ, అది కూడా వాసులాంటి సీనియర్‌ డైరెక్టర్‌.. మరి కాజల్ కాదంటారా? గ్రీన్‌ సిగ్నల్‌ ఇచ్చేశారని భోగట్టా. ఈ బ్యూటీ కథానాయిక అయి పదేళ్లకు పైనే అయింది. ఇన్నేళ్లూ ఒకవైపు చూశాం.. ఇప్పుడు కథానాయికగా రెండో వైపు చూడనున్నాం అన్నమాట.
