అలనాటి అందాల తార సావిత్రి జీవితకథ ఆధారంగా మహానటి సినిమా తెరకెక్కుతున్న సంగతి తెలిసిందే. ఈ సినిమాలో సావిత్రి పాత్రలో కీర్తి సురేష్ నటిస్తోంది. ఈ రోజు (మంగళవారం) కీర్తి పుట్టిన రోజు సందర్భంగా చిత్రయూనిట్ ఓ ఆసక్తికరమైన పోస్టర్ ను రిలీజ్ చేసింది. ఆకాశ వీధిలో అందాల జాబిలి అనే ట్యాగ్ తో రిలీజ్ చేసిన ఈ పోస్టర్ లో కేవలం కీర్తి సురేష్ కళ్లను మాత్రమే చూపించారు.
అయితే ఆ కళ్లు సావిత్రివా.. లేక కీర్తి సురేష్ వా..? అన్న విషయం పోల్చుకోలేనంతగా సావిత్రి క్యారెక్టర్ లో ఓదిగిపోయింది కీర్తి సురేష్. ఎవడే సుబ్రమణ్యం ఫేం నాగ అశ్విన్ దర్శకత్వంలో తెరకెక్కిస్తున్న ఈ సినిమాను వైజయంతి మూవీస్ బ్యానర్ పై తెలుగు, తమిళ, హిందీ భాషల్లో తెరకెక్కిస్తున్నారు. కీలక పాత్రలో దుల్కర్ సల్మాన్, రాజేంద్ర ప్రసాద్, మోహన్ బాబు, సమంత లాంటి హేమా హేమీలు నటిస్తుండటంతో సినిమాపై మరింత హైప్ క్రియేట్ అవుతోంది.
