నోయిడా : 120 అడుగుల ఎత్తున్న రెండు భవనాల మధ్య 19 ఏళ్ల యువతి మృతదేహాం చిక్కుకున్నట్లు గుర్తించామని మంగళవారం పోలీసు అధికారులు తెలిపారు. నోయిడాలోని అమ్రపాలి సిలికాన్‌ సొసైటీలో ఈ సంఘటన చోటు చేసుకుంది. అదే సొసైటీలో నివసిస్తున్న దంపతుల ఇంట్లో ఆ యువతి పని చేస్తుందని, ఆమె స్వస్థలం బీహార్‌లోని కత్తీహర్‌ జిల్లాగా గుర్తించామని తెలిపారు. గత నెల జూన్‌ 28న యువతి పై మిస్సింగ్‌ కేసు నమోదైనట్లు పోలీసు అధికారులు పేర్కొన్నారు. ఈ మృతదేహాన్ని బయటికి తీయడానికి ఎన్డీఆర్‌ఎఫ్‌ సహాయం కోరినట్లు తెలిపారు.
ఈ సందర్భంగా రెండు భవనాల మధ్య చిక్కుకున్న మృతదేహాన్ని 35 మంది టీంతో కలిసి దాదాపు రెండు గంటలు పాటు శ్రమించి బయటకు తీసినట్లు ఎన్డీఆర్‌ఎఫ్‌ అధికారి జితేంద్ర కుమార్‌ యాదవ్‌ వెల్లడించారు. ఈ ఘటన పై ఇంకా ఎలాంటి వివరాలు తెలియదని అక్కడి పోలీస్‌ అధికారులు స్పష్టం చేశారు. కేసు నమేదు చేసుకొని మృతదేహాన్ని పోస్టుమార్టంకు తరలించినట్లు పోలీస్‌ అధికారి అజయ్‌ కుమార్‌ అగర్వాల్‌ వెల్లడించారు.
