సాక్షి, ఇండోర్ : నేరస్తుడైన డాక్టర్ను పట్టుకోవటానికి ఓ పోలీసు అధికారి రోగిలా వేషం కట్టాడు. మరో పోలీసు కానిస్టేబుల్ సహాయంతో ఆసుపత్రిలోనే కేడీ డాక్టర్ను అరెస్ట్ చేశాడు. ఈ సంఘటన శుక్రవారం మధ్యప్రదేశ్లోని ఇండోర్లో చోటుచేసుకుంది. పోలీసులు తెలిపిన వివరాల మేరకు.. మధ్యప్రదేశ్కు చెందిన అబ్దుల్ వహద్ హజి దావుద్ మీర్జాపై ముంబైలోని పలు పోలీస్ స్టేషన్లలలో మూడుకుపైగా చీటింగ్ కేసులు నమోదయ్యాయి. దీంతో అతడు గతకొద్ది కాలంగా పోలీసులనుంచి తప్పించుకుని తిరుగుతున్నాడు. ఈ నేపథ్యంలో అతడు ఇండోర్లోని ఓ ఆసుపత్రిలో విధులు నిర్వహిస్తున్నాడని పోలీసులకు సమాచారం అందింది. అతడిని ఎలాగైనా పట్టుకోవాలని చూస్తున్న పోలీసులు ఓ ఉపాయం ఆలోచించారు. అనుకున్నదాని ప్రకారం శుక్రవారం రియాజ్ ఖాజీ అనే పోలీస్ అధికారి రోగిలా వేషం కట్టి మీర్జా ఉంటున్న ఇండోర్లోని ఇండెక్స్ మెడికల్ కాలేజ్ ఆసుపత్రిలో చేరాడు.
సహెబ్రావో పవర్ అనే ఓ కానిస్టేబుల్ అతడి తండ్రిగా వేషం కట్టాడు. తన కొడుకు ఆరోగ్య పరిస్థితి విషమంగా ఉందని వెంటనే చెస్ట్ స్పెషలిస్ట్ను పిలిపించాలని అక్కడి ఓ నర్సును పవర్ తొందరచేశాడు. ఆ నర్సు విధుల్లో ఉన్న మీర్జాను అక్కడకు తీసుకురాగా పోలీసులు వెంటనే అతడ్ని అరెస్ట్ చేశారు. మీర్జాను అదుపులోకి తీసుకున్న పోలీసులు విచారణ ప్రారంభించారు.