మెడి క్షనరీ
ఏదైనా చల్లటి లేదా పుల్లటి పదార్థాన్ని నోట్లో పెట్టుకుంటే మన తల ఎలా వణుకుతుందో అందరికీ అనుభవంలోకి వచ్చిన విషయమే. కానీ మామూలు పదార్థాన్ని నోట్లో పెట్టుకున్నా తలను అలాగే కదిలించేలా చేస్తుంది ఈ ‘నాడింగ్ డిసీజ్’. తలను వేగంగా అలా కదిలిపోయేలా చేస్తుంది కాబట్టే దానికి ఆ పేరు. పిల్లలు ఏదైనా తినే సమయంలో తల అలా కదిలిపోవడమే కాదు... ఆ పిల్లల్లో మానసిక వికాసం లోపిస్తుంది. శారీరకంగా ఎదుగుదల కూడా ఆగిపోతుంది.
ఇది దక్షిణ సూడాన్, టాంజానియా, ఉత్తర ఉగాండా ప్రాంతాల్లో 5 - 15 ఏళ్లలోపు చిన్న పిల్లలకు వచ్చే ఒక వ్యాధి. టాంజానియాలో వైద్యచికిత్సలు అందిస్తున్న డాక్టర్ లోజీ జిలెక్ ఆల్ అనే నార్వేజియన్ సైకియాట్రిస్ట్ 1960 ప్రాంతాల్లో ఈ వ్యాధిని మొట్టమొదటిసారి రిపోర్టు చేశారు. ఆంకోసెరా ఓల్వులస్ అనే రకం నులిపురుగు వల్ల ఈ వ్యాధి వస్తుందని ఊహిస్తున్నారు. బ్లాక్‌ఫ్లై అని పిలిచే ఒక రకం కీటకం ద్వారా ఈ నులిపురుగుల వ్యాప్తి జరుగుతుందని భావిస్తున్నారు. ఇంకా ఈ వ్యాధిపై పరిశోధనలు కొనసాగుతున్నాయి. ఈ వ్యాధి సోకిన పిల్లల్లో ఎలక్ట్రో ఎన్‌సెఫలోగ్రామ్ (ఈఈజీ) అబ్‌నార్మల్‌గా ఉంటుందిగానీ మెదడు ద్రవం (సెరిబ్రోస్పైనల్ ఫ్లుయిడ్) నార్మల్‌గా ఉంటుంది.
