బంజారాహిల్స్(హైదరాబాద్): వైద్యురాలితో అసభ్యంగా ప్రవర్తించి, ఆమెపై లైంగిక దాడికి ప్రయత్నించిన ఘటనలో సినీ నిర్మాత సి.కల్యాణ్‌ను జూబ్లీహిల్స్ పోలీసులు శనివారం అరెస్టు చేశారు. పోలీసుల కథనం ప్రకారం జూబ్లీహిల్స్ రోడ్ నంబర్ 5లోని విమల్ అపార్ట్‌మెంట్స్‌లో నివసించే కల్యాణ్ అదే అపార్ట్‌మెంట్‌లో నివసిస్తున్న డాక్టర్ టి. కవితతో అసభ్యంగా ప్రవర్తించారు. ప్లాట్ అమ్మాలంటూ ఆమెపై ఒత్తిడి తీసుకొచ్చారు. ఆమెను దారికాచి చంపుతానంటూ బెదిరించారు. ఈ ఘటనపై ఆమె ఇచ్చిన ఫిర్యాదు మేరకు పోలీసు కేసు నమోదు చేశారు.
సమాధానం చెప్పాల్సిందిగా కల్యాణ్కు మూడు రోజుల క్రితం పోలీసులు నోటీసులు జారీ చేశారు. ఆయన సంతృప్తికరమైన సమాధానం ఇవ్వలేదు. దానికి తోడు బాధితురాలు సెల్‌ఫోన్‌లో రికార్డు చేసిన ఆధారాలను పోలీసులకు అందజేశారు. దీనిపై పోలీసులు కల్యాణ్‌ను అరెస్టు చేసి వ్యక్తిగత పూచీకత్తుమీద స్టేషన్ బెయిల్ ఇచ్చి విడుదల చేశారు.
