ప్యారిస్: జైలు శిక్ష అనుభవిస్తున్న ఓ సౌదీ అరేబియాకు చెందిన బ్లాగర్ అరుదైన ఘనత దక్కించుకున్నాడు. అతడిని ప్రతిష్టాత్మక యూరోపియన్ యూనియన్ హక్కుల అవార్డు సఖరోవ్ ప్రైజ్ వరించింది. భావప్రకటన స్వేచ్ఛా హక్కును అతడు కాపాడినందుకు గుర్తుగా ఈ అవార్డును ప్రకటించారు. సాధారణంగా మానవ హక్కులను రక్షించడంలో కృషి చేసిన వారికి ఆండ్రే సఖరోవ్ పేరు మీద ఈ అవార్డు ప్రతి సంవత్సరం అందిస్తారు. దీనిని 1988లో ప్రారంభించారు.
రైఫ్ బదావీ అనే ఓ సౌదీ పౌరుడిని ముస్లిం మత పెద్దలను కించపరిచేలా మాట్లాడారని ఆరోపణలతో జైలులో వేశారు. అతడికి పదేళ్ల జైలు శిక్షతోపాటు వెయ్యి సౌదీ రియాలను జరిమానా కూడా విధించింది. ప్రస్తుతం అతడు జైలులోనే ఉన్నాడు. రైఫ్కు ఈ అవార్డు ప్రకటించిన సందర్భంగా యూరోపియన్ పార్లమెంటు అధ్యక్షుడు మార్టిన్ షుంజ్ మాట్లాడుతూ 'నేను సౌదీ రాజుకు విన్నవిస్తున్నాను. రైఫ్ను వెంటనే విడిచిపెట్టాలని. అతడికి స్వేచ్ఛను ఇవ్వాలని. అలా చేయడం ద్వారా తాము ఇచ్చే గౌరవ బహుమతిని స్వీకరిస్తాడు' అని అన్నారు.
