సీమాంధ్రకు తీరని అన్యాయం

 రాష్ట్రం చేసిన పాపం ఏమిటి?

 33 మంది ఎంపీలను అందించి, కేంద్రంలో కాంగ్రెస్ పార్టీ అధికారంలో ఉండటానికి కృషి చేయడమే ఆంధ్ర ప్రజలు చేసుకున్న పాపమా? అని అంబటి ప్రశ్నించారు. వైఎస్ రాజశేఖరరెడ్డి నాయకత్వంలో 33 బంగారు గుడ్లు పెట్టిన బాతును కాంగ్రెస్ అధిష్టానం అర్ధాంతరంగా కోసుకొని తింటోందని ఆగ్రహం వ్యక్తం చేశారు. సీమాంధ్రకు తీరని అన్యాయం చేసిన కాంగ్రెస్ పార్టీలో ఉంటూ ఆ పార్టీ నేతలు ఉద్యమం ఎలా చేస్తారని సూటిగా ప్రశ్నించారు. చిత్తశుద్ధి కలిగిన నాయకులైతే ఆ పార్టీకి, పదవులకు రాజీనామా చేయాలని డిమాండ్ చేశారు. సీమాంధ్ర నేతలు మంత్రి పదవులకు కక్కుర్తి పడినందువల్లే ఈ దుస్థితి నెలకొందని మండిపడ్డారు. ఆ పార్టీ తీరని ద్రోహాన్ని తలపెడుతుంటే ఆ పార్టీ నేతలు ప్రజలను మభ్యపెట్టడానికి డ్రామాలు చేస్తున్నారని అంబటి ధ్వజమెత్తారు. ‘‘ఒకాయన బ్రహ్మాస్త్రం సంధిస్తానంటారు. మరొకరు న్యాయస్థానాలకు వెళతామంటారు. ఏమిటీ పిచ్చిమాటలు..’’ అని ఆగ్రహం వ్యక్తం చేశారు. చిత్తశుద్ధి ఉంటే కాంగ్రెస్‌కు రాజీనామా చేసి ఉద్యమంలోకి రావాలని పిలుపునిచ్చారు. 

 చంద్రబాబు కాంగ్రెస్‌లో ఉన్నారా? టీడీపీలో ఉన్నారా?

 రాష్ట్రానికి సంబంధించి సీడబ్ల్యూసీ చేసిన ప్రకటనకు కొనసాగింపుగానే టీడీపీ అధినేత చంద్రబాబు మాట్లాడారని అంబటి రాంబాబు పేర్కొన్నారు. కొత్త రాష్ట్ర రాజధానికి నాలుగున్నర లక్షల కోట్ల రూపాయలు అవసరమవుతాయని, వాటిని కేంద్రమే భరించాలని చెప్పడం విడ్డూరంగా ఉందన్నారు. రాష్ట్రాన్ని విభజించాలని లేఖ రాసిన సందర్భంలో చంద్రబాబు ఈ విషయాలను ఎందుకు ప్రస్తావించలేకపోయారని ప్రశ్నించారు. చంద్రబాబు ఏ ముఖం పెట్టుకొని ప్యాకేజీ గురించి మాట్లాడారని దుయ్యబట్టారు. చంద్రబాబు కాంగ్రెస్‌పార్టీలో ఉన్నారో టీడీపీలో ఉన్నారో చెప్పాలని ఎద్దేవా చేశారు. తెలుగు ప్రజల ఐక్యత కోసం ఎన్టీఆర్ ప్రయత్నిస్తే.. ఆయన వారసుడనని చంద్రబాబు చెప్పుకోవడం సిగ్గుచేటన్నారు. రాష్ట్రం ఇంత ఘోరంగా తయారవడానికి కారణం కాంగ్రెస్ పార్టీ, బాబేనని విమర్శించారు. 

 ఆ నేతలు ఏమయ్యారు?

 కేంద్రం డిసెంబర్ 9న ప్రకటన చేసిన తర్వాత మూకుమ్మడిగా రాజీనామాలు చేసేందుకు స్పీకర్ కార్యాలయం ముందు క్యూ కట్టిన కాంగ్రెస్, టీడీపీ నేతలు ఇప్పుడేమయ్యారని అంబటి ప్రశ్నించారు. జేడీ శీలం, కావూరి సాంబశివరావుకు మంత్రి పదవులు, రాయపాటికి పోలవరం ప్రాజెక్టు పనులు, లగడపాటిపై ఉన్న కేసులు ఎత్తేసే సరికి.. రాష్ట్రం ఏమైనా ఫరవాలేదనే విధంగా వ్యవహరిస్తున్నారని మండిపడ్డారు. కొందరు నేతల నోళ్లు మూయించి, వైఎస్ జగన్‌మోహన్‌రెడ్డిని అక్రమ కేసుల ద్వారా జైల్లో నిర్భందించి, రాష్ట్రాన్ని ముక్కలు చేయాలని కాంగ్రెస్ పార్టీ భావిస్తోందని దానికి ఆ పార్టీ తగిన మూల్యం చెల్లించక తప్పదని అంబటి హెచ్చరించారు. తెలంగాణకు తమ పార్టీ వ్యతిరేకం కాదని, అన్ని ప్రాంతాలకు న్యాయం జరగాలన్నదే మా కోరిక అని విలేకరులు అడిగిన ఒక ప్రశ్నకు బదులిచ్చారు. స్పష్టతలేనటువంటి విభజనను తాము వ్యతిరేకిస్తామని చెప్పారు.