పోడూరు: నల్లధనాన్ని మార్చేందుకు నిరాకరించిన ఓ చిరుద్యోగి జీవనోపాధి కోల్పోయిన ఘటన పశ్చిమ గోదావరి జిల్లా పాలకొల్లులో చోటుచేసుకుంది. పోడూరు మండలం జిన్నూరు నరసింహరావుపేట ప్రాంతానికి చెందిన ఓ యువకుడు పాలకొల్లు పట్టణంలోని ఓ పెట్రోల్ బంక్‌లో పనిచేసేవాడు. కేంద్ర ప్రభుత్వం పెద్ద నోట్లను రద్దు చేయడంతో బంక్ యజమానుల్లో ఒకరు తానిచ్చే రూ.2.35 లక్షల (రూ.500, రూ.1000 నోట్లు)ను ఆ ఉద్యోగి బ్యాంక్ ఖాతాలో వేసుకోవాల్సిందిగా సూచించాడు.
పరిస్థితులు చక్కబడిన అనంతరం ఆ మొత్తాన్ని బ్యాంక్ నుంచి డ్రా చేసి తనకు ఇవ్వాలని కోరాడు. అలా చేస్తే తనకు ఇబ్బంది కలుగుతుందని, దీనిపై ఆదాయ పన్ను శాఖ అధికారులు ఆరా తీస్తే చిక్కుల్లో పడతానని చెప్పిన సదరు చిరుద్యోగి ఆ సొమ్మును తన ఖాతాలో వేసేందుకు నిరాకరించాడు. దీంతో ఆ యజమాని అతడిని ఉద్యోగం నుంచి తొలగించారు. ఈ విషయం తెలిసి జిన్నూరు వాసులు ఆశ్చర్యానికి గురయ్యారు. ఇలా చేయడం అన్యాయమని వ్యాఖ్యానిస్తున్నారు.
