రౌద్రం రణం రుధిరం(ఆర్‌ఆర్‌ఆర్‌) తర్వాత తన తదుపరి చిత్రం టాలీవుడ్‌ సూపర్‌స్టార్‌ మహేశ్‌ బాబుతో ఉంటుందని దర్శకధీరుడు ఎస్‌ఎస్‌ రాజమౌళి స్పష్టం చేశారు. నిర్మాత కేఎల్‌ నారాయణ, మహేశ్‌, తన కాంబినేషన్‌లో ఓ సినిమా ఉంటుందని ఎప్పట్నుంచో చెబుతున్నానని, డీవీవీ దానయ్య చిత్రం తర్వాత ఆ ప్రాజెక్ట్‌ పట్టాలెక్కుతుందని అన్నారు. ఆర్‌ఆర్‌ఆర్‌ తర్వాత జక్కన్న ప్రభాస్‌తో మరో చిత్రం లేక ఈగ సీక్వెల్‌ చేస్తాడని సోషల్‌ మీడియాలో అనేక వార్తలు వస్తున్నాయి. అయితే తాజాగా ఓ ఛానల్‌కు ఇచ్చిన ఇంటర్వ్యూలో తన తదుపరి చిత్రం గురించి స్పష్టతనివ్వడంతో రూమర్స్‌కు చెక్‌ పడింది.
ఇక రాజమౌళి-మహేశ్‌ సినిమా కోసం సినీ అభిమానులు ఎంతో ఆత్రుతగా ఎదురుచూస్తున్న విషయం తెలిసిందే. అయితే ఈ కాంబినేషన్‌లో ఓ సినిమా ఉంటుందని అనధికారికంగా తెలిసినా.. ఇప్పటివరకు వీరిద్దరి నుంచి ఎలాంటి ప్రకటన రాలేదు. దీంతో ఈ సినిమాపై అనుమానాలు రేకెత్తాయి. అయితే ఆ అనుమానాలన్నింటినీ పటాపంచలు చేస్తూ మహేశ్‌ సినిమాపై దర్శకధీరుడు స్పష్టతనిచ్చాడు. ఈ సినిమాపై జక్కన్న తొలిసారి స్పందించడంతో మహేశ్‌ ఫ్యాన్స్ ఆనందానికి అవధులు లేకుండా పోయింది. అంతేకాకుండా మహేశ్‌ కోసం జక్కన్న ఏ కథను సిద్దం చేస్తున్నాడనే ఆసక్తిని కూడా కనబరుస్తున్నారు.
ఇక ప్రస్తుతం మెగాపవర్‌స్టార్‌ రామ్‌ చరణ్‌, యంగ్‌ టైగర్‌ ఎన్టీఆర్‌లు హీరోలుగా భారీ మల్టీస్టారర్‌ చిత్రం ‘ఆర్‌ఆర్‌ఆర్‌’ను రాజమౌళి తెరకెక్కిస్తున్న విషయం తెలిసిందే. చరణ్‌ బర్త్‌డే సందర్భంగా ‘భీమ్‌ ఫర్‌ రామరాజు’ పేరుతో విడుదలైన ప్రత్యేక వీడియోతో సినిమా ఏ రేంజ్‌లో ఉంటుందో ప్రేక్షకులకు అర్థమైపోయింది. ఇక మే 20న ఎన్టీఆర్‌ బర్త్‌డే సందర్భంగా మరొ సర్‌ప్రైజ్‌ ఉంటుందని ఫ్యాన్స్ ఆసక్తిగా ఎదురుచూస్తున్నారు. భారీ బడ్జెట్‌తో రూపొందుతున్న ఈ చిత్రాన్ని డీవీవీ దానయ్య నిర్మిస్తుండగా కీరవాణి సంగీతమందిస్తున్నాడు. మరోవైపు పరుశురామ్‌ దర్శకత్వంలో ఓ సినిమాను ప్లాన్‌ చేస్తున్నారు సూపర్‌స్టార్‌. ఈ సినిమాను వచ్చే సంక్రాంతి విడుదల చేయాలని భావిస్తున్నారు.
చదవండి:
సుధీర్‌ డ్యాన్స్‌ స్టెప్పులకు టైగర్‌ ఫిదా
10 కోట్ల వ్యూస్‌.. సంబరంలో మహేశ్‌ ఫ్యాన్స్
