రూ.11.50 లక్షలు
సాక్షి, హైదరాబాద్‌: లక్కీ నంబర్లపై వాహనదారులు మరోసారి తమ క్రేజ్‌ను చాటుకున్నారు. సోమవారం ఖైరతాబాద్‌లో నిర్వహించిన ఫ్యాన్సీ నంబర్ల వేలంలో ‘టీఎస్‌ 09 ఎఫ్‌జే 9999’నంబర్‌ కోసం హెటిరో డ్రగ్స్‌ సంస్థ ఏకంగా వేలంలో రూ.11,50,050 చెల్లించి సొంతం చేసుకుంది. ఈ సంస్థ తమ రూ.2.96 కోట్ల ఖరీదైన రేంజ్‌ రోవర్‌ 4.4 డీజిల్‌ ఎల్‌డబ్ల్యూబీ కోసం ఈ నంబర్‌ను దక్కించుకుంది. అలాగే ‘టీఎస్‌ 09 ఎఫ్‌కే 0006’నంబర్‌ కోసం ఎం.విజయ్‌కృష్ణ అనే వాహనదారుడు రూ.1.53 లక్షలు చెల్లించారు. తమ హ్యూందాయ్‌ కారు కోసం ఈ నంబర్‌ను వేలంలో గెలుచుకున్నారు. ‘టీఎస్‌ 09 ఎఫ్‌కే 0009’నంబర్‌ కోసం ఇంపార్టా ట్రైనింగ్‌ అకాడమీ రూ.1.26 లక్షలు చెల్లించి సొంతం చేసుకుంది. సోమవారం ఒక్క రోజు నిర్వహించిన ఫ్యాన్సీ నంబర్ల వేలంలో రూ.23,46,321 లభించినట్లు జేటీసీ పాండురంగ్‌నాయక్‌ తెలిపారు.
