హైదరాబాద్‌: పవన్‌ కల్యాణ్‌ తాజా సినిమా 'కాటమరాయుడు' ఎట్టకేలకు పట్టాలు ఎక్కబోతోంది. ఈ నెల 20 నుంచి ఈ సినిమా షూటింగ్‌ ప్రారంభం కానుంది. తమిళంలో సూపర్‌ హిట్‌ అయిన 'వీరమ్' సినిమా రీమేక్‌గా 'కాటమరాయుడు' వస్తున్న సంగతి తెలిసిందే.
'సినిమా ప్రధాన షూటింగ్‌ ఈ నెల 20న ప్రారంభం కానుంది. రాజకీయ కమిట్‌మెంట్ల నుంచి బయటపడి ఈ నెల 24 నుంచి పవన్‌ ఈ సినిమా షూటింగ్‌లో పాల్గొంటారు. మొదటి షెడ్యూల్‌ షూటింగ్‌ హైదరాబాద్‌లో జరగనుంది' అని చిత్ర యూనిట్‌కు సంబంధించిన అత్యంత విశ్వసనీయ వర్గాలు ఐఏఎన్‌ఎస్‌ వార్తాసంస్థకు తెలిపారు.
ఈ ఏడాది వచ్చిన సర్దార్‌ గబ్బర్‌ సింగ్‌ సినిమా ప్రేక్షకులను పెద్దగా ఆకట్టుకోలేదు. ఈ నేపథ్యంలో 'గోపాల గోపాల' ఫేం దర్శకుడు డాలీతో కలిసి జట్టు కట్టి పవన్‌ ప్రతిష్టాత్మకంగా ఈ సినిమా తెరకెక్కిస్తున్న సంగతి తెలిసిందే. పవన్‌, అతని సన్నిహితుడు శరత్ మరార్.. ఉమ్మడిగా ఈ సినిమాను నిర్మిస్తున్నారు. పవన్‌ సరసన కాజల్‌ మరోసారి నటించనుంది.
