సాక్షి ప్రతినిధి, గుంటూరు: మాచర్లలో జెండా పాతడమే లక్ష్యంగా తెలుగుదేశం పార్టీ చేసిన ఆపరేషన్‌కు పోలీసు ఉన్నతాధికారులు, సర్కిల్‌ అధికారులు అండగా నిలిచారు. పోలింగ్‌ రోజు, తదనంతరం అక్కడ జరుగుతున్న పరిణామాలపై ఎప్పటికప్పుడు ఫిర్యాదు చేస్తున్నా డీఐజీ గానీ, అప్పటి ఎస్పీ గానీ, కలెక్టర్‌గానీ స్పందించకపోవడం దీన్ని బలపరుస్తోంది. తెలుగుదేశం పార్టీ తమ సామాజిక వర్గం అధికంగా ఉన్న గ్రామాల్లో మొదటి నుంచి వ్యూహాత్మకంగా రిగ్గింగ్‌ చేయడానికి సన్నాహాలు చేసుకుంది. చివరి నిముషంలో అదే సామాజిక వర్గానికి చెందిన అధికారినీ తీసుకురావడంతో ఆ పార్టీ నేతలు మరింత రెచ్చిపోయారు. ఈ నేపథ్యంలోనే ఎన్నికల తర్వాత కూడా మాచర్ల రణరంగంగాన్ని తలపించింది. టీడీపీ కుట్రలు, కుయుక్తులపై వైఎస్సార్‌ సీపీ బృందం సోమవారం ఎన్నికల సంఘం నియమించిన స్పెషల్‌ ఇన్వెస్టిగేషన్‌ టీం(సిట్‌) అధినేత వినీత్‌ బ్రిజ్‌లాల్‌కు ఫిర్యాదు చేసింది.  ఫ్యాక్షన్‌ జూలు విదిల్చిన జూలకంటి  జూలకంటి బ్రహా్మనందరెడ్డిని టీడీపీ మాచర్ల ఇన్‌చార్జ్‌గా ప్రకటించినప్పటి నుంచి అక్కడ మళ్లీ ఫ్యాక్షన్‌  ఊపిరి పోసుకుంది. ఎప్పుడైతే ఆయనను టీడీపీ అభ్యరి్థగా ప్రకటించిందో అప్పటి నుంచి నియోజకవర్గంలో ఆయన సమస్యలు సృష్టించడం మొదలుపెట్టారు. మాచర్లను కైవసం చేసుకోవాలంటే పల్నాడు జిల్లాలో అప్పుడు ఉన్న ఐజీ, ఎస్పీ ఇతర అధికారులు ఉంటే సాధ్యం కాదని జూలకంటి, టీడీపీ అధినాయకులు గుర్తించారు. దీంతో వారు ఆ ఎస్పీని టార్గెట్‌గా చేసుకున్నారు. ఆయన ఉంటే బూత్‌ క్యాప్చర్, ఓటర్లను భయపెట్టడం కుదరని అభిప్రాయపడ్డారు. అప్పుడే పొత్తు పెట్టుకున్న బీజేపీ రాష్ట్ర అధ్యక్షురాలు దగ్గుబాటి పురంధరేశ్వరి ద్వారా పావులు కదిపారు. జిల్లాలో రెడ్డి, ఎస్సీ అధికారులు ఉంటే తమ పన్నాగం పారదని, వారిని మార్చాలని ఒత్తిడి తీసుకువచ్చారు. ఐజీ పాల్‌రాజ్‌ను బదిలీ చేసిన తర్వాత రాష్ట్ర ప్రభుత్వం ప్రతిపాదించకపోయినా గత తెలుగుదేశం ప్రభుత్వంలో చక్రం తిప్పిన ఒక అధికారికి సన్నిహితంగా ఉండే అధికారిని తీసుకువచ్చి పోస్టింగ్‌ ఇప్పించారు. పల్నాడు ఎస్పీగా గతంలో సెబ్‌ అడిషనల్‌ ఎస్పీగా పనిచేసిన  బింధుమాదవ్‌ను తీసుకువచ్చారు. వారు వచ్చిన తర్వాత కిందిస్థాయి సిబ్బందికి  తెలుగుదేశం నాయకులను టచ్‌ చేయ     వద్దంటూ మౌఖిక ఆదేశాలు వెళ్లాయి.పేట్రేగిపోయిన పచ్చమూకలు  11న రెంటచింతలకు వెళ్లిన సీఐ నారాయణ స్వామి తెలుగుదేశం నేతలకు మీ ఇష్టం వచ్చినట్లు ఎన్నిక నిర్వహించుకోండని చెప్పినట్లు సమాచారం. దీంతో టీడీపీ నేతలు పేట్రేగిపోయారు. అదేరోజున కారంపూడి మండలం వైఎస్సార్‌ సీపీ జేసీఎస్‌ కన్వీనర్‌ వెంకటేశ్వరరెడ్డిపై దాడి చేసి బెదిరించారు. వేపకంపల్లిలో తెలుగుదేశం నేతలు మహేష్‌ అనే వ్యక్తిపై ఆరోపణలు చేసి అతనిపై దాడి చేస్తే తొలుత ఒక హెడ్‌ కానిస్టేబుల్‌ను పంపారు. ఆ తర్వాత సీఐ వెళ్లి  మహేష్ ను కరెంట్‌ స్తంభానికి కట్టేయించి అవమానించారు. 12న రెంటచింతలలో నారాయణస్వామి ఉండగానే తెలుగుదేశం నేతలు మోర్తాల ఉమా మహేశ్వరరెడ్డిపై దాడి  చేశారు. రెంటచింతల మండలం పాల్వయిగేట్‌ పోలింగ్‌ స్టేషన్‌ 201, 202 వద్ద టీడీపీ నేతలు వైఎస్సార్‌ సీపీ ఏజెంట్లనూ అనుమతించలేదు. తొమ్మిది గంటల ప్రాంతంలో ఐజీ శ్రీకాంత్‌ జోక్యంతో ఏజెంట్లను అనుమతించారు. జెట్టిపాలెంలో 214, 217 పోలింగ్‌ బూత్‌లలోకి ఎస్సీ, ఎస్టీ, బీసీ ఓటర్లను అనుమతించలేదు.  దీనిపై  గ్రామస్తులు ప్రశ్నించినప్పుడు సీఐ నారాయణస్వామి వచ్చి వైఎస్సార్‌ సీపీ ఏజెంట్లను భయపెట్టి బయటకు పంపారని గ్రామస్తులు చెబుతున్నారు.  తుమృకోటలో టీడీపీ రిగ్గింగ్‌కు పాల్పడినప్పుడు ఇరువర్గాల మధ్య ఘర్షణ జరిగింది. ఈవీఎంలూ ధ్వంసమయ్యాయి. ఆ తర్వాత  కొత్త ఈవీఎంలు పెట్టి వైఎస్సార్‌ సీపీ ఏజెంట్లు లేకుండానే ఎన్నిక కొనసాగించారు. వెల్దుర్తిలోని 137, 138, 139, 140, 141 పోలింగ్‌ స్టేషన్లలో రాత్రి ఏడు గంటల తర్వాత వైఎస్సార్‌ సీపీ ఏజెంట్లను బయటకు పంపి రిగ్గింగ్‌ చేశారు. దీనిపై ఎస్పీకి ఫిరాదు చేసినా స్పందించలేదు. ఒప్పిచర్లలో 250, 251, 252, 256 పోలింగ్‌ స్టేషన్లలో ఇతర సామాజిక వర్గాల వారు ఓటు వేసుకోలేని పరిస్థితి నెలకొంది.‘నారా’యణస్వామి భక్తి కారంపూడి సర్కిల్‌లో కారంపూడి, రెంటచింతల, దుర్గి పోలీసుస్టేషన్లు ఉన్నాయి ఇక్కడ బీసీ వర్గానికి చెందిన సీఐ చినమల్లయ్య సమర్థంగా విధులు నిర్వహించారు. ఆయనను అర్ధంతరంగా ఎన్నికల ముందు బదిలీ చేశారు. ఆయన స్థానంలో తమ సామాజిక వర్గానికి చెందిన నారాయణస్వామిని  తెలుగుదేశం నాయకులు తీసుకువచ్చి పోస్టింగ్‌ ఇప్పించుకున్నారు. ఆయన వచ్చీ రాగానే తన సామాజిక వర్గ నాయకులకు పగ్గాలు ఇచ్చేశారు. ఎన్నికల్లో మీరు ఎలాగైనా పనిచేసుకోవచ్చని తెలుగుదేశం పార్టీలోని నాయకులకు అభయం ఇచ్చేశారు. ఆయన ఫోన్‌ కాల్, వాట్సప్, ఫేస్‌టైమ్‌ డేటాను పరిశీలిస్తే ఆయన తెలుగుదేశం పార్టీకి ఏ విధంగా పని చేసింది అర్థమవుతుందని  వైఎస్సార్‌ సీపీ బృందం తన ఫిర్యాదులో పేర్కొంది.వెల్దుర్తి పరిధిలో కొందరు టీడీపీ నేతలు పోలీసు కానిస్టేబుళ్ల మీద చేయి చేసుకున్నట్లు ఫిర్యాదు రిజిస్టర్‌ అయినా దాడి చేసిన వారిని కనీసం స్టేషన్‌కు కూడా పిలవలేదు. ఎన్నికల ముందు బైండోవర్‌ కూడా చేయలేదు. ఎన్నికలకు మూడు రోజుల ముందు ఎమ్మెల్యే పిన్నెల్లి రామకృష్ణారెడ్డి  భార్య శిరిగిరిపాడు గ్రామంలో ప్రచారం చేస్తుండగా ఆమెపై దాడి చేశారు. బందోబస్తుగా వచ్చిన ఎస్‌ఐ ఇతర పోలీసు సిబ్బందిపై కూడా తెలుగుదేశం నేతలు దాడి చేశారు.  దీనిపై రెండు ఫిర్యాదులు వచ్చినా దాడి చేసిన వారిని ఎవరినీ పోలీసుస్టేషన్‌కు పిలవలేదు. పైగా బాధితుడైన ఎస్‌ఐతోపాటు కారంపూడి, మాచర్ల టౌన్‌ సీఐలను బదిలీ చేశారు.  దీంతో పోలీసుల్లో అభద్రతా భావం ఏర్పడింది.  దీన్ని అడ్డం పెట్టుకుని తెలుగుదేశం నాయకులు గ్రామాల్లో రెచ్చిపోయారు. రెంటచింతలలో సుమారు రెండు లక్షల హోలోగ్రామ్‌ ఉన్న ఓటర్‌ స్లిప్‌లను స్వాధీనం చేసుకుంటే  కలెక్టర్‌ చర్యలు తీసుకోకపోగా బస్‌ను కూడా సీజ్‌ చేయకుండా వదిలేశారు. ఈ మొత్తం వ్యవహారంలో ఎస్పీ బిందుమాధవ్‌తోపాటు కొంతమంది అధికారులపై ఎన్నికల సంఘం చర్యలు తీసుకున్నా.. ఎన్నికల్లో ఏకపక్షంగా వ్యవహరించిన మరికొందరు అధికారులను కొనసాగించడంపై విమర్శలు వెల్లువెత్తుతున్నాయి. 

సాక్షి, అనంతపురం: రాయదుర్గంలో ఎన్ఐఏ దాడులు కలకలం రేపాయి. సోహైల్ అనే ప్రైవేట్ ఉద్యోగిని ఎన్ఐఏ అధికారులు అదుపులోకి తీసుకున్నారు. నాగుల బావి వీధిలో రిటైర్ హెడ్ మాస్టర్ అబ్దుల్ ఇంట్లో ఎన్ఐఏ అధికారులు  తనిఖీలు చేపట్టారు.అబ్దుల్ తనయుడు సోహైల్‌ను అదుపులోకి తీసుకున్న ఎన్ఐఏ.. ఉగ్రవాదులతో లింకులపై ఆరా తీస్తోంది. అబ్దుల్‌ ఇద్దరు కుమారులు బెంగళూరులో నివాసముంటున్నారు. గత కొంతకాలంగా వారిద్దరూ కనిపించకపోవడంతో ఎన్‌ఐఎ అధికారులు అనుమానం వ్యక్తం చేస్తున్నారు. 

● సందేహాలుంటే అధికారులను సంప్రదించాలి ● కలెక్టర్‌ నివాస్‌కాకినాడ సిటీ: పోలింగ్‌ అనంతరం ఈవీఎంలు భద్రపరచిన స్ట్రాంగ్‌ రూముల భద్రతను నిరంతరం పర్యవేక్షిస్తున్నామని జిల్లా ఎన్నికల అధికారి, కలెక్టర్‌ జె.నివాస్‌ తెలిపారు. జేఎన్‌టీయూకేలోని డాక్టర్‌ బీఆర్‌ అంబేడ్కర్‌ సెంట్రల్‌ లైబ్రరీలో ఈవీఎంలను భద్రపరిచిన స్ట్రాంగ్‌ రూమును, స్టూడెంట్స్‌ క్యాంటీన్‌పై ఏర్పాటు చేసిన సీసీ టీవీ కెమెరాల కంట్రోల్‌ రూమును ఎస్పీ ఎస్‌.సతీష్‌కుమార్‌, రిటర్నింగ్‌ అధికారుల(ఆర్‌ఓ)తో కలిసి సోమవారం ఆయన పరిశీలించారు. స్ట్రాంగ్‌ రూ ముల భద్రత వివరాలు అడిగి తెలుసుకున్నారు. ఈ సందర్భంగా మాట్లాడుతూ, జిల్లాకు సంబంధించిన ఒక లోక్‌సభ, ఏడు అసెంబ్లీ నియోజకవర్గాల ఈవీఎంలు, ఇతర పోలింగ్‌ సామగ్రిని వర్సిటీలోని స్ట్రాంగ్‌ రూముల్లో సురక్షితంగా భద్రపరిచామని తెలిపారు. వీటికి రాజకీయ పార్టీల అభ్యర్థులు, ఏజెంట్ల సమక్షంలో సీలు వేశామన్నారు. స్ట్రాంగ్‌ రూములను నిరంతరం సీసీ కెమెరాలతో పర్యవేక్షిస్తున్నామని చెప్పారు. స్ట్రాంగ్‌ రూముల భద్రతను పోటీ చేసిన అభ్యర్థులు, ఏజెంట్లు పరిశీలించేందుకు వీలుగా స్టూడెంట్స్‌ క్యాంటీన్‌ పైన ఉన్న యోగా సెంటర్‌లో సీసీ టీవీ కెమెరాల కంట్రోల్‌ రూము ఏర్పాటు చేశామని తెలిపారు. స్ట్రాంగ్‌ రూముల భద్రతను ఆయా ఆర్‌ఓలతో పాటు షిఫ్ట్‌ల పద్ధతిలో ఒక గెజిటెడ్‌ అధికారి, ఒక పోలీస్‌ అధికారి, ఇతర సిబ్బంది నిత్యం పర్యవేక్షిస్తున్నారని వివరించారు. స్ట్రాంగ్‌ రూముల భద్రతపై సందేహాలుంటే ఆయా అభ్యర్థులు, ఏజెంట్లు నేరుగా అధికారులను సంప్రదించవచ్చని తెలిపారు. ఓట్ల లెక్కింపునకు పకడ్బందీ ఏర్పాట్లు వచ్చే నెల 4న జరిగే ఓట్ల లెక్కింపునకు పకడ్బందీ ఏర్పాట్లు చేస్తున్నామని కలెక్టర్‌ నివాస్‌ చెప్పారు. ఆ రోజున రాజకీయ పార్టీల ప్రతినిధులు, ఏజెంట్ల వాహనాల పార్కింగ్‌, పాస్‌లు తదితర అంశాలపై పూర్తి సమాచారం తెలియజేస్తామని తెలిపారు. పాస్‌లు ఉన్నవారికి మాత్రమే లోపలకు అనుమతి ఉంటుందన్నారు. ఓట్ల లెక్కింపు అనంతరం గెలుపొందిన అభ్యర్థులు ఎటువంటి విజయోత్సవ ర్యాలీలు నిర్వహించడానికి వీలు లేదని స్పష్టం చేశారు. ఎవరైనా నిబంధనలకు విరుద్ధంగా ప్రవర్తిస్తే కఠిన చర్యలు తీసుకుంటామని కలెక్టర్‌ హెచ్చరించారు. బందోబస్తు కట్టుదిట్టం ఓట్ల లెక్కింపు సందర్భంగా జిల్లాలో ఎటువంటి అవాంఛనీయ సంఘటనలూ చోటు చేసుకోకుండా కట్టుదిట్టమైన బందోబస్తు నిర్వహిస్తున్నామని ఎస్పీ సతీష్‌ కుమార్‌ తెలిపారు. జేఎన్‌టీయూకేలోని స్ట్రాంగ్‌ రూముల వద్ద మూడంచెల భద్రత ఏర్పాటు చేశామన్నారు. డీఎస్పీ, సీఐ, ఎస్సై ర్యాంక్‌ అధికారులతో పాటు మరో ముగ్గురు అధికారులు సమన్వయ లోపం లేకుండా స్ట్రాంగ్‌ రూముల భద్రతను పర్యవేక్షిస్తున్నారని వివరించారు. ఓట్ల లెక్కింపు తర్వాత విజయోత్సవ ర్యాలీలు జరిపితే కఠిన చర్యలు తీసుకుంటామని, కేసులు నమోదు చేస్తామని స్పష్టం చేశారు. కార్యక్రమంలో కాకినాడ సిటీ ఆర్‌ఓ జె.వెంకటరావు తదితరులు పాల్గొన్నారు.

కలెక్టరేట్‌ వద్ద విద్యార్థుల ఆందోళన కాకినాడ సిటీ: తాము ఒక కోర్సు చదివితే, కాకినాడ పైడా కళాశాలలో (పీవీఆర్‌ ట్రస్ట్‌) మరో కోర్సుకు సర్టిఫికెట్‌ ఇస్తున్నారని, దీనివల్ల తాము చదివిన చదువుకు అర్థం లేకుండా పోయిందని, యాజమాన్యంపై చర్యలు తీసుకోవాలని కోరుతూ ఆ కళాశాల విద్యార్థులు జిల్లా కలెక్టర్‌ జె.నివాస్‌కు సోమవారం వినతిపత్రం అందజేశారు. పీవీఆర్‌ ట్రస్ట్‌ డిగ్రీ కాలేజీకి చెందిన తామంతా బీఎస్సీ కోర్సు చేస్తే వారు ఒకేషనల్‌ కోర్సు సర్టిఫికెట్‌ అందిస్తున్నారని వివరించారు. మూడేళ్లుగా ఒక్కొక్కరం రూ.3.5 లక్షల చొప్పున ఫీజు చెల్లించి చదువుకున్నామన్నారు. తమ ముందు బ్యాచ్‌ విద్యార్థులు బీఎస్సీ చదివితే వారికీ ఒకేషనల్‌ కోర్సు చేసినట్లు సర్టిఫికెట్‌ ఇచ్చారని, ఇప్పుడు ఆ సర్టిఫికెట్‌ చెల్లదని వైద్య, ఆరోగ్య శాఖ చెప్పడంతో వారికి తీరని నష్టం కలిగిందని పేర్కొన్నారు. తమకు కూడా నష్టం జరుగుతుందేమోననే భయంతో కళాశాల యాజమాన్యాన్ని అడిగితే నిర్లక్ష్యంగా సమాధానం చెబుతున్నారని విద్యార్థులు ఆవేదన వ్యక్తం చేశారు. ఈ విషయంపై తక్షణమే చర్యలు తీసుకోవాలని కలెక్టర్‌కు విజ్ఞప్తి చేశారు. కాగా, విద్యార్థుల సమస్యను బీజేపీ నేతలు గట్టి సత్యనారాయణ, చిలుకూరి రామ్‌కుమార్‌ తదితరులు అడిగి తెలుసుకున్నారు. వారికి న్యాయం చేసేందుకు తమ వంతు కృషి చేస్తామని హామీ ఇచ్చారు.

కాకినాడ సిటీ: వచ్చే నెల 4న జరిగే ఓట్ల లెక్కింపు అనంతరం నిర్వహించే విజయోత్సవ ర్యాలీల సందర్భంగా అభ్యర్థులు, రాజకీయ పార్టీలు జేఎన్‌టీయూకే వద్ద, జిల్లాలో రెడ్‌ జోన్స్‌గా గుర్తించిన ప్రాంతాల్లో వీడియోలు, ఫొటోలు తీసేందుకు డ్రోన్‌లు వినియోగించరాదని జిల్లా ఎన్నికల అధికారి, కలెక్టర్‌ జె.నివాస్‌ తెలిపారు. ఈ ఆదేశాలను అందరూ కచ్చితంగా పాటించాలన్నారు. జిల్లాలో వచ్చే నెల 6వ తేదీ వరకూ ఎటువంటి డ్రోన్‌ కెమెరాలూ వినియోగించరాదని స్పష్టం చేశారు. ఈ నిబంధనను అతిక్రమించిన వారిపై ఎన్నికల నిబంధనల ప్రకారం కఠిన చర్యలు తీసుకుంటామని హెచ్చరించారు. ఎన్నికల నిర్వహణ సామగ్రి భద్రత, శాంతిభద్రతల పరిరక్షణ కోసం ఈ నిర్ణయం తీసుకున్నామని తెలిపారు. ఈఏపీ సెట్‌కు 97.67శాతం హాజరు బాలాజీ చెరువు (కాకినాడ సిటీ): జిల్లాలో ఏర్పాటు చేసిన మూడు కేంద్రాల్లో ఏపీ ఈఏపీ సెట్‌ సోమవారం ప్రశాంతంగా జరిగింది. ఈ ఆన్‌లైన్‌ పరీక్షకు ఉదయం 1,079 హాజరవగా 33 మంది గైర్హాజరయ్యారు. మధ్యాహ్నం నిర్వహించిన పరీక్షకు 2,176 మంది హాజరు కాగా, 52 మంది గైర్హాజరయ్యారని సెట్‌ కన్వీనర్‌ వెంకటరెడ్డి తెలిపారు. రాష్ట్ర వ్యాప్తంగా 28,899 మంది హాజరు కాగా 1,778 మంది పరీక్ష రాయలేదని వివరించారు. ముద్రగడను కలసిన వైఎస్సార్‌ సీపీ నాయకులు కిర్లంపూడి: కాపు ఉద్యమ నేత, వైఎస్సార్‌ సీపీ నాయకుడు ముద్రగడ పద్మనాభం, ఆయన కుమారుడు గిరిబాబును పలువురు వైఎస్సార్‌ సీపీ నాయకులు, కార్యకర్తలు మర్యాద పూర్వకంగా కలిశారు. ప్రత్తిపాడు నియోజకవర్గం ఒమ్మంగి నుంచి సుమారు 150 మంది గ్రామస్తులు, కిర్లంపూడి, జగపతినగరం, వేలంక గ్రామాలకు చెందిన పలువురు వైఎస్సార్‌ సీపీ నాయకులు, కార్యకర్తలు సోమవారం కిర్లంపూడిలోని ముద్రగడ నివాసానికి చేరుకున్నారు. ఈ సందర్భంగా వారిని ఈ నెల 13న ఆయా గ్రామాల్లో జరిగిన ఎన్నికల తీరు, వైఎస్సార్‌ సీపీకి నమోదైన ఓటింగ్‌ వివరాలను ముద్రగడ అడిగి తెలుసుకున్నారు. ఎన్నికల సమయంలో వైఎస్సార్‌ సీపీ కార్యకర్తలపై ప్రతిపక్షాలు చేసిన దాడులను పలువురు ముద్రగడ దృష్టికి తీసుకుని వచ్చారు. జంతు సంరక్షణ చట్టాల అమలుకు నోడల్‌ అధికారి కాకినాడ క్రైం: హైకోర్టు ఆదేశాల మేరకు జంతు సంరక్షణ చట్టాల అమలుకు జిల్లా ప్రత్యేక నోడల్‌ అధికారిగా అదనపు ఎస్పీ ఎంజేవీ భాస్కరరావును నియమిస్తూ ఎస్పీ ఎస్‌.సతీష్‌ కుమార్‌ సోమవారం ఉత్తర్వులు జారీ చేశారు. జంతు అక్రమ రవాణా, అక్రమ వధ వంటి అంశాల్లో ఎటువంటి సమాచారం అందినా ప్రజలు నేరుగా 94407 96501 నంబరుకు ఫోన్‌ చేసి, నోడల్‌ అధికారికి తెలియజేయాలని ఎస్పీ కోరారు. ఫిర్యాదు చేసిన వారి వివరాలు గోప్యంగా ఉంచుతామన్నారు. కొబ్బరి కొనుగోలు కేంద్రాల ఏర్పాటుకు చర్యలు అంబాజీపేట: సంక్షోభంలో ఉన్న కొబ్బరి రైతులను ఆదుకునేందుకు నాఫెడ్‌ ఆధ్వర్యంలో కొనుగోలు కేంద్రాలు ప్రారంభించేందుకు కేంద్ర ప్రభుత్వం చర్యలు తీసుకొంది. ఈ మేరకు కేంద్ర వ్యవసాయ, రైతు సంక్షేమ డిప్యూటీ కార్యదర్శి సంజయ్‌కుమార్‌ సోమవారం ఆదేశాలు జారీ చేసినట్టు ఆయిల్‌ఫెడ్‌ మేనేజర్‌ యు.సుధాకరరావు తెలిపారు. ఈ నెల 15న రాష్ట్ర ప్రభుత్వం రాసిన లేఖ ఆధారంగా 8 వేల మెట్రిక్‌ టన్నుల మిల్లింగ్‌ కోప్రాను 6 నెలల వ్యవధిలో కొనుగోలు చేయనున్నట్టు పేర్కొన్నారు. గత ఏడాది బాల్‌ కోప్రాను రూ.11,750కు కొనుగోలు చేయగా ప్రస్తుతం రూ.12 వేలకు కొనుగోలు చేస్తారన్నారు. మిల్లింగ్‌ కోప్రాను రూ.10,860కు గత ఏడాది కొనుగోలు చేయగా ఈ ఏడాది రూ.11,120కు కొనుగోలు చేస్తారని వివరించారు. రాష్ట్రంలో ఎన్నికల కోడ్‌ అమలులో ఉన్నందున అవసరమైన అనుమతులు తీసుకున్న తరువాతే కొనుగోలు తేదీ ప్రకటించాలని సంజయ్‌కుమార్‌ సూచించారు. కొనుగోలు కేంద్రం ప్రారంభించే ముందు కేంద్ర నోడల్‌ ఏజెన్సీ అన్ని రకాల వసతులూ పరిశీలించి తగిన నివేదిక రూపొందించాలని సూచించారు. ఇందుకు సంబంధించిన జీఓ కాపీని రాష్ట్ర హార్టికల్చర్‌ కమిషనర్‌ శ్రీధర్‌కు పంపినట్లు సంజయ్‌కుమార్‌ ఉత్తర్వులలో పేర్కొన్నారు.