భద్రాచలం: శ్రీ సీతారామ చంద్రస్వామి దేవస్థానంలో శుక్రవారం అంతరాలయంలోని మూలమూర్తులు స్వర్ణ కవచధారులై భక్తులకు దర్శనమిచ్చారు. తొలుత తెల్లవారుజామున గర్భగుడిలో స్వామి వారికి సుప్రభాత సేవ, సేవాకాలం, ఆరాధన తదితర పూజలు చేశారు. అనంతరం నిత్యకల్యాణానికి బేడా మండపంలో కొలువుదీరిన స్వామి వారికి విష్వక్సేన పూజ, పుణ్యావాచనం చేశారు. స్వామివారికి కంకణధారణ, యజ్ఞోపవీత ధారణ, అమ్మవారికి కంకణ, యోక్త్రధారణ గావించి నిత్యకల్యాణ ఘట్టాన్ని ఆలయ అర్చకులు శాస్త్రోక్తంగా జరిపారు. భక్తులు స్వామివారిని దర్శించుకుని తీర్థ ప్రసాదాలను స్వీకరించారు. అదేవిధంగా శుక్రవారం సందర్భంగా శ్రీ లక్ష్మీతాయారు అమ్మవారి ఆలయంలో అభిషేకం, ప్రత్యేక పూజలను గావించారు.

సూపర్‌బజార్‌(కొత్తగూడెం): ఈ నెల 13న జరిగే లోక్‌సభ ఎన్నికలకు కట్టుదిట్టమైన భద్రతా ఏర్పాటు చేసినట్లు జిల్లా ఎన్నికల అధికారి, కలెక్టర్‌ డాక్టర్‌ ప్రియాంక ఆల తెలిపారు. పార్లమెంట్‌ ఎన్నికల నిర్వహణపై రాష్ట్ర ప్రధాన ఎన్నికల అధికారి వికాస్‌రాజ్‌ శుక్రవారం నిర్వహించిన వీడియో కాన్ఫరెన్స్‌కు ఆమె హాజరయ్యారు. అనంతరం జిల్లా అదనపు కలెక్టర్‌ వేణుగోపాల్‌తో కలిసి అధికారులతో నిర్వహించిన సమావేశంలో మాట్లాడారు. మాక్‌ పోలింగ్‌ నివేదిక, ప్రతి రెండు గంటలకు పోలింగ్‌ శాతం నివేదికలు సకాలంలో అందేలా చర్యలు తీసుకోవాలన్నారు. ఈవీఎం యంత్రాలు తరలించే సమయంలో అప్రమత్తంగా ఉండాలన్నారు. డిస్ట్రిబ్యూషన్‌, రిసెప్షన్‌ కేంద్రం వద్ద అవసరమైన టేబుళ్లు ఏర్పాటు చేయాలని, ప్రతి టేబుల్‌ వద్ద పోలింగ్‌ కేంద్రాల వివరాలు స్పష్టంగా తెలియజేయాలని వివరించారు. పోలింగ్‌ కేంద్రంలో ఈవీఎం యంత్రాలు మరమ్మతులకు గురైనప్పుడు మాత్రమే సెక్టార్‌ అధికారులు తమ వద్ద ఉన్న ఈవీఎం యంత్రాలను రీప్లేస్‌ చేయాలన్నారు. ఓటింగ్‌ పూర్తయ్యాక స్ట్రాంగ్‌ రూంకు ఈవిఎం యంత్రాల తరలింపునకు వాహనాలను సిద్ధం చేయాలని వివరించారు. సహాయ రిటర్నింగ్‌ అధికారులు మధు, దామోదర్‌రావు, కాశయ్య, ఎన్నికల సూపరింటెండెంట్‌ దారా ప్రసాద్‌ పాల్గొన్నారు. పాఠశాల గదుల నుంచే ఎన్నికల సామగ్రి పంపిణీ ఇల్లెందు: అకాల వర్ష సూచనల నేపథ్యంలో ఎన్నికల సామగ్రిని గ్రౌండ్‌ నుంచి కాకుండా పాఠశాల గదుల నుంచే పంపిణీ చేయాలని జిల్లా ఎన్నికల అధికారి, కలెక్టర్‌ ప్రియాంక ఆల సూచించారు. శుక్రవారం ఇల్లెందు సింగరేణి స్కూల్‌లోని స్ట్రాంగ్‌ రూంలను ఆమె పరిశీలించి మాట్లాడారు. 12న నిర్ణీత సమయానికి మెటీరియల్‌ పంపిణీ ప్రారంభించాలన్నారు. సహాయ ఎన్నికల అధికారి జె.కాశయ్య, తహసీల్దార్‌ రవికుమార్‌, ఆర్‌ఐ పద్మ ఉన్నారు.

మహబూబాబాద్‌ ఎంపీ అభ్యర్థి మాలోత్‌ కవితమణుగూరు రూరల్‌ : రాష్ట్ర అభివృద్ధి, ప్రజా సంక్షేమం బీఆర్‌ఎస్‌తోనే సాధ్యమని ఆ పార్టీ మహబూబాబాద్‌ పార్లమెంట్‌ అభ్యర్థి మాలోత్‌ కవిత పేర్కొన్నారు. శుక్రవారం మణుగూరు పట్టణంలో గులాబీ శ్రేణులు భారీ ర్యాలీ నిర్వహించాయి. అనంతరం అంబేద్కర్‌ సెంటర్‌లో ఏర్పాటు చేసిన కార్నర్‌ మీటింగ్‌లో ఎంపీ అభ్యర్థి కవిత మాట్లాడారు. కాంగ్రెస్‌ మరోసారి ప్రజలను హామీలతో మభ్యపెడుతోందని ఆరోపించారు. కాంగ్రెస్‌ అధికారంలోకి వచ్చిన ఐదు నెలల్లోనే ప్రజల్లో వ్యతిరేకత మొదలైందన్నారు. రూ.2 లక్షల రుణమాఫీ, ప్రతీ మహిళకు నెలకు రూ.2500 హామీల ఊసే ఎత్తడంలేదన్నారు. బీఆర్‌ఎస్‌ అధినేత కేసీఆర్‌ బస్సు యాత్ర చేస్తుంటే కాంగ్రెస్‌ ప్రభుత్వం పథకాలను విడుదల చేస్తోందన్నారు. హామీలను అమలు చేయకుండా కాలయాపన చేస్తున్న కాంగ్రెస్‌ ప్రభుత్వానికి పార్లమెంట్‌ ఎన్నికల్లో ఓటు ద్వారా బుద్ధి చెప్పాలన్నారు. 13న జరిగే ఎన్నికల్లో కారు గుర్తుకు ఓటేసి తనను ఎంపీగా గెలిపించాలని కోరారు. బీఆర్‌ఎస్‌ జిల్లా ఽఅధ్యక్షుడు, మాజీ ఎమ్మెల్యే రేగా కాంతారావు మాట్లాడుతూ తెలంగాణ రాష్ట్రం అన్ని రకాలుగా అభివృద్ధి చెంది సుభిక్షంగా ఉందంటే మాజీ సీఎం కేసీఆర్‌ వల్లనేనని అన్నారు. పార్లమెంట్‌ ఎన్నికల్లో కవితను అత్యధిక మెజారిటీతో గెలిపించాలని కోరారు. ఈ కార్యక్రమంలో మణుగూరు జెడ్పీటీసీ పోశం నర్సింహారావు, బీఆర్‌ఎస్‌ జిల్లా నాయకులు కోలేటి భవానిశంకర్‌, మండల,పట్టణ అధ్యక్షులు ముత్యంబాబు, అడపా అప్పారావు, నాయకులు బొలిశెట్టి నవీన్‌, రామిడి రామిరెడ్డి, వట్టం రాంబాబు, యాదగిరిగౌడ్‌, మేకల రవి, మహిళా నాయకులు, యువజన నాయకులు, కార్యకర్తలు తదితరులు పాల్గొన్నారు.

మణుగూరు టౌన్‌: కష్టజీవుల కోసం నిర్మించిన ప్రభుత్వ సంస్థలను కాపాడుకోవాలంటే కేంద్రంలో కాంగ్రెస్‌ అధికారంలోకి రావాలని రాష్ట్ర వ్యవసాయ శాఖ మంత్రి తుమ్మల నాగేశ్వరరావు పేర్కొన్నారు. మహబూబాబాద్‌ ఎంపీ అభ్యర్థి బలరాం నాయక్‌ గెలుపును కాంక్షిస్తూ శుక్రవారం మణుగూరులో బైక్‌ ర్యాలీ నిర్వహించారు. అనంతరం ఏర్పాటు చేసిన కార్నర్‌ మీటింగ్‌లో మాట్లాడారు. తెలంగాణ రాష్ట్రం అభివృద్ధిలో నవంబర్‌ వన్‌ స్థానంలో నిలవాలంటే మెజారిటీ పార్లమెంట్‌ సీట్లు గెలిపించుకోవాలన్నారు. రాష్ట్రంలో అధికారంలో ఉన్నామని ఆదమరిస్తే భవిష్యత్‌లో ఇబ్బందులు ఎదురవుతాయని పేర్కొన్నారు. సింగరేణిని ప్రైవేటీకరణ నుంచి కాపాడుకుంటామన్నారు. పినపాక నియోజకవర్గంలోని సింగరేణి కార్మికుల, పవర్‌ ప్రాజెక్ట్‌ సమస్యలు, పులుసుబొంత అనుమతులు, అటవీ అనుమతులు, పోడు భూముల సమస్యలు పరిష్కరించుకోవాలంటే హస్తం గుర్తుకు ఓటేసి బలరాం నాయక్‌ను గెలిపించాలన్నారు. బీజేపీ ప్రభుత్వం సింగరేణిని ప్రైవేటీకరణకు టెండరింగ్‌ పిలవడంతో పాటు ఎయిర్‌లైన్స్‌ను అమ్మేసిందని ఆరోపించారు. ఎంపీ అభ్యర్థి బలరాం నాయక్‌ మాట్లాడుతూ తాను ఎంపీగా పని చేసిన సమయంలో రూ. కోట్ల వ్యయంతో అభివృద్ధి పనులు చేపట్టామన్నారు. ఎమ్మెల్యే పాయం వెంకటేశ్వర్లు మాట్లాడుతూ బీజేపీ, బీఆర్‌ఎస్‌ ఎత్తులను తిప్పికొట్టాలంటే కేంద్రంలో కాంగ్రెస్‌ ప్రభుత్వం రావాలన్నారు. ఈ సమావేశంలో మిత్రపక్షాల నాయకులు సరెడ్డి పుల్లారెడ్డి, వాసిరెడ్డి చలపతిరావు, నైనారపు నాగేశ్వరరావు, బట్టా విజయ్‌గాంధీ, కాంగ్రెస్‌ నియోజకవర్గ ఇన్‌చార్జి కాటబోయిన నాగేశ్వరరావు, ఐఎన్‌టీయూసీ కృష్ణంరాజు, మండల అధ్యక్షుడు పిరినాకి నవీన్‌, శివ, సామా శ్రీనివాసరెడ్డి, గణేశ్‌రెడ్డి, సుబ్బారెడ్డి, పల్లపు తిరుమలేశ్‌, గాండ్ల సురేశ్‌, ఎన్‌ఎస్‌యూఐ ఆరిఫ్‌పాషా పాల్గొన్నారు.రాష్ట్ర మంత్రి తుమ్మల నాగేశ్వరరావు

మణుగూరురూరల్‌: లోక్‌సభ ఎన్నికల్లో మహబూబాబాద్‌ నియోజకవర్గ ప్రజలు ఓసారి బీజేపీకి అవకాశం ఇవ్వాలని, తద్వారా సమగ్రాభివృద్ధి సాధ్యమవుతుందని ఆ పార్టీ అభ్యర్థి అజ్మీరా సీతారాంనాయక్‌ కోరారు. మణుగూరు పట్టణంలో శుక్రవారం ఆయన పార్టీ శ్రేణులు, కార్యకర్తలతో కలిసి రోడ్‌షో నిర్వహించారు. ఈ సందర్భంగా మహిళల కొమ్ము నృత్యాలు, బిందెలతో ప్రదర్శన ఆకర్షించాయి. తొలు త అంబేడ్కర్‌, కొమురం భీమ్‌ విగ్రహాల వద్ద నివాళులర్పించిన సీతారాంనాయక్‌ మాట్లాడుతూ.. బీఆర్‌ఎస్‌ కుటుంబ పాలన సాగిస్తే.. ప్రస్తుత కాంగ్రెస్‌ ప్రభుత్వం అబద్ధపు మాటలు, అలవి కాని హామీలతో ప్రజలను మోసం చేస్తోందని విమర్శించారు. కానీ, ప్రధానమంత్రి నరేంద్రమోదీ భారతదేశాన్ని ప్రపంచంలోనే గొప్ప దేశంగా తీర్చిదిద్దుతున్నారన్నారు. ఈ మేరకు కేంద్రంలో మరోమారు బీజేపీ అధికారంలోకి రానున్నందున మహబూబాబాద్‌ నుంచి తనను గెలిపిస్తే నియోజకవర్గ అభివృద్ధికి పాటుపడతానని తెలిపారు. కార్యక్రమంలో బీజేపీ జిల్లా అధ్యక్షుడు రంగాకిరణ్‌, నాయకులు రామకృష్ణ, జంపన సీతారామరాజు, ముస్కు శ్రీనివాసరెడ్డి, పున్నం బిక్షపతి, చిర్ర సరస్వతి, ప్రభారి కృష్ణవేణి, పొడియం బాలరాజు, లింగంపల్లి రమేశ్‌తో పాటు టీడీపీ, ఎమ్మార్పీఎస్‌ నాయకులు పాలొన్నారు. మహబూబాబాద్‌ అభ్యర్థి సీతారాంనాయక్‌