సాక్షి, సిటీబ్యూరో: హైదరాబాద్‌ జిల్లాలో కనీసం 60 శాతం ఓటింగ్‌ నమోదయ్యేవిధంగా ప్రతి ఒక్కరూ కృషి చేయాలని రాష్ట్ర ఎన్నికల ప్రధానాధికారి(సీఈఓ) వికాస్‌ రాజ్‌ అన్నారు. సోమవారం ఎల్‌బీ స్టేడియంలో ర్యాపిడో ఆధ్వర్యంలో ఏర్పాటైన కార్యక్రమంలో ఉచిత బైక్‌, టాక్సీ రైడ్స్‌ కార్యక్రమాన్ని జీహెచ్‌ఎంసీ కమిషనర్‌ రోనాల్డ్‌రాస్‌, హైదరాబాద్‌ పోలీసు కమిషనర్‌ కె.శ్రీనివాస్‌ రెడ్డి, హైదరాబాద్‌ జిల్లా కలెక్టర్‌ అనుదీప్‌ దురిశెట్టితో కలిసి జ్యోతి ప్రజ్వలన చేసి ఆయన ప్రారంభించారు. ఈ సందర్భంగా మాట్లాడుతూ పోలింగ్‌ కేంద్రాలకు వచ్చి ఓట్లు వేసిన ప్రజలను వారి ఇళ్లకు చేరవేసేందుకు వాహనాల ఏర్పాటుకు ముందుకొచ్చిన ర్యాపిడో నిర్వాహకులను అభినందించారు. హైదరాబాద్‌ జిల్లాలో ఓటింగ్‌ శాతం పెంచేందుకు గత రెండు మూడు నెలచీలుగా ఓటరు అవగాహన కార్యక్రమాలు పెద్ద యెత్తున చేపట్టినట్లు చెప్పారు. ర్యాపిడో ఉచిత సేవలుండాలి: రోనాల్డ్‌రాస్‌ జిల్లా ఎన్నికల అధికారి, జీహెచ్‌ఎంసీ కమిషనర్‌ రోనాల్డ్‌రాస్‌ మాట్లాడుతూ జిల్లాలోని అన్ని పోలింగ్‌ కేంద్రాల్లో ర్యాపిడో ఉచిత సేవలు కల్పించాని కోరారు. పోలింగ్‌తేదీతోపాటు ‘ఓటరుగా గర్వపడుతున్నాను’అనే స్టిక్కర్‌ను కూడా ఇంటింటికీ పంపిణీ చేస్తున్నట్లు తెలిపారు. సీపీ శ్రీనివాస్‌రెడ్డి మాట్లాడుతూ ప్రజలు స్వేచ్ఛగా, ప్రశాంతంగా, నిర్భయంగా ఓటు హక్కును వినియోగించుకునేందుకు పటిష్టమైన చర్యలు తీసుకున్నట్లు తెలిపారు.స్వీప్‌ అసిస్టెంట్‌ అధికారి నాగమణి, రాపిడో బిజినెస్‌ హెడ్‌ రోహిత్‌ రాథోడ్‌, తదితరులు పాల్గొన్నారు. ప్రారంభించిన సీఈవో వికాస్‌రాజ్‌ నగరంలో పోలింగ్‌ 60 శాతం దాటాలని సూచన

బంజారాహిల్స్‌: ఎన్నికలలో కీలకమైన ఓటింగ్‌ ప్రక్రియకు సంబంధించిన ప్రతి అంశాన్ని నిశితంగా పరిశీలించాలని జిల్లా ఎన్నికల అధికారి రోనాల్డ్‌ రాస్‌ మైక్రో అబ్జర్వర్లకు సూచించారు. పోలింగ్‌ సరళిని సూక్ష్మస్థాయిలో పరిశీలించేందుకు నియమించిన మైక్రో అబ్జర్వర్లకు సోమవారం బంజారాహిల్స్‌లోని కొమురంభీమ్‌ ఆదివాసీభవన్‌లో శిక్షణ తరగతులు నిర్వహించారు. ఈ సందర్భంగా ఆయన మాట్లాడుతూ ఎన్నికల సంఘం నిబంధనలు ఖచ్చితంగా అమలయ్యేలా, ప్రశాంత వాతావరణంలో సజావుగా ఎన్నికల ప్రక్రియ జరిగేలా సమర్ధవంతంగా విధులు నిర్వర్తించాలన్నారు. మైక్రో అబ్జర్వర్ల పాత్ర ప్రతి దశలో నిర్ణయాత్మకంగా ఉంటుందని, నిబంధనలకు అనుగుణంగా మాక్‌ పోలింగ్‌ జరపాలన్నారు. పవర్‌ పాయింట్‌ ప్రెజంటేషన్‌ ద్వారా మైక్రో అబ్జర్వర్ల విధులు, బాధ్యతలకు సంబంధించిన అంశాలను ఆయన వివరించారు. హైదరాబాద్‌ పార్లమెంట్‌ నియోజకవర్గం జనరల్‌ అబ్జర్వర్‌ పి.ఐ.శ్రీవిద్య మాట్లాడుతూ ఎన్నికలలో మైక్రో అబ్జర్వర్ల పాత్ర కీలకమైనదని అన్నారు. మైక్రో అబ్జర్వర్లు ప్రతి రిపోర్టును నేరుగా జనరల్‌ అబ్జర్వర్‌కు ఇవ్వాలన్నారు. అనంతరం ఈవీఎం, వీవీ ప్యాట్‌ల నిర్వాహణపై మైక్రో అబ్జర్వర్లకు హాండ్స్‌ ఆన్‌ శిక్షణ నిచ్చారు. శిక్షణ తరగతుల్లో మైక్రో అబ్జర్వర్లు, జిల్లా ఎన్నికల ట్రైనింగ్‌ నోడల్‌ అధికారి, అడిషనల్‌ కమిషనర్‌ (యూబీడీ) సునంద, ఎన్నికల విభాగం అధికారులు పాల్గొన్నారు. జిల్లా ఎన్నికల అధికారి రోనాల్డ్‌ రాస్‌

హైకోర్టు రిటైర్డ్‌ న్యాయమూర్తి జస్టిస్‌ చంద్రకుమార్‌ హిమాయత్‌నగర్‌: లోక్‌సభ ఎన్నికల్లో బీజేపీ, బీఆర్‌ఎస్‌లను ఓడించి ప్రజాస్వామ్యాన్ని, రాజ్యాంగాన్ని పరిరక్షించుకోవాలని, ఇండియా కూటమికి ఓటు వేసి గెలిపించాలని హైకోర్టు విశ్రాంత న్యాయమూర్తి జస్టిస్‌ బి.చంద్రకుమార్‌ ఓటర్లకు విజ్ఞప్తి చేశారు. మతతత్వ రాజకీయాలతో విచ్ఛిన్నకర రాజకీయాలు చేస్తున్న ప్రధాని మోదీకి ఈ ఎన్నికల్లో గుణపాఠం చెప్పాలని పిలుపునిచ్చారు. బషీర్‌బాగ్‌లోని దేశోద్ధారక భవన్‌లో సమాజ్‌వాద్‌ పార్టీ రాష్ట్ర అధ్యకుడు ప్రొఫెసర్‌ సింహాద్రి ఆధ్వర్యంలో లోక్‌సభ ఎన్నికలు–రాజ్యాంగ పరిరక్షణ అనే అంశంపై రౌండ్‌టేబుల్‌ సమావేశం నిర్వహించారు. ఈ సందర్భంగా జస్టిస్‌ చంద్రకుమార్‌ మాట్లాడుతూ మోసపూరిత హామీలను ఇచ్చి ప్రజలను మోదీ మరోసారి మోసం చేస్తున్నారన్నారు. ప్రొఫెసర్‌ పి.ఎల్‌.విశ్వేశ్వరరావు మాట్లాడుతూ మరోసారి మోదీ అధికారంలోకి వస్తే అన్ని వ్యవస్థలు సర్వనాశనం అవుతాయన్నారు. కార్యక్రమంలో ప్రజా తెలంగాణ కన్వీనర్‌ సమ్మన్న, లోక్‌సత్తా పార్టీ అధ్యకుడు మన్నారం నాగరాజు తదితరులు పాల్గొన్నారు. తెలుగు–కన్నడ బంధం విడదీయలేనిది కాచిగూడ: తెలుగు, కన్నడ భాషల మధ్య విడదీయరానంతగా బంధం పెనవేసుకుందని తెలంగాణ భాషా సాంస్కృతిక శాఖ సంచాలకులు మామిడి హరికృష్ణ అన్నారు. కన్నడ సాహిత్య పరిషత్‌ 110వ వ్యవస్థాపక దినోత్సవం సందర్భంగా సోమవారం పరిషత్‌ అధ్యక్షుడు విఠల్‌ జోషి అధ్యక్షతన స్థానిక అక్షయ హోటల్‌లో సమావేశం నిర్వహించారు. ముఖ్యఅతిథిగా హాజరైన మామిడి హరికృష్ణ మాట్లాడుతూ ప్రాచీన కాలం నుంచే ఈ రెండు భాషల మధ్య అనుబంధం కొనసాగుతోందన్నారు. ఉభయ భాషలపై సంస్కృతి, సాహిత్య ప్రభావం పరస్పరం కనిపిస్తుందన్నారు. హైదరాబాద్‌లో కన్నడ సంస్థలు చేస్తున్న సేవలు ప్రశంసనీయమని అన్నారు. పరిషత్‌ ఆధ్వర్యంలో నిర్వహించే కార్యక్రమాల్లో గత 55 సంవత్సరాలుగా పాల్గొంటున్న అమర దీక్షిత్‌ ‘ప్రజల వద్దకు పరిషత్తు’ అనే అంశంపై ప్రసంగించి సభికులను ఆకట్టుకున్నారు. జంట నగరాల్లో వివిధ క్షేత్రాలలో సేవలందిస్తున్న కన్నడిగులైన రఘునాథ్‌, హరిరావ్‌, రఘురామ్‌ ఓంకార్‌, వినయా నాయర్‌లను పరిషత్‌ ఆధ్వర్యంలో ఘనంగా సత్కరించి అభినందించారు. కార్యక్రమంలో పరిషత్‌ కార్యదర్శి సుమతి నిరంజన్‌, సి.రమేష్‌ బాబు తదితరులు పాల్గొన్నారు.

● గౌడ, కల్లుగీత వృత్తిదారుల సంఘం అధ్యక్షుడు అయిలి వెంకన్నగౌడ్‌ సుందరయ్య విజ్ఞాన కేంద్రం: సికింద్రాబాద్‌ లోక్‌సభ బీఆర్‌ఎస్‌ అభ్యర్థి టి.పద్మారావుగౌడ్‌, భువనగిరి బీజేపీ అభ్యర్థి బూర నర్సయ్యగౌడ్‌లను పార్టీలకు అతీతంగా గెలిపించాలని గౌడ, కల్లుగీత వృత్తిదారుల సంఘం రాష్ట్ర అధ్యక్షుడు, గౌడ హాస్టల్‌ ఉపాధ్యక్షుడు అయిలి వెంకన్నగౌడ్‌ పిలుపునిచ్చారు. బహుజనులంతా ఐక్యమై బలహీన వర్గాలకు చెందిన వారిని గెలిపించుకోవాలని పిలుపునిచ్చారు. అన్ని వర్గాలను ఐక్యం చేసి గోల్కొండ కోటను జయించి బడుగుల రాజ్యం స్థాపించిన సర్వాయి సర్ధార్‌ పాపన్నగౌడ్‌ను స్ఫూర్తిగా తీసుకోవాలని కోరారు. పద్మారావుగౌడ్‌ నాలుగు సార్లు ఎమ్మెల్యేగా గెలిచి మంత్రిగా, డిప్యూటీ స్పీకర్‌గా సేవలు అందించారని, నర్సయ్యగౌడ్‌ తెలంగాణ ఉద్యమంలో డాక్టర్స్‌ జేఏసీనీ ఏర్పాటు చేసి ఉద్యమించారని గుర్తు చేశారు. నిస్వార్థంగా ప్రజల కోసం పని చేసే వీరి గెలుపు కోసం ప్రతి ఒక్కరూ కృషి చేయాలని కోరారు.

అభ్యర్థుల పేరు, ఫొటో, ఎన్నికల గుర్తుల లోడింగ్‌ సాక్షి,సిటీబ్యూరో: ఈ నెల 13న జరగనున్న లోక్‌సభ, కంటోన్మెంట్‌ అసెంబ్లీ ఉప ఎన్నికలకు సంబంధించి హైదరాబాద్‌ జిల్లా పరిధిలోని ఈవీఎంల బ్యాలెట్‌ యూనిట్‌ల కమిషనింగ్‌(బ్యాలెట్‌లో అభ్యర్థుల పేరు, ఫొటో, ఎన్నికల గుర్తు ఉంచే ) ప్రక్రియ వడివడిగా సాగుతోంది. ఆయా నియోజకవర్గాల్లో అభ్యర్థుల సంఖ్యకనుగుణంగా పన్నెండున్నర వేలకుపైగా బ్యాలెట్‌ యూనిట్లలో ఈ పనుల్ని అధికార యంత్రాంగం చేస్తోంది. ఒక ఈవీఎంలోని బ్యాలెట్‌ యూనిట్‌లో నోటాసహా 16 గుర్తులకు అవకాశముంటుంది. అభ్యర్థులు 15 మంది మించితే రెండు ఈవీఎంలు అవసరమవుతాయి. వాటితోపాటు మరో 25 శాతం యూనిట్లు రిజర్వుగా ఉంచుతున్నారు. ఈవీఎంలు మొరాయించినప్పుడు వాటిని మార్చేందుకు వీలుగా రిజర్వులో ఉంచుతారు. అలా అభ్యర్థుల సంఖ్య, రిజర్వులో ఉంచాల్సిన వాటిని పరిగణనలోకి తీసుకొని ఈ పనులు చేస్తున్నారు. వివరాలిలా ఉన్నాయి. కంటోన్మెంట్‌కు 232 యూనిట్లు కంటోన్మెంట్‌ అసెంబ్లీ ఉప ఎన్నికకు 232 బ్యాలెట్‌ యూనిట్లు అవసరం. లోక్‌సభ, కంటోన్మెంట్‌కు కలిపి మొత్తం 10,014 బ్యాలెట్‌ యూనిట్లు, రిజర్వులో మరో 2, 504 యూనిట్లలో బ్యాలెట్‌ యూనిట్‌ల కమిషనింగ్‌ పనులు జరుగుతున్నాయి. ● హైదరాబాద్‌ పార్లమెంట్‌లో 30 మంది అభ్యర్థులుండటంతో అక్కడ రెండేసి ఈవీఎంలు, సికింద్రాబాద్‌లో 45 మంది బరిలో ఉండటంతో అక్కడ మూడేసి ఈవీఎంలు, మల్కాజిగిరి పార్లమెంట్‌కు 22 మంది అభ్యర్థులు పోటీలో ఉండటంతో అక్కడ రెండేసి ఈవీఎంలు, కంటోన్మెంట్‌ అసెంబ్లీ ఉప ఎన్నికకు 15 మంది అభ్యర్థులు మాత్రమే ఉండటంతో అక్కడ ఒక ఈవీఎం వంతున వినియోగించనున్నారు. హైదరాబాద్‌ పార్లమెంట్‌ పోలింగ్‌ కేంద్రాలు: 1944 అవసరమైన బ్యాలెట్‌ యూనిట్లు: 3,888 సికింద్రాబాద్‌ పార్లమెంట్‌ పోలింగ్‌ కేంద్రాలు: 1,810 అవసరమైన బ్యాలెట్‌ యూనిట్లు: 5,430 కంటోన్మెంట్‌ అసెంబ్లీ సెగ్మెంట్‌ (మల్కాజిగిరి పార్లమెంట్‌) పోలింగ్‌ కేంద్రాలు: 232 అవసరమైన బ్యాలెట్‌ యూనిట్లు: 464 మొత్తం : 9782