ముగిసిన మగ్గం వర్క్‌ శిక్షణ డిచ్‌పల్లి(నిజామాబాద్‌రూరల్‌): ప్రస్తుతం మార్కెట్‌లో మగ్గం వర్క్‌కు బాగా డిమాండ్‌ ఉందని, మగ్గం వర్క్‌ ద్వారా మంచి ఆదాయం సంపాదించుకుని జీవితంలో స్ధిరపడే అవకాశం ఉంటుందని స్టేట్‌ బ్యాంక్‌ ఆఫ్‌ ఇండియా గ్రామీణ స్వయం ఉపాధి శిక్షణా సంస్థ(ఆర్‌ఎస్‌ఈటీఐ) డైరెక్టర్‌ సుంకం శ్రీనివాస్‌ అన్నారు. ఆర్‌ఎస్‌ఈటీఐ ఆధ్వర్యంలో నిజామాబాద్‌, కామారెడ్డి జిల్లాల పరిధిలోని గ్రామీణ మహిళలు, యువతులకు నెలరోజులుగా ఇస్తున్న మగ్గం వర్క్‌ శిక్షణ గురువారం ముగిసింది. ఈ సందర్భంగా సంస్థ డైరెక్టర్‌ శ్రీనివాస్‌ శిక్షణ పూర్తి చేసుకున్న వారికి ధ్రువీకరణ పత్రాలు, టూల్స్‌ కిట్స్‌ అందజేశారు. అనంతరం డైరెక్టర్‌ మాట్లాడుతూ.. ఆర్‌ఎస్‌ఈటీఐ ఆధ్వర్యంలో ఉమ్మడి నిజామాబాద్‌ జిల్లాలోని గ్రామీణ నిరుద్యోగ యువతకు పలు ఉపాధి కోర్సుల్లో ఉచిత శిక్షణ కార్యక్రమాలను అందిస్తున్నట్లు తెలిపారు. సొంతంగా షాప్‌ పెట్టుకోవాలనుకునే వారికి బ్యాంక్‌ ద్వారా రుణ సదుపాయం కూడా కల్పిస్తున్నట్లు తెలిపారు. మీ గ్రామాలలో ఉండే నిరుద్యోగ యువతకు ఎస్‌బీఐ ఆర్‌ఎస్‌ఈటీఐ సంస్థ గురించి చెప్పాలని సూచించారు. కార్యక్రమంలో సిబ్బంది భాగ్యలక్ష్మి, రామకృష్ణ, ఫ్యాకల్టీ నవీన్‌, రంజిత్‌, ఫరీదా, లక్ష్మణ్‌ తదితరులు పాల్గొన్నారు.

● ఆఫీస్‌లో 250 దరఖాస్తుల పెండింగ్‌ బిచ్కుంద(జుక్కల్‌): మండల ప్రజలు, రైతులు ఆయా ధ్రువపత్రాలు, పహాణీ రికార్డుల కోసం నెలల తరబడి తహసీల్‌ కార్యాలయం చుట్టూ చక్కర్లు కొడుతున్నారు. అధికారులు పరిశీలన, విచారణ పేరుతో నెలల తరబడి కాలయాపన చేస్తుండటంతో ప్రజలు అవస్థలు పడుతున్నారు. వందల దరఖాస్తులు పరిష్కారానికి నోచుకోక పెండింగ్‌లో ఉన్నాయి. అధికారులు సమయ పాలన పాటించడం లేదు. ఓ అధికారి బుధవారం మధ్యాహ్నం 12 గంటలకు కార్యాలయానికి వచ్చారు. ఆ అధికారి చిక్కడు దొరకడు అన్న రీతిలో ఉంటారు. ఎప్పుడు వస్తారో ఎప్పుడు పోతారో తెలియని పరిస్థితి నెలకొందని ప్రజలు ఆవేదన వ్యక్తం చేస్తున్నారు. పహాణీ రికార్డులు, కులం, ఆదాయం, బర్త్‌ సర్టిఫికేట్‌, నివాస ధ్రువీకరణ, కల్యాణలక్ష్మి, షాదీముబారక్‌, ఫ్యామిలీ సర్టిఫికెట్‌ ఇతర ధ్రువీకరణ పత్రాల కోసం ప్రజలు దరఖాస్తులు చేసుకోగా వాటి పరిష్కారానికి నోచుకోక తహసీల్‌ కార్యాలయంలో సుమారు 250 దరఖాస్తులు పెండింగ్‌లో ఉన్నాయి. ఎండను సైతం లెక్క చేయకుండా ప్రతి రోజూ కార్యాలయం చుట్టూ విద్యార్థులు, ప్రజలు చక్కర్లు కొడుతున్నా కనికరించే వారు కరువయ్యారని ప్రజలు ఆవేదన వ్యక్తం చేస్తున్నారు. జిల్లా అధికారులు, ప్రజా ప్రతినిధులు స్పందించి దారితప్పిన రెవెన్యూ పాలనను సరైన మార్గం తీసుకొచ్చి అన్ని వేళలో అధికారులు స్థానికంగా ఉండే విధంగా చూడాలని మండల ప్రజలు కోరుతున్నారు.

రూ.15 లక్షల ఆస్తి నష్టం లింగంపేట(ఎల్లారెడ్డి): విద్యుత్‌ షార్ట్‌ సర్క్యూట్‌తో పెంకుటిల్లు దగ్ధమైన ఘటన మండల కేంద్రంలో గురువారం సాయంత్రం చోటుచేసుకుంది. ఈ ఘటనలో ఛత్రపతి వీరమణి, లక్ష్మణ్‌ గౌడ్‌, రామకృష్ణగౌడ్‌లకు చెందిన ఇళ్లు కాలిబూడిదయ్యాయి. చుట్టు భవంతిలో మూడు కుటుంబాల సభ్యులు నివాసం ఉంటున్నారు. మూడు కుటుంబాల సభ్యులు పనుల నిమిత్తం తాళం వేసి బయటకు వెళ్లారు. సాయంత్రం విద్యుత్‌ షార్ట్‌ సర్క్యూట్‌తో పెద్ద భవంతి ఇంటి నుంచి పొగలు రావడంతో చుట్టు ప్రక్కలవారు, యువకులు గమనించారు. యువకులు వెంటనే ఇంటిపైకి ఎక్కి బిందెలు, బకెట్లతో నీళ్లు చల్లారు. అయినా మంటలు అదుపులోకి రాకపోవడంతో మోటార్లు ఏర్పాటు చేసి పైపులతో నీళ్లు పట్టి మంటలు ఆర్పే ప్రయత్నం చేశారు. ఎల్లారెడ్డి అగ్నిమాపక సిబ్బందికి సమాచారం ఇచ్చారు. అగ్నిమాపక సిబ్బంది ఘటనా స్థలానికి చేరుకొని మంటలను అదుపు చేశారు. ఈ ఘటనలో రెండు కుటుంబాలకు చెందిన 10 తులాల బంగారం, వెండి, సర్టిఫికెట్లు, ఫైల్స్‌, ఫర్నిచర్‌, నిత్యావసర సరుకులు, బట్టలు పూర్తిగా దగ్ధమైనట్లు కుటుంబ సభ్యులు తెలిపారు. మూడు కుటుంబాలకు సంబంధించి సుమారు రూ.15 లక్షల ఆస్తి నష్టం వాటిల్లినట్లు తెలిపారు. ప్రభుత్వం తమను ఆదుకోవాలని కోరారు.

తెయూ(డిచ్‌పల్లి): తెలంగాణ రాష్ట్రంలో పోస్ట్‌ గ్రాడ్యుయేషన్‌(పీజీ) కోర్సుల్లో ప్రవేశాలకు నిర్వహించే ఉమ్మడి ప్రవేశ పరీక్ష (కామన్‌ పోస్టు గ్రాడ్యుయేట్‌ ఎంట్రన్స్‌ టెస్ట్‌ –సీపీగెట్‌ – 2024) నోటిఫికేషన్‌ విడుదలైంది. ఈ ప్రవేశ పరీక్ష ద్వారా రాష్ట్ర వ్యాప్తంగా ఉన్న యూనివర్సిటీల పరిధిలో 294 పీజీ కళాశాలల్లో దేంట్లోనైనా పీజీ కోర్సులతో పాటు, ఐదేళ్ల ఇంటిగ్రేటెడ్‌ పీజీకి సంబంధించిన కోర్సుల్లో ప్రవేశం పొందే అవకాశం ఉంటుంది. ఈ నెల 18 నుంచి సీపీగెట్‌ రిజిస్ట్రేషన్ల ప్రక్రియ ప్రారంభమవుతుంది. జూలై 5 నుంచి కంప్యూటర్‌ బేస్డ్‌ మోడ్‌లో పరీక్షలు నిర్వహిస్తారు. ఈ ఎంట్రన్స్‌ ద్వారా ఉస్మానియా, కాకతీయ, శాతవాహన, తెలంగాణ, మహాత్మాగాంధీ, పాలమూరు, జేఎన్‌టీయూ(హెచ్‌), తెలంగాణ మహిళా వర్సిటీల్లో పీజీ కోర్సుల్లోని సీట్లను భర్తీ చేస్తారు. తెయూ పరిధిలో.. తెలంగాణ యూనివర్సిటీ పరిధిలో వర్సిటీ డిచ్‌పల్లి మెయిన్‌ క్యాంపస్‌, భిక్కనూర్‌ సౌత్‌ క్యాంపస్‌ కళాశాలలతో పాటు 16 అనుబంధ ప్రభుత్వ, ప్రైవేటు పీజీ కళాశాలలున్నాయి. వర్సిటీ క్యాంపస్‌లో 26 కోర్సులుండగా, అనుబంధ పీజీ కళాశాలల్లో కలిపి మొత్తం 35 వరకు కోర్సులున్నాయి. వీటిలో సుమారు 4 వేల మంది వరకు విద్యార్థులు ప్రవేశాలు పొందుతారు. వీరిలో బాలికలు సుమారు 65 శాతం, బాలురు సుమారు 35 శాతం మంది మాత్రమే పీజీ కోర్సుల్లో చేరుతున్నారు. ఈ సారి 10 శాతం సీట్లు నిండని కాలేజీలను బ్లాక్‌ చేసే ఆలోచనలో రాష్ట్ర ఉన్నత విద్యామండలి అధికారులున్నారు. దరఖాస్తులు సహా పూర్తి వివరాల కోసం www.osmania.ac.in,www.ouadimissions.com, www.cpget.tsche.ac.in వెబ్‌సైట్‌లను సందర్శించాలని వర్సిటీ అధికారులు సూచించారు. జూలై 5న ఎంట్రన్స్‌ టెస్ట్‌ తెయూ పరిధిలో 18 పీజీ కళాశాలలు సీపీగెట్‌ షెడ్యూల్‌ ఆన్‌లైన్‌ రిజిస్ట్రేషన్‌ ప్రారంభం 18–05–2024 రిజిస్ట్రేషన్‌కు తుది గడువు 17–06–2024 రూ.500 ఆలస్య రుసుముతో గడువు 25–06–2024 రూ.2 వేల ఆలస్య రుసుముతో గడువు 30–06–2024 ప్రవేశ పరీక్షలు 05–07–2024

● అనుమానాస్పద కేసుగా నమోదు రెంజల్‌(బోధన్‌): కందకుర్తి గ్రామానికి చెందిన బొల్లెల అనిల్‌(28) అనే యువకుడు గురువారం రాత్రి ఇంట్లో మృతి చెందగా.. అనిల్‌ అమ్మమ్మ ఇచ్చిన ఫిర్యాదు మేరకు అనుమానాస్పద మృతిగా కేసు నమోదు చేసినట్లు ఎస్సై సాయన్న తెలిపారు. అనిల్‌తో పాటు ఆయన ఇంటి పక్కనే ఉండే చెల్లెలు, బావలు అనీల్‌కు చెందిన భూమిని కౌలు చేస్తున్నారని , పట్టా పాస్‌ పుస్తకంతో పాటు కౌలు డబ్బులు అడిగితే చెల్లి, బావతో పాటు సంతోష్‌ అనే వ్యక్తి కలిసి అనీల్‌ను కొడుతుండేవారని స్థానికులు చెబుతున్నారు. అనిల్‌ మృతి చెందినట్లు శుక్రవారం గుర్తించిన స్థానికులు, బంధువులకు సమాచారం అందించారు. అమ్మమ్మ నాగుబాయి అందించిన ఫిర్యాదు మేరకు కేసు నమోదు చేసి దర్యాప్తు చేస్తున్నట్లు చెప్పారు. అనిల్‌ ఒంటిపై ఎలాంటి గాయాలు లేవన్నారు.