TV
హ్యూస్టన్: అమెరికాలోని టెక్సాస్ రాష్ట్రంలో ఆదివారం రెండు వైరి పక్షాలకు చెందిన నిషేధిత బైక్ గ్యాంగ్‌ల సభ్యులు పరస్పరం కాల్పులకు తెగబడ్డారు. ఈ కాల్పుల్లో ఇరు పక్షాలకు చెందిన 9 మంది సభ్యులు మృతిచెందగా మరో 18 మంది గాయపడ్డారు. టెక్సాస్‌లోని వాకోలో భారత సంతతి వ్యక్తి నడుపుతున్న ఓ స్పోర్ట్స్ బార్ ఆవరణలో ఈ దారుణం జరిగింది.
ట్విన్‌పీక్స్ రెస్టారెంట్‌లో భేటీకి ఐదు బైక్ గ్యాంగ్‌లకు చెందిన సుమారు 150 నుంచి 200 మంది సభ్యులు చేరుకున్నారని...రెస్టారెంట్‌లోని ఓ బాత్రూంలో తలెత్తిన వివాదం చివరకు కత్తిపోట్లు, కాల్పుల వరకూ దారితీసిందని పోలీసులు తెలిపారు.
ముఠా సభ్యుల మధ్య ఘర్షణ జరగొచ్చని ఊహించిన పోలీసులు ముందుగానే అక్కడ మోహరించినా పరిస్థితి అదుపు తప్పింది. కాల్పుల ఉదంతానికి సంబంధించి 192 మందిపై అభియోగాలు నమోదయ్యాయి.
