TV
భారత, పాకిస్థాన్ దేశాల మధ్య వాఘా సరిహద్దు ప్రాంతంలో తనను తాను పేల్చేసుకుని.. 61 మంది మరణానికి కారకుడైన 25 ఏళ్ల ఆత్మాహుతి బాంబర్ ఫొటోను పాకిస్థాన్ తాలిబన్ గ్రూపు విడుదల చేసింది. జమాత్ ఉల్ అహ్రార్ అనే తాలిబన్ గ్రూపు ఈ ఫొటో, వివరాలు బయటపెట్టింది. హనీఫుల్లా అలియాస్ హమ్జా అనే యువకుడు ఈ దారుణానికి పాల్పడినట్లు ఒమర్ ఖొరసానీ నేతృత్వంలోని జమాతుల్ అహ్రార్ గ్రూపు వెల్లడించింది.
సాయంత్రం సమయంలో పతాకాలను అవనతం చేసిన కొద్ది సేపటికి ఈ ఆత్మాహుతి దాడి జరిగిన విషయం తెలిసిందే. మొహ్మాండ్ గిరిజన ప్రాంతంలోని ఓ పట్టణానికి చెందిన హనీఫుల్లా.. సరిగ్గా పెరేడ్ కాంప్లెక్సు గుమ్మం ఎదుటే తనను తాను పేల్చేసుకున్నాడు. దాంతో 10 మంది మహిళలు, ఏడుగురు పిల్లలతో సహా 61 మంది మరణించారు, 110 మంది గాయపడ్డారు.
త్వరలోనే తాము ఈ దాడికి సంబంధించిన వీడియో కూడా విడుదల చేస్తామని పాక్ తాలిబన్ గ్రూపు చెప్పింది. అఫ్ఘానిస్థాన్ సరిహద్దుల్లోని ఫతా గిరిజన ప్రాంతంలో గిరిజనులు, తాలిబన్లపై జరుగుతున్న సైనిక చర్యకు ప్రతీకారంగానే ఈ దాడి చేసినట్లు తెలిపింది.
