యాక్షన్‌ సినిమాగా జనాల్లోకి వెళ్లాంటే.. దానికి తగ్గట్టుగా హీరో విన్యాసాలను ట్రైలర్‌లో చూపాల్సిందే. సినిమాలో హీరో ఎన్ని ఫైట్లు చేస్తాడు, ఎంతమందిని చితకబాదుతాడు, విలన్‌తో ఎలా పోరాడుతాడు.. ఇలా చిత్రకథకు సంక్షిప్తరూపంలో ట్రైలర్‌ ఉంటేనే ఆ సినిమా సత్తా ఏంటో చూచాయగా ప్రేక్షకులకు తెలిసే అవకాశముంటుంది.

అందుకే టైగర్ ష్రఫ్‌, శ్రద్ధకపూర్ జంటగా నటిస్తున్న తాజా యాక్షన్ మూవీ 'బాగీ' ట్రైలర్‌లో ఏకంగా 30 ఫ్లయింగ్ కిక్స్‌ను చూపించారు. యాక్షన్ పవర్‌ప్యాక్‌గా వస్తున్న ఈ సినిమాకు దర్శకుడు సబీర్ ఖాన్. ఈ సినిమాతో మహేశ్‌బాబు బావ, టాలీవుడ్ హీరో సుధీర్‌ బాలీవుడ్‌కు విలన్‌గా పరిచయమవుతున్నాడు. ఇప్పటికే 'హీరోపాంటీ' చిత్రంతో తానేంటో నిరూపించుకున్నట్రైగర్‌ ష్రఫ్ ఈ సినిమాతో తన యాక్షన్ స్టామినాను చూపించబోతున్నాడని, అతను చేసిన యాక్షన్ దృశ్యాలు ప్రేక్షకులను విస్మయపరుస్తాయని దర్శకుడు సబీర్ ఖాన్ చెప్తున్నాడు. ఏప్రిల్ 29న విడుదల కానున్న ఈ సినిమా ట్రైలర్‌ను సోమవారం సాయంత్రం విడుదల చేశారు.