● అధికారులకు కలెక్టర్‌ వినోద్‌కుమార్‌ ఆదేశం అనంతపురం అర్బన్‌:ఓట్ల లెక్కింపు(కౌంటింగ్‌) కేంద్రాల్లో ఏర్పాట్లు పకడ్బందీగా ఉండాలని కలెక్టర్‌, జిల్లా ఎన్నికల అధికారి వి.వినోద్‌ కుమార్‌ సంబంధిత అధికారులను ఆదేశించారు.అనంతపురం పార్లమెంట్‌, అసెంబ్లీ నియోజకవర్గాలకు సంబంధించి ఓట్ల లెక్కింపు ప్రక్రియ జేఎన్‌టీయూలో నిర్వహించనున్నారు. ఇందుకు సంబంధించి సిద్ధం చేస్తున్న కౌంటింగ్‌ కేంద్రాలను కలెక్టర్‌ మంగళవారం సందర్శించి అక్కడి ఏర్పాట్లను పరిశీలించారు. కేంద్రాల్లో చేపట్టిన ఏర్పాట్ల గురించి కలెక్టర్‌కు జాయింట్‌ కలెక్టర్‌ కేతన్‌గార్గ్‌ వివరించారు. అనంతరం కలెక్టర్‌ మాట్లాడుతూ పోస్టల్‌ బ్యాలెట్‌ల లెక్కింపు, ఈవీఎంలలో ఓట్ల లెక్కింపు, ఆర్‌ఓ టేబుల్‌, కౌంటింగ్‌ టేబుళ్లు, కేంద్రంలో ఇనుప కంచె, స్ట్రాంగ్‌ రూమ్‌ నుంచి ఈవీఎంలను కౌంటింగ్‌ కేంద్రానికి తీసుకొచ్చే మార్గం లో ఏర్పాట్లు పకడ్బందీగా ఉండాలన్నారు. అక్కడ చేపట్టాల్సిన పనులకు సంబంధించి తగిన సూచనలు, ఆదేశాలిచ్చారు. ఎలుగుబంటి కలకలం బొమ్మనహాళ్‌: మండలంలోని దేవగిరి, ఉద్దేహాళ్‌, శ్రీనివాస్‌ క్యాంపు గ్రామాల శివార్లలో ఓ ఎలుగుబంటి మంగళవారం కలకలం సృష్టించింది. స్థానికులు గమనించి కేకలు వేయడంతో చెట్టుపైకి ఎక్కింది. కాసేపటికే దేవగిరి కొండల్లోకి పరుగులు తీసింది. ఎలుగుబంటి సంచారంతో ఆయా గ్రామాల ప్రజలు బెంబేలెత్తి పోతున్నారు. రైతులు పత్తి పొలాల్లోకి వెళ్లాలంటే ఆందోళనకు గురవుతున్నారు. అటవీశాఖ అధికారులు తగిన చర్యలు తీసుకోవాలని స్థానికులు కోరుతున్నారు. న్యూస్‌రీల్‌

● జిల్లాలో జోరుగా బెట్టింగ్‌లు సాక్షి, అనంతపురం: జిల్లాలో ఎన్నికలు ప్రశాంతంగా ముగిశాయి. ఇక ఓట్ల లెక్కింపునకు 20 రోజులు గడువు ఉండగా, అప్పుడే బెట్టింగ్‌లు ప్రారంభమయ్యాయి.ముఖ్యంగా వైఎఎస్సార్‌పీ అభ్యర్థులు గెలుస్తారనే మెజార్టీ స్థాయిలో బెట్టింగ్‌లు జరుగుతున్నట్లు తెలిసింది. రాష్ట్రంలో వైఎస్సార్‌ సీపీ అధికారంలోకి వచ్చినప్పటి నుంచి అమలు చేసిన సంక్షేమ పథకాలకు తోడు పెద్ద ఎత్తున జరిగిన అభివృద్ధి పనులతో జన మంతా అధికార పార్టీ వైపే మొగ్గు చూపారని ఇప్పటికే పలు సర్వేలు వెల్లడించాయి. ఈ క్రమంలోనే బెట్టింగ్‌ రాయుళ్లు కూడా ఆ పార్టీ గెలుస్తుందనే పందేలు వేస్తున్నట్లు సమాచారం. జిల్లాలో ఏడు స్థానాల్లోనూ వైఎస్సార్‌ సీపీ గెలుస్తుందని బెట్టింగ్‌ కడుతున్నట్లు చర్చ జరుగుతోంది. జిల్లాకు చెందిన వారే కాకుండా పొరుగున ఉన్న కర్ణాటకవాసులు కూడా మన జిల్లాకు సంబంధించి పలు స్థానాలపై బెట్టింగ్‌లు వేస్తున్నట్లు తెలిసింది. ఇదే క్రమంలో పలు నియోజకవర్గాలకు సంబంధించి ఎవరు గెలుస్తారనే దానిపైనే కాకుండా ఆయా స్థానాల్లో అధికార పార్టీ అభ్యర్థికి ఎంత మెజార్టీ వస్తుంది, కూటమి అభ్యర్థులు ఎంత చిత్తుగా ఓడతారనే దానిపై కూడా పందెం కాస్తున్నట్లు సమాచారం. ఎన్‌ఎస్‌జీ కమాండర్‌ ఆత్మహత్య కొత్తచెరువు: ఎన్‌ఎస్‌జీ కమాండర్‌గా పనిచేసే మండలానికి చెందిన ఓ యువకుడు ఆత్మహత్య చేసుకున్నాడు. ఈ సంఘటన మంగళవారం ఆలస్యంగా వెలుగులోకి వచ్చింది. మండలంలోని ఎర్రబల్లి గ్రామానికి చెందిన బోయ నరసింహులు కుమారుడు చెన్నుడు (34) ఆదివారం రాత్రి ఢిల్లీలోని తన నివాసంలో ఉరివేసుకుని ఆత్మహత్య చేసుకున్నాడు. అస్సాం రైఫిల్స్‌లో ఉద్యోగ జీవితం ప్రారంభించిన చెన్నుడు...ఆ తర్వాత వీవీఐపీల రక్షణ బాధ్యతలు చూసే నేషనల్‌ సెక్యూరిటీ గార్డ్‌ (ఎన్‌ఎస్‌జీ) విభాగానికి బదిలీ అయ్యారు. శిక్షణ నిమిత్తం రెండు నెలల క్రితం ఢిల్లీకి వచ్చాడు. ఈ క్రమంలోనే ఈ నెల 12వ తేదీ రాత్రి తన ఇంట్లోనే ఉరివేసుకుని ఆత్మహత్య చేసుకున్నాడు. మానసిక ఒత్తడి కారణంగానే చెన్నుడు ఆత్మహత్య చేసుకున్నట్లు కుటుంబీకులు తెలిపారు. మంగళవారం చెన్నుడు మృతదేహాన్ని స్వగ్రామం ఎర్రబల్లికి తీసుకువచ్చి అంత్యక్రియలు నిర్వహించారు.

అనంతపురం: శ్రీకృష్ణదేవరాయ విశ్వవిద్యాలయం పరిధిలో మెగా సప్లిమెంటరీ పరీక్షలు నిర్వహించడానికి సంబంధించిన నోటిఫికేషన్‌ మంగళవారం విడుదలైంది. దరఖాస్తులకు జూన్‌ 14 వరకూ అవకాశం కల్పించారు. రూ.1,000 అపరాధ రుసుంతో ఈ నెల 21 వరకు దరఖాస్తు చేసుకోవచ్చు. రూ. 3,000 అపరాధ రుసుముతో 28వ తేదీ వరకు, రూ.5,000 అపరాధ రుసుముతో జూలై 1 వరకు దరఖాస్తు చేసుకోవచ్చు. అనంతపురం కేఎస్‌ఎన్‌ డిగ్రీ బాలికల కళాశాలలో పరీక్ష కేంద్రం ఏర్పాటు చేశారు. ● ఒక్కో సబ్జెక్టుకు రూ.1000, రెండు సబ్జెక్టులు రూ.3,000, మూడు సబ్జెక్టులు ఆపైన ఫెయిల్‌ అయి ఉంటే రూ.4,000 పరీక్ష ఫీజు చెల్లించాల్సి ఉంటుంది. ● డిగ్రీ మొదటి, రెండో సంవత్సరం ఉత్తీర్ణులై, మూడో సంవత్సరంలో పరీక్షలు రాయకుండా ఉంటే రూ.3,000 అదనంగా అపరాధ రుసుము చెల్లించాల్సి ఉంటుంది. ● 1994–95 విద్యా సంవత్సరం నుంచి 2014–15 విద్యా సంవత్సరం వరకు చదివిన విద్యార్థులు మాత్రమే దరఖాస్తు చేసుకోవాలి. ● 2008–09 విద్యా సంవత్సరం నుంచి రాయలసీమ వర్సిటీ ఏర్పాటైన నేపథ్యంలో.. అంతకుముందు ఎస్కేయూ పరిధిలో చదువు కున్న కర్నూలు జిల్లా విద్యార్థులు కూడా దరఖాస్తు చేసుకోవచ్చు. ● అభ్యర్థులు గతంలో పరీక్ష రాసిన హాల్‌టికెట్‌ గానీ, మార్క్స్‌కార్డు గానీ దరఖాస్తుకు జత చేయాల్సి ఉంటుంది. ఎంతోమందికి ఊరట.. గతంలో అనివార్య కారణాలతో డిగ్రీ పూర్తి చేయలేని వారు, బ్యాక్‌లాగ్స్‌ (ఫెయిల్‌ అయినవారు) ఉన్నవారికి ఊరట కలిగించే ఈ నిర్ణయాన్ని ఇటీవలే ఎస్కేయూ ఉన్నతాధికారులు తీసుకున్నారు. డిగ్రీ ఫెయిల్‌ అయి పట్టా పొందలేని పరిస్థితుల్లో పరీక్షలు రాసి ఉత్తీర్ణులయ్యే సదవకాశాన్ని కల్పిస్తున్నారు. ఎన్ని సబ్జెక్టులు ఫెయిల్‌ అయినా, వాటిన్నింటినీ రాయడానికి వీలు కల్పించారు.

అనంతపురం మెడికల్‌: ఇటీవల ప్రభుత్వ నిధులతో ప్రభుత్వ సర్వజనాస్పత్రిలో ఆవరణలో ఏర్పాటు చేసిన నూతన ఓపీ, ఐపీ బ్లాక్‌ ఎంతో ఉపయోగకరంగా మారింది. సర్వజనాస్పత్రిలో వివిధ విభాగాల్లో పునరుద్ధరణ పనుల కోసం ప్రభుత్వం రూ.3.5 కోట్ల నిధులు కేటాయించింది.ఈ నిధులతో అన్ని విభాగాలు అధునాతనంగా రూపుదిద్దుకుంటున్నాయి. గతంలో ఆస్పత్రిలో ఉన్న ఓపీ బ్లాక్‌లో ఓపీ టికెట్‌ పొందాలంటే పురుషులు, మహిళలు చాలా ఇబ్బంది పడేవారు. ఈ సమస్యకు చెక్‌క పెడుతూ ఆస్పత్రి ఆవరణలోని ఓపీ బ్లాక్‌లో రెండు గదుల్లో పురుషులు, మహిళలు, వికలాంగులు, తదితరుల కోసం ప్రత్యేక కౌంటర్లను ఏర్పాటు చేశారు. నూతన ఓపీ బ్లాక్‌ ఏర్పాటుపై రోగులు, వారి సహాయకులు హర్షం వ్యక్తం చేస్తున్నారు. బ్రాహ్మణ ఉపకార వేతనాలకు దరఖాస్తుల ఆహ్వానం అనంతపురం కల్చరల్‌: బ్రాహ్మణ విద్యార్థినీ మహిళా సంక్షేమ సంఘం ద్వారా ప్రతిభ గల పేద బ్రాహ్మణ విద్యార్థినులకు ఉపకార వేతనాలందిస్తున్నారు. ఈ మేరకు ఆ సంఘం కార్యదర్శి రమాదేవి మంగళవారం ఓ ప్రకటన విడుదల చేశారు. 6వ తరగతి నుంచి పీజీ చదువుతున్న ప్రతిభ కల్గిన పేద విద్యార్థినులు అర్హులు. పూర్తి వివరాలకు 9703789201, 9490130999లో సంప్రదించవచ్చు.

● ఒత్తిళ్లకు కాసింత విరామం ఎన్నికల దృష్ట్యా ఒకట్రెండు నెలలు కాదు... దాదాపు ఎనిమిది నెలలుగా వివిధ కార్యక్రమాల పేరుతో ప్రజల మధ్యనే గడిపిన వైఎస్సార్‌సీపీ అభ్యర్థులు పోలింగ్‌ ముగియడంతో మంగళవారం కాస్త రిలాక్స్‌ అయ్యారు. కుటుంబసభ్యులతో కలసి ఆహ్లాదంగా గడిపారు. వంట చేయడంలో సిద్ధహస్తులైన వారు స్వయం పాకం చేసి ఇంటిల్లిపాదికి పెట్టి ఆనందించారు. కొన్ని నెలలుగా తాము పడిన ఒత్తిడికి విరామం ప్రకటిస్తూ ఆనందోత్సాహాలతో సందడి చేశారు.