విజయవాడ: పెద్ద నోట్ల రద్దు గురించి ఏపీ సీఎం చంద్రబాబుకు ముందే తెలుసని వైఎస్సార్‌ సీపీ నాయకురాలు, నగరి ఎమ్మెల్యే ఆర్కే రోజా ఆరోపించారు. నల్లధనాన్ని తెల్లధనంగా మార్చుకునేందుకే చంద్రబాబు విదేశాలకు వెళ్లారని అన్నారు. మంగళవారం ఆమె విలేకరులతో మాట్లాడుతూ... పెట్టుబడుల సాకులతో ఏపీ మంత్రులు 16 సార్లు విదేశీ పర్యటనలకు వెళ్లారని గుర్తు చేశారు.
తాను లేఖ రాయడం వల్లే పెద్ద నోట్లు రద్దు చేశారని చెప్పుకుంటున్న చంద్రబాబు రెండున్నరేళ్ల క్రితమే ఆ పని ఎందుకు చేయలేదని ప్రశ్నించారు. కేంద్ర మంత్రి వెంకయ్య నాయుడు ఉంచి లీకు అందడం వల్లే చంద్రబాబు జాగ్రత్త పడ్డారని అనుమానం వ్యక్తం చేశారు. నల్లధనాన్ని మార్చుకునేందుకే చంద్రబాబు కుటుంబ సహితంగా విదేశాలకు వెళ్లారని ఆరోపించారు. మీ లేఖతో పెద్ద నోట్లు రద్దయినప్పుడు ఏపీకి ప్రత్యేకహోదా ఎందుకు రావడం లేదని నిలదీశారు. ప్రత్యేకహోదా కోసం అసెంబ్లీలో రెండుసార్లు ఏకగ్రీవ తీర్మానం చేసినా కేంద్రం ఎందుకు స్పందించలేదని అడిగారు.
సరైన సన్నద్ధత లేకుండా పెద్ద నోట్లను రద్దు చేయడంతో సామాన్య ప్రజలు కష్టాలు పడుతున్నారని ఆవేదన వ్యక్తం చేశారు. ఎక్కడికి వెళ్లినా ‘చిల్లర ఉంటేనే లోపలకు రండి లేకుంటే వద్దు’ అనే బోర్డులు దర్శనమిస్తున్నాయని చెప్పారు. ఏసీ గదుల్లోంచి బయటకు వచ్చి బ్యాంకులు, ఏటీఎంల దగ్గర సామాన్యులు పడుతున్న కష్టాలు తెలుసుకోవాలని ప్రభుత్వ పెద్దలకు సూచించారు. నోట్ల కష్టాలు తగ్గించేందుకు రాష్ట్ర ప్రభుత్వం చర్యలు చేపట్టాలని కోరారు.
ఇంటికో ఉద్యోగం ఇస్తామన్న చంద్రబాబు వీధికో బీర్‌ పార్లర్‌ పెడుతున్నారని మండిపడ్డారు. ప్రజలను దోచుకునేవిధంగా ముందుకు వెళుతున్నారని ధ్వజమెత్తారు. చీప్‌ లిక్కర్‌ చీఫ్‌ ప్రమోటర్‌ గా చంద్రబాబు వ్యవరిస్తున్నారని దుయ్యబట్టారు. బెల్టు దుకాణాలు ధ్వంసం చేస్తామని ఎమ్మెల్యే రోజా హెచ్చరించారు.
TV
