హైదరాబాద్ : రాష్ట్ర కాంగ్రెస్ వ్యవహారాల ఇన్‌చార్జి దిగ్విజయ్ సింగ్ విమర్శలపై తెలంగాణ ఐటీ, పంచాయతీ శాఖ మంత్రి కేటీఆర్ కౌంటర్ ఇచ్చారు. దేశంలో అవినీతికి మారుపేరు అయిన కాంగ్రెస్ స్కామ్ల పార్టీ... స్కాంగ్రెస్ అంటూ ఆయన ధ్వజమెత్తారు. శుక్రవారం కేటీఆర్ తెలంగాణ భవన్లో మీడియా సమావేశంలో మాట్లాడుతూ పీకలలోతు అవినీతిలో కూరుకుపోయిన కాంగ్రెస్ పార్టీకి తమను విమర్శించే అధికారం లేదన్నారు. దిగ్విజయ్ బాధ్యతారాహిత్యంగా పనికిమాలిన వ్యాఖ్యలు చేస్తున్నారని అన్నారు.
వాటర్ గ్రిడ్పై దిగ్విజయ్ చేసిన ఆరోపణలు అవాస్తవమని కేటీఆర్ అన్నారు. పాతళంలోని తీసే బొగ్గు నుంచి ఆకాశంలో ఎగిరే హెలికాప్టర్ వరకూ దేశంలో ఏ రంగాన్ని కాంగ్రెస్ పార్టీ వదిలి పెట్టలేదని, అందినకాడికి దోచుకుందని ఆయన విమర్శించారు. మీరు చేసిన పనే...మేం చేస్తామనుకోవడం సరికాదని కేటీఆర్ అన్నారు. జలయజ్ఞం పేరుతో కాంగ్రెస్ పార్టీలాగా అవినీతికి పాల్పడలేదని కేటీఆర్ అన్నారు. క్రీడారంగంలో ప్రపంచం ఎదుట దేశం పరువు తీసింది కాంగ్రెస్ పార్టీయేనన్నారు.
రాహుల్ గాంధీలా ప్రజాక్షేత్రం వదిలిపెట్టే సంస్కృతి తమది కాదన్నారు. కుటుంబ పాలన గురించి మాట్లాడే హక్కు కాంగ్రెస్కు లేదని... కాంగ్రెస్ నేతలు కుటుంబ పాలన గురించి మాట్లాడితే అది పెద్ద జోక్ అవుతుందని కేటీఆర్ ఎద్దేవా చేశారు. మీదో పార్టీ...మీదో బతుకు..దరిద్రపు ఆలోచనలు...దౌర్భాగ్యపు మాటలు అంటూ కేటీఆర్ తీవ్రస్థాయిలో దుయ్యబట్టారు. జీహెచ్ఎంసీ ఎన్నికల్లో గెలిచి తీరుతామని, హైదరాబాద్లో క్రైమ్ రేటు తగ్గిందని, పది నెలల్లో అన్ని జరుగుతాయనుకోవడం పొరపాటేనని ఆయన అన్నారు.
TV
