సాక్షి,సిటీబ్యూరో: ఇంటర్మీడియట్‌ పబ్లిక్‌ అడ్వాన్స్‌డ్‌ సప్లిమెంటరీ పరీక్షలు శుక్రవారం నుంచి ప్రారంభంకానున్నాయి. హైదరాబాద్‌ జిల్లా పరిధిలో ప్రథమ సంవత్సరం పరీక్షలకు 43,689 మంది, ద్వితీయ సంవత్సరం పరీక్షలకు 33,167 మంది విద్యార్థులు హాజరు కానున్నారు. ఇందుకోసం 135 పరీక్షా కేంద్రాలను ఏర్పాటు చేశారు. ఒక్కో కేంద్రంలో ఒక చీఫ్‌ సూపరింటెండెంట్‌, ఒక డిపార్ట్‌మెంటల్‌ అధికారిని నియమించారు. 5 మంది సభ్యులతో కూడిన జిల్లా పరీక్షా కమిటీ, హైపవర్‌ కమిటీ సభ్యుడు మొహమ్మద్‌ అర్షద్‌ సిద్దిఖీ పరీక్షల ఏర్పాట్లను పర్యవేక్షిస్తారు. గురువారం పరీక్ష నిర్వహణ పర్యవేక్షణపై ఫ్లయింగ్‌, సిట్టింగ్‌ స్క్వాడ్స్‌లతో ఇంటర్మీడియట్‌ విద్యాశాఖాధికారి డి. ఒడ్డెన్న సమీక్షించారు. ప్రతి పరీక్షా కేంద్రంలో సీసీ కెమెరాలు సక్రమంగా పనిచేసేలా చూడాలని, పరీక్షా కేంద్రాల్లో కాపీయింగ్‌ జరగకుండా జాగ్రత్తలు తీసుకోవాలని ఆదేశించారు. ఫామ్‌ల్యాండ్స్‌ పేరుతో రూ. 1.20 కోట్లు టోకరా బంజారాహిల్స్‌: ఫామ్‌ల్యాండ్స్‌ పేరుతో రూ. 1.20 కోట్లు తీసుకుని తమను మోసం చేశారంటూ బాధితులు ఇచ్చిన ఫిర్యాదు మేరకు జూబ్లీహిల్స్‌ పోలీసులు ఓ నిర్మాణ రంగ సంస్థపై క్రిమినల్‌ కేసు నమోదు చేశారు. పోలీసుల కథనం మేరకు వివరాలిలా ఉన్నాయి. జీఎస్‌ఆర్‌ ఇన్‌ఫ్రా గ్రూప్‌ ప్రైవేటు లిమిటెడ్‌ పేరుతో గుంటుపల్లి శ్రీనివాసరావు, శిల్ప అనే వ్యక్తులు జూబ్లీహిల్స్‌ రోడ్డు నెంబర్‌–10లో కార్యాలయం ఏర్పాటు చేశారు. నారాయణఖేడ్‌ సమీపంలో తమ సంస్థ ఆధ్వర్యంలో ఫామ్‌ల్యాండ్స్‌ ఏర్పాటు చేస్తున్నట్లు ప్రచారం చేసుకున్నారు. వీరి మాటలు నమ్మి కూకట్‌పల్లి హైదర్‌నగర్‌కు చెందిన సునీత, వనమాల అనే మహిళలు రూ. 1.20 కోట్లు పెట్టుబడిగా పెట్టారు. 2022లో ప్రాజెక్టు పూర్తవుతుందని, పెట్టుబడి రెట్టింపు చేస్తామని నమ్మించి తమను మోసం చేశారని, సదరు సంస్థను కూడా ఎత్తివేశారని, వారిపై చర్యలు తీసుకోవాలని కోరుతూ సునీత కుమారుడు పవన్‌కుమార్‌ గురువారం జూబ్లీహిల్స్‌ పోలీసులకు ఫిర్యాదు చేశాడు. దీంతో పోలీసులు సంస్థ ఎండీ గుంటుపల్లి శ్రీనివాసరావు, మార్కెటింగ్‌ డైరెక్టర్‌ శిల్పపై కేసు నమోదు చేసుకుని దర్యాప్తు చేస్తున్నారు. నిందితులిద్దరి ఫోన్లు స్విచ్ఛాఫ్‌ ఉన్నాయని, వారు పరారీలో ఉన్నట్లుగా బాధితులు పోలీసులకు ఇచ్చిన ఫిర్యాదులో పేర్కొన్నారు. సాఫ్ట్‌వేర్‌ ఇంజినీర్‌ ఆత్మహత్య గచ్చిబౌలి: సంతానం విషయంలో భార్యతో తరచూ గొడవలు జరుగుతుండటంతో మనస్తాపానికి లోనైన ఓ సాఫ్ట్‌వేర్‌ ఇంజినీర్‌ ఆత్మహత్యకు పాల్పడిన సంఘటన రాయదుర్గం పోలీస్‌ స్టేషన్‌ పరిధిలో చోటు చేసుకుంది. ఏఎస్‌ఐ రాంభూపాల్‌ రెడ్డి కథనం మేరకు వివరాలు ఇలా ఉన్నాయి. చిత్తూరు జిల్లా, ఎస్‌ఆర్‌పురం మండలం, చొక్కమడుగు గ్రామానికి చెందిన గోలి కిరణ్‌ కుమార్‌ రెడ్డి(36) సాఫ్ట్‌వేర్‌ ఇంజినీర్‌గా పని చేస్తూ భార్య శ్రావ్యతో కలిసి గచ్చిబౌలిలోని టెలికాంనగర్‌లో నివాసం ఉంటున్నాడు. సంతానం విషయంలో వారి మధ్య తరచూ గొడవలు జరుగుతున్నాయి, రెండు రోజుల క్రితం కూడా వారి మధ్య గొడవ జరిగింది. బుధవారం మధ్యాహ్నం శ్రావ్య ఆఫీస్‌కు వెళ్లగా అశ్విన్‌ కిరణ్‌కుమార్‌ రెడ్డి ఇంట్లోనే ఉన్నాడు. మధ్యాహ్నం అతడి తండ్రి మురళీధర్‌ రెడ్డి ఫోన్‌ చేసినా స్పందించకపోవడంతో కోడలికి ఫోన్‌ చేసి సమాచారంఅందించాడు. దీంతో అమె ఇంటికి వెళ్లి డోర్‌ కొట్టినా అశ్విన్‌ కుమార్‌ స్పందించకపోవడంతో తన వద్ద మరో తాళం చెవితో తలుపులు తెరిచి చూడగా అశ్విన్‌ సీలింగ్‌ ఫ్యాన్‌కు ఉరి వేసుకుని కనిపించాడు. అతడిని కిందకు దింపి సమీపంలోని కేర్‌ఆస్పత్రికి తరలించగా అప్పటికే మృతి చెందినట్లు వైద్యులు ధృవీకరించారు. పోలీసులు కేసు నమోదు చేసుకుని దర్యాప్తు చేస్తున్నారు. 7వ నిజాంకు ఘన నివాళి... సాక్షి, సిటీబ్యూరో: హైదరాబాద్‌ 7వ నిజాం మీర్‌ ఉస్మాన్‌ అలీ ఖాన్‌ 58వ వర్ధంతి సందర్భంగా అసఫ్‌ జాహీ రాజ వంశస్తుడు, నిజాం వారసుడు రౌనక్‌ యార్‌ ఖాన్‌ నివాళులు అర్పించారు. ఇందులో భాగంగా కింగ్‌ కోఠి మస్జిద్‌–ఎ–జూడీలోని 7వ నిజాం విశ్రాంతి స్థలంలో తన వంశస్తులు, కుటుంబ సభ్యులతో కలిసి సంస్మరణ కార్యక్రమాన్ని నిర్వహించారు. ఈ సందర్భంగా రౌనక్‌ యార్‌ ఖాన్‌ మాట్లాడుతూ., లౌకిక పాలన అందించిన మీర్‌ ఉస్మాన్‌ అలీ ఖాన్‌ ఆదర్శప్రాయుడని కొనియాడారు. అన్ని వర్గాల వారు ఇప్పటికీ ఆయన సేవలను స్మరించుకుంటున్నారన్నారు. నిజాం నిర్మించిన మసీదులు, అషూర్ఖానాలతో పాటు ఇతర కట్టడాలను సంరక్షించడం, తమ వంశస్తుల సమస్యలను పరిరక్షించాలని కోరుతూ ముఖ్యమంత్రిని కలవనున్నట్లు తెలిపారు. అన్నోజిగూడలో చైన్‌ స్నాచింగ్‌ పోచారం: ద్విచక్ర వాహనంపై వెళ్తున్న మహిళ మెడలోని గొలుసును గుర్తుతెలియని వ్యక్తులు లాక్కెళ్లిన సంఘటన పోచారం పోలీస్‌ స్టేషన్‌ పరిధిలో జరిగింది. పోలీసులు తెలిపిన మేరకు.. ఎన్‌ఎఫ్‌సీనగర్‌కు చెందిన బీ ఫార్మసీ విద్యార్థిని ఎర్రి శ్రీజ (20) తన తల్లి సునీతతో కలిసి గురువారం ద్విచక్ర వాహనంపై జోడిమెట్ల నుండి ఘట్‌కేసర్‌ వెళ్తున్నారు. ఎన్నోజిగూడ ఫ్లైఓవర్‌ మధ్యలోకి రాగానే గుర్తుతెలియని వ్యక్తులు బైక్‌ వచ్చి వెనక కూర్చున్న శ్రీజ మెడలోని తులం బరువు ఉన్న బంగారం గొలుసును లాక్కెళ్లారు. తల్లీకూతుళ్లు కిందపడి తీవ్రంగా గాయపడ్డారు. స్థానికులు వీరిని సమీపంలోని నీలిమా ఆసుపత్రికి తరలించారు. పోలీసులు కేసు నమోదు చేసుకొని దర్యాప్తు చేస్తున్నారు.

గౌలిపురా: గౌలిపురా మాజీ కార్పొరేటర్‌, దివంగత శంకర్‌ చేసిన సేవలు మరువలేనివని శ్రీ మహంకాళి మాతేశ్వరి భారతమాత, శ్రీ కోట మైసమ్మ ఆలయ కమిటీ అధ్యక్షుడు ఎర్మనీ కై లాష్‌ గంగపుత్ర అన్నారు. గౌలిపురాలోని ఆరె కటిక సంఘంలో దివంగత నేత, మాజీ కార్పొరేటర్‌ కె.శంకర్‌ సంతాప సభను నిర్వహించారు. ఆయన ముఖ్యఅతిథిగా హాజరై ఆలయ కమిటీ ప్రతినిధులతో కలిసి శంకర్‌ చిత్రపటానికి పూలమాలలు వేసి నివాళులర్పించారు. కై లాష్‌ మాట్లాడుతూ..శ్రీ మహంకాళి మాతేశ్వరి భారతమాత, శ్రీ కోట మైసమ్మ ఆలయ కమిటీ మాజీ అధ్యక్షుడిగా, వీఎస్‌టీ కంపెనీలో బీఎంఎస్‌ యూనియన్‌ ఉపాధ్యక్షుడిగా, ఉమ్మడి దేవాలయాల కమిటీ మాజీ అధ్యక్షుడిగా, కార్పొరేటర్‌గా కె.శంకర్‌ ఎనలేని సేవలు చేశారన్నారు. ఈ కార్యక్రమంలో ఉమ్మడి దేవాలయాల ఊరేగింపు కమిటీ అధ్యక్షుడు ఆలె భాస్కర్‌ రాజ్‌, గౌలిపురా కార్పొరేటర్‌ ఆలె భాగ్యలక్ష్మి, మాజీ కార్పొరేటర్‌ పాశం సురేందర్‌, ఆలే జితేంద్ర, చర్మాణి రూప్‌రాజ్‌, ఆలయ కమిటీ ముఖ్య సలహాదారులు ఎస్‌.మల్లేషం గౌడ్‌, కె.జ్ఞానేశ్వర్‌ ముదిరాజ్‌, కె.ఎస్‌.ఆనంద్‌ రావు, ఆదర్ల మహేశ్‌, ఉప్పుగూ డ మహంకాళి ఆలయ కమిటీ అధ్యక్షులు మధుసూ దన్‌ గౌడ్‌, మోకాళ్ల వెంకటేశ్‌, శివరత్నం పాల్గొన్నారు.

● 77 సెంటర్ల ఏర్పాటు హాజరుకానున్న 40,569 అభ్యర్థులు ● కలెక్టరేట్‌ లో కంట్రోల్‌ రూమ్‌ ఏర్పాటు ● హైదరాబాద్‌ జిల్లా కలెక్టర్‌ అనుదీప్‌ దురిశెట్టి సాక్షి,సిటీబ్యూరో: టీఎస్‌ పీఎస్‌సీ గ్రూప్‌–1 ప్రిలిమినరీ పరీక్ష నిర్వహణకు కట్టుదిట్టమైన ఏర్పాట్లు చేయాలని హైదరాబాద్‌ జిల్లా కలెక్టర్‌ అనుదీప్‌ దురిశెట్టి సంబంధిత అధికారులను ఆదేశించారు. జూన్‌ 9న జరగనున్న పరీక్ష నిర్వహణ ఏర్పాట్ల పై రీజినల్‌ కోఆర్డినేటర్స్‌, పోలీస్‌ నోడల్‌ ఆఫీసర్స్‌, సూపరింటెండెంట్లు, జిల్లా అధికారులతో గురువారం సమావేశం నిర్వహించారు. ఈ సందర్భంగా కలెక్టర్‌ మాట్లాడుతూ పరీక్షను ఎంతో జాగ్రతగా, పారదర్శకంగా నిర్వహించాలన్నారు. ప్రిలిమినరీ పరీక్షకు హైదరాబాద్‌ జిల్లా నుండి 40,569 మంది అభ్యర్థులు పరీక్ష హాజరు కానుండటంతో 77 పరీక్ష కేంద్రాలను ఏర్పాటు చేసినట్లు తెలిపారు. పరీక్ష నిర్వహణకు 11 మంది రూట్‌ ఆఫీసర్లు ఐదుగురు రీజినల్‌ కోఆర్డినేటర్లు,77 మంది మెంటార్‌ అధికారులు, 16 ఫ్లయింగ్‌ స్కాడ్‌ బృందాలను ఏర్పాటు చేసినట్లు తెలిపారు. అభ్యర్థుల బయోమెట్రిక్‌ వెరిఫికేషన్‌ క్షుణ్ణంగా పరిశీలించాలన్నారు. పరీక్ష కేంద్రాల్లోకి ఎలక్ట్రానిక్‌ వస్తువులకు అనుమతి లేదన్నారు. ఎగ్జామ్‌ క్యాంపస్‌ లోకి చీఫ్‌ సూపరింటెండెంట్‌ కు తప్ప ఎవరికి సెల్‌ ఫోన్‌ తీసుకెళ్లేందుకు అనుమతించవద్దని సూచించారు. డిపార్ట్‌మెంటల్‌ అధికారులు పరీక్ష పూర్తయ్యే వరకు కేంద్రం నుంచి బయటకు వెళ్లడానికి వీలు లేదన్నారు. దివ్యాంగులు అంధ అభ్యర్థుల కోసం స్కైబ్స్‌ను గుర్తింపు కార్డు చూసి అనుమతించాలని తెలిపారు. సమావేశంలో అదనపు కలెక్టర్‌ పాటిల్‌ హేమంత కేశవ్‌, జిల్లా రెవెన్యూ అధికారి వెంకటాచారి, జాయింట్‌ కస్టోడియన్‌లు కే. వీరబ్రహ్మ చారి, టి. రవి, ఎం. సూర్యప్రకాష్‌, ఎస్‌. రాజేష్‌ కుమార్‌, బి. అపర్ణ,రీజినల్‌ కోఆర్డినేటర్లు డాక్టర్‌ ఎన్‌. చందన, డాక్టర్‌ లక్ష్మి శ్రీనివాసరెడ్డి, డాక్టర్‌ బి సత్యనారాయణ, డాక్టర్‌ ఏ కష్ణయ్య, డాక్టర్‌ రాజేందర్‌ నాయక్‌, డిపార్ట్‌మెంటల్‌ అధికారులు,ఫ్లైయింగ్‌ స్క్వాడ్‌, సూపరింటెండెంట్లు, అధికారులు తదితరులు పాల్గొన్నారు

నాగోలు: రోడ్లు గుంతలమయంగా మారి వాహనదారులు ప్రమాదాల బారిన పడుతున్నా అధికారులు, ప్రజా ప్రతినిధులు పట్టించుకోవడం లేదని ఆరోపిస్తూ ఓ మహిళ బండ్లగూడ ఆనంద్‌నగర్‌ చౌరస్తాలో బురద గుంతలో కూర్చుని వినూత్న రీతిలో నిరసన వ్యక్తం చేసింది. సమస్యకు పరిష్కారం చూపాలని ప్లకార్డులు ప్రదర్శించింది. వివరాల్లోకి వెళితే..హయత్‌నగర్‌ పరిధిలోని న్యూ జీవీఆర్‌ కాలనీకి చెందిన నిహారిక ప్రైవేట్‌ ఉద్యోగి. అమె ఇద్దరు పిల్లలు బండ్లగూడ పరిధిలోని ఓ పాఠశాలలో చదువుకుంటున్నారు. ప్రతి రోజూ ఆమె వారిని బైక్‌పై పాఠశాలకు తీసుకెళ్తుంది. నాగోలు బండ్లగూడ రేడియల్‌ రోడ్డు కొంతకాలంగా గుంతలమయంగా మారడంతో ద్విచక్ర వాహనదారులు తరచూ ప్రమాదాల బారిన పడుతున్నారు. నిహారిక కూడా గతంలో ఇదే రోడ్డుపై అదుపుతప్పి కింద పడింది. దీంతో రేడియల్‌ రోడ్డుకు మరమ్మతులు చేపట్టాలని కోరుతూ జీహెచ్‌ఎంసీ మేయర్‌ గద్వాల విజయలక్ష్మితో పాటు సంబంధిత అధికారులకు సోషల్‌ మీడియా వేదిక ‘ఎక్స్‌’ ద్వారా విజ్ఞప్తి చేసింది. అయినా ఎవరూ పట్టించుకోలేదు. ఇదిలా ఉండగా గురువారం ఆమె స్యూటీపై నాగోలు వైపు వెళ్తుండగా బైక్‌ అదుపు తప్పి ిపిల్లలతో సహా కింద పడింది. స్వల్ప గాయాలు కావడంతో పిల్లలను ఇంటి వద్ద వదిలి ఘటనా స్థలానికి తిరిగి వచ్చిన ఆమె రోడ్ల దుస్థితిపై ఏడాదిగా మేయర్‌, అధికారులకు విజ్ఞప్తి చేసినా పట్టించుకోలేదని ఆరోపిస్తూ బురదలో కూర్చుని నిరసన వ్యక్తం చేసింది. దీంతో ట్రాఫిక్‌ పోలీసులు అమె నచ్చజెప్పే ప్రయత్నం చేయగా, జీహెచ్‌ఎంసీ అధికారులు వచ్చి స్పష్టమైన హామీ ఇవ్వాలని అప్పటి వరకు ఆందోళన విరమించేది లేదని తెలిపింది. నాగోలు కార్పొరేటర్‌ భర్త చింతల సురేందర్‌ యాదవ్‌, నాగోలు పోలీసులు అక్కడికి వచ్చి రోడ్ల మరమ్మతుకు నిధులు మంజారుయ్యాయని ఎన్నికల కోడ్‌ కారణంగా పనులు చేపట్టలేదని తెలిపారు. జీహెచ్‌ఎంసీ అధికారులకు ఫోన్‌ ద్వారా సమాచారం అందించగా, ఎన్నికల కోడ్‌ ఎత్తివేయగానే మరమ్మతు పనులు చేపడతామని హామీ ఇచ్చారు. ముందుస్తుగా గుంతలను మట్టితో పూడ్చి ప్రమాదాలు జరగకుండా చూస్తామని చెప్పడంతో నిహారిక నిరసన విరమించింది. బురదలో కూర్చుని మహిళ నిరసన కోడ్‌ ముగియగానే పనులు చేపడతాం – డాక్టర్‌ తిప్పర్తి యాదయ్య, హయత్‌నగర్‌ సర్కిల్‌ డీసీ నాగోలు–ఆనంద్‌నగర్‌ రోడ్డు మరమ్మతుల కోసం రూ. 4 కోట్లు నిధులు మంజురయ్యాయి. పార్లమెంట్‌ ఎన్నికల కోడ్‌ కారణంగా పనులు చేపట్టలేదు. ఎన్నికల కోడ్‌ ముగియగానే పనులు చేపడతాం.

అబిడ్స్‌: ఉద్యోగుల అభ్యున్నతికి టీఎన్జీఓస్‌ యూనియన్‌ ప్రత్యేక కృషి చేస్తుందని హైదరాబాద్‌ జిల్లా టీఎన్జీఓస్‌ అధ్యక్షుడు ఎస్‌ఎం.ముజీబ్‌ హుస్సేని పేర్కొన్నారు. తెలంగాణ ఉద్యమం నాటి నుంచి హైదరాబాద్‌ జిల్లా అధ్యక్షుడిగా కొనసాగుతున్న ముజీబ్‌ హుస్సేన్‌ కేంద్ర సంఘం ప్రధాన కార్యదర్శిగా గెలిపించాలని కోరుతూ పీవీ నర్సింహారావు వెటర్నరీ యూనివర్సిటీ ఉద్యోగులు ఆయనను సత్కరించారు. ఈ సందర్భంగా ఎస్‌ఎం.ముజీబ్‌ హుస్సేని మాట్లాడుతూ..ఉద్యోగులకు 24 గంటల పాటు అండగా ఉండి విశేష సేవలందిస్తున్న తనను కేంద్ర సంఘం ప్రధాన కార్యదర్శిగా గెలిపిస్తే రాష్ట్ర స్థాయిలో కూడా ఉద్యోగులకు అండగా ఉంటానన్నారు. తెలంగాణలో ఉద్యోగుల సమస్యలను ఎప్పటికప్పుడు ప్రభుత్వం దృష్టికి తీసుకువెళ్లి పరిష్కరించడమే తన ప్రధాన ఎజెండా అని ఆయన అన్నారు. పీవీ నర్సింహారావు వెటర్నరి యూనివర్సిటీ అధ్యక్షుడు మహ్మద్‌ షరీపుద్దీన్‌ మాట్లాడుతూ..ఉద్యోగులందరూ ముజీబ్‌ హుస్సేన్‌ను కేంద్ర సంఘం ప్రధాన కార్యదర్శిగా గెలిపించాలని విజ్ఞప్తి చేశారు. ఈ కార్యక్రమంలో జి.ఆంజనేయులు, టి.నర్సింహ, మధుసూదన్‌, టి.రాజ్‌కుమార్‌, మహేష్‌ తదితరులు పాల్గొన్నారు. అదే విధంగా కేంద్ర సంఘం నాయకులు మారం జగదీశ్వర్‌పై తమకు పూర్తి నమ్మకం ఉందని, ముజీబ్‌ హుస్సేని సేవలను గుర్తించి ప్రధాన కార్యదర్శిగా నియమించేందుకు కృషి చేయాలని విజ్ఞప్తి చేశారు.