వాషింగ్టన్‌: భారత సంతతికి చెందిన ప్రముఖ న్యాయమూర్తి అముల్‌ థాపర్‌ అమెరికా సుప్రీంకోర్టు తదుపరి జడ్జిగా నియమితులయ్యే అవకాశాలు కనిపిస్తున్నాయి. సుప్రీంకోర్టు ప్రస్తుత న్యాయమూర్తి జస్టిస్‌ ఆంథొనీ కెన్నెడీ ఈ నెల చివరికి పదవీ విరమణ పొందుతున్నారు. ఆయన స్థానంలో కొత్తవారిని నియమించేందుకు కసరత్తు మొదలైంది. ఇందులో భాగంగా ఇప్పటికే 25 మంది అభ్యర్థులను పరిశీలనకు ఎంపిక చేయగా, నలుగురు అభ్యర్థులను అధ్యక్షుడు డొనాల్డ్‌ ట్రంప్‌ ఇంటర్వ్యూ కూడా చేశారు. ఆ నలుగురిలో అముల్‌ థాపర్‌ కూడా ఉన్నారు. సెనెట్‌లో అధికార పక్ష నేత మిచ్‌ మెక్‌ కాన్నెల్‌ మద్దతు కూడా థాపర్‌కు ఉంది. మెక్‌ కాన్నెల్‌ సొంత రాష్ట్రమైన కెంటకీలోనే థాపర్‌ నివసిస్తూ, పనిచేస్తున్నారు.  తదుపరి న్యాయమూర్తిగా ఎవరు నియమితులవుతారనే విషయాన్ని ఈ నెల 9న ప్రకటిస్తామని ట్రంప్‌ చెప్పారు.