డేనైట్ టెస్టులో రెండో రోజు 13 వికెట్లు
   ఓవరాల్‌గా 94 పరుగుల ఆధిక్యంలో కివీస్
  
  అడిలైడ్: తొలిసారి ప్రయోగాత్మకంగా ఆడుతున్న డేనైట్ టెస్టులో పింక్ బంతితో బౌలర్లు పండగ చేసుకుంటున్నారు. తొలిరోజు 12 వికెట్లు పడితే... రెండో రోజు శనివారం ఏకంగా 13 వికెట్లు నేలకూలాయి. తొలిరోజు న్యూజిలాండ్ తొలి ఇన్నింగ్స్‌లో 202 పరుగులకు ఆలౌట్ కాగా... రెండో రోజు ఆస్ట్రేలియా తమ తొలి ఇన్నింగ్స్‌లో 224 పరుగులకు ఆలౌటయింది. కెప్టెన్ స్టీవ్ స్మిత్ (53), నెవిల్ (66) అర్ధ సెంచరీలు చేయగా... మిగిలిన బ్యాట్స్‌మెన్ అంతా విఫలమయ్యారు. అయితే చివరి ఇద్దరు ఆటగాళ్లు లియోన్ (34), స్టార్క్ (24 నాటౌట్) రాణించడంతో ఆసీస్‌కు కీలకమైన 22 పరుగుల తొలి ఇన్నింగ్స్ ఆధిక్యం లభించింది. కివీస్ బౌలర్లలో బ్రేస్‌వెల్ మూడు, బౌల్ట్, క్రెయిగ్ రెండేసి వికెట్లు తీసుకున్నారు.
  
  తర్వాత రెండో ఇన్నింగ్స్ ఆరంభించిన న్యూజిలాండ్ ఆట ముగిసే సమయానికి 37 ఓవర్లలో ఐదు వికెట్లకు 116 పరుగులు చేసింది. రాస్ టేలర్ (32) రాణించాడు. శాంట్నర్ (13), వాట్లింగ్ (7) క్రీజులో ఉన్నారు. ఆస్ట్రేలియా బౌలర్లలో హాజిల్‌వుడ్ మూడు, మిషెల్ మార్ష్ రెండు వికెట్లు తీశారు. తొలి ఇన్నింగ్స్ లోటును మినహాయిస్తే ప్రస్తుతం న్యూజిలాండ్ 94 పరుగుల ఆధిక్యంలో ఉంది. చేతిలో ఐదు వికెట్లు ఉన్నాయి. ప్రస్తుతం పరిస్థితి చూస్తే ఈ మ్యాచ్ మూడోరోజు ఆదివారం ముగిసే అవకాశం ఉంది.
  
  అదే ఉత్సాహం
  ఇక ప్రేక్షకులు ఈ మ్యాచ్‌కు రెండో రోజు కూడా భారీగా వచ్చారు. 42,372 మంది అభిమానులు లైట్ల వెలుతురులో పింక్ బంతితో టెస్టు క్రికెట్ అనుభవాన్ని ప్రత్యక్షంగా పొందారు.
  
  


  అడిలైడ్: భారీ షాట్లతో విరుచుకుపడే వన్డేలు, ధనాధన్ టి20లతో పోల్చితే టెస్టు మ్యాచ్‌లు బోర్.. ఇదీ ఇప్పటిదాకా సగటు అభిమాని ఆలోచన. అయితే ఈ ఫార్మాట్‌కు కూడా ఆదరణ పెంచే ఉద్దేశంతో తొలిసారిగా టెస్టు మ్యాచ్ కూడా ‘కలర్‌ఫుల్’గా ఆరంభమైంది. ఎరుపు బంతి స్థానంలో గులాబీ బంతి వాడగా సంప్రదాయానికి భిన్నంగా మధ్యాహ్నం ఆరంభమై రాత్రి కూడా కొనసాగిన డే అండ్ నైట్ మ్యాచ్‌ను వీక్షించిన ప్రేక్షకులు సంభ్రమాశ్చర్యాలకు గురయ్యారు. 138 ఏళ్ల టెస్టు చరిత్రలో మొదటి సారిగా ఆస్ట్రేలియా, న్యూజిలాండ్ జట్ల మధ్య జరిగిన ఈ మ్యాచ్‌ను వీక్షించేందుకు అభిమానులు పోటెత్తారు. దీంతో తొలి రోజు ఆటను 47,441 మంది ప్రత్యక్షంగా వీక్షించి అభిమానాన్ని చాటుకున్నారు. ఇప్పుడే ఓ అభిప్రాయానికి రావడం తొందరపాటే అయినా ఈ ప్రయోగానికి అభిమానుల నుంచి ఆశించిన మద్దతు లభించిందనే చెప్పవచ్చు.
  
  బౌలర్ల హవా
  గులాబీ బంతితో బౌలర్లు పండుగ చేసుకున్నారు. దీంతో ఆస్ట్రేలియా, న్యూజిలాండ్ జట్ల మధ్య జరిగిన మూడో టెస్టు తొలి రోజే 12 వికెట్లు నేలకూలాయి. ముందుగా ఆసీస్ పేసర్లు మిషెల్ స్టార్క్ (3/24), హాజెల్‌వుడ్ (3/66), సిడిల్ (2/54)తో పాటు స్పిన్నర్ లియోన్ (2/42) కూడా ప్రభావం చూపడంతో కివీస్ 65.2 ఓవర్లలో 202 పరుగులకే తొలి ఇన్నింగ్స్‌లో ఆలౌటయింది. ఓపెనర్ లాథమ్ (103 బంతుల్లో 50; 7 ఫోర్లు) ఒక్కడే రాణించగలిగాడు. నాలుగో ఓవర్‌లోనే వికెట్ తీసిన హాజెల్‌వుడ్ పింక్ బంతితో తొలిసారిగా ఈ ఫీట్ సాధించిన బౌలర్‌గా నిలిచాడు.  అనంతరం తొలి ఇన్నింగ్స్‌లో ఆసీస్ ఆట ముగిసే సమయానికి 22 ఓవర్లలో రెండు వికెట్లకు 54 పరుగులు చేసింది. క్రీజులో స్మిత్ (48 బంతుల్లో 24 బ్యాటింగ్; 3 ఫోర్లు), వోజెస్ (9 బ్యాటింగ్; 1 ఫోర్) ఉన్నారు.