♦ ప్రభుత్వ ఉద్యోగులకు చుక్కలు చూపిస్తున్న ప్రభుత్వ, ప్రైవేటు ఆస్పత్రులు
 ♦ కేన్సర్‌తో వచ్చిన ఓ ఉద్యోగి భార్యను నెలన్నర తిప్పి గాలికొదిలేసిన నిమ్స్
 ♦ రూ. 200 కోట్లకు పైగా ఆరోగ్యశ్రీకి బకాయి ఉన్నందునే ఈ పరిస్థితి
 ♦ సమస్యను పరిష్కరించడంలో వైద్య ఆరోగ్యశాఖ వైఫల్యం
 సాక్షి, హైదరాబాద్: అతను ఖమ్మం జిల్లాకు చెందిన ప్రభుత్వ ఉపాధ్యాయుడు. భార్యకు కేన్సర్ సోకడంతో హైదరాబాద్‌లోని ఓ ప్రైవేటు కేన్సర్ ఆస్పత్రిలో చేర్చాడు. అక్కడ నగదు రహిత వైద్యం అమలు కాక ప్రతి 21 రోజులకు ఒకసారి వేయాల్సిన సూదిమందుకు వేలాది రూపాయలు చెల్లించాడు. 4 నెలలు ఇబ్బందులు పడి వైద్యం చేయిం చాడు. ఆర్థిక పరిస్థితి సహకరించకపోవడం.. సన్నిహితుల సూచన మేరకు భార్యను నిమ్స్‌లో చేర్చాడు.
 నగదు రహిత వైద్యం అందిస్తామని.. 21 రోజుల తర్వాత వస్తే సూది మందు వేస్తామని నిమ్స్ వైద్యులు చెప్పారు. 21 రోజులకు వస్తే.. ఈసారికి ప్రైవేటు ఆస్పత్రిలో సూదిమందు వేయించుకోమని సలహా ఇచ్చారు. గత్యంతరం లేక అప్పు చేసి మందు వేయించాడు. మళ్లీ 21 రోజుల తర్వాత రెండోసారి నిమ్స్‌కు వస్తే.. తాము నగదు రహిత వైద్యం చేయలేమని చేతులెత్తేశారు. నెలన్నరపాటు తిప్పి చివరకు గాలికొదిలేశారు. గత్యంతరం లేక భార్య ప్రాణాలు కాపాడుకునేందుకు ఆమెను ఓ ప్రైవేటు ఆస్పత్రిలో చేర్పించాడు.
 ఇలాగే ప్రభుత్వ వైద్య గెజిటెడ్ ఉద్యోగుల సంఘం రాష్ట్ర నేత కూడా తన తండ్రికి నగదు రహిత వైద్యం చేయించుకోలేకపోయారు. దీంతో ఆయన ఇటీవలే కన్నుమూశారు. రాష్ట్రంలో ప్రభుత్వ ఉద్యోగులకు నగదు రహిత వైద్యం ఎంత గొప్పగా అమలవుతుందో ఇంతకంటే పెద్ద ఉదాహరణ అవసరం లేదు. ప్రభుత్వాన్ని నమ్ముకున్న వేలాది మంది ఉద్యోగులకు ప్రైవేటు, ప్రభుత్వ ఆస్పత్రులు చుక్కలు చూపిస్తున్నాయి.
  ఆరోగ్య కార్డులకు విలువేది?
 తెలంగాణ రాష్ట్రంలో 5.5 లక్షల మంది ఉద్యోగులు, మరో లక్షన్నర మందికిపైగా పింఛన్‌దారులు ఉన్నారు. వారి కుటుంబ సభ్యులతో కలుపుకుంటే దాదాపు 22 లక్షల మందికిపైగా ఉన్నారు. వారందరి కోసం ప్రభుత్వం నగదు రహిత వైద్య సేవలను అందుబాటులోకి తీసుకొచ్చింది. ఈ సేవలను ఆరోగ్యశ్రీ పరిధిలోకి తీసుకొచ్చింది. ఆరోగ్యశ్రీ నెట్‌వర్క్‌లో ఉన్న ప్రభుత్వ, ప్రైవేటు ఆస్పత్రులన్నీ ఉద్యోగులందరికీ ఉచిత వైద్య సేవలు అందించాలి. కానీ ప్రైవేటు ఆస్పత్రుల్లో ఎక్కడా నగదు రహిత చికిత్సలు అందక వేలాది మంది ఉద్యోగులు సొంత డబ్బులు చెల్లిస్తున్నారు. ఇక కార్పొరేట్ ఆస్పత్రులైతే నగదు రహిత వైద్యం చేయబోమని సర్కారుకు తేల్చిచెప్పేశాయి. మరోవైపు ప్రభుత్వ, ప్రైవేటు ఆస్పత్రుల్లో ఉచిత ఔట్ పేషెంట్ (ఓపీ) సేవలను సర్కారు ప్రారంభించినా.. ఆయా ఆస్పత్రులు దీన్ని ఏమాత్రం పట్టించుకోవడంలేదు.
 రూ. 200 కోట్ల బకాయిలు..
 ప్రభుత్వం ఆరోగ్యశ్రీకి రూ. 200 కోట్ల మేర బకాయిలు పడింది. దీంతో ఆరోగ్యశ్రీ కింద వైద్యం చేయించుకున్న పేదలు, ప్రభుత్వ ఉద్యోగుల తరఫున బిల్లులు పెట్టిన ఆస్పత్రులకు చెల్లింపులు జరగలేదు. బకాయిలు చెల్లించకపోవడంతో ఉద్యోగులకు వైద్య సేవలను ప్రభుత్వ, ప్రైవేటు ఆస్పత్రులు దాదాపు నిలిపివేశాయి. ఉచిత ఓపీ సేవలనూ ఆస్పత్రులు అమలు చేయడంలేదు. అన్ని ప్రభుత్వ, ప్రైవేటు ఆస్పత్రుల్లోనూ సాయంత్రం 4 నుంచి 6 గంటల వరకు ఉద్యోగుల కోసమే ప్రత్యేక ఓపీ సేవలు అందించాలని నిర్ణయించి నా.. పూర్తిస్థాయిలో ఉచిత ఓపీ సేవలు అందడంలేదని ఉద్యోగులు చెబుతున్నారు.


 * రోజురోజుకూ జటిలమవుతున్న ఉద్యోగులు, పెన్షనర్ల నగదు రహిత వైద్యం
 * ఇరు రాష్ట్రాల్లో ఆరోగ్యశ్రీ ఇబ్బందులు
 * అవస్థలు పడుతున్న 60 లక్షల మంది లబ్ధిదారులు
  
  సాక్షి, హైదరాబాద్: ఉద్యోగులకు నగదు రహిత వైద్యాన్ని అందించేందుకు ప్రైవేటు లేదా కార్పొరేట్ ఆస్పత్రులు నిరాకరిస్తే వారితో ఇకపై చర్చలు జరిపేది లేదని, నోటీసులు జారీ చేయాలని ఏపీ ప్రభుత్వం నిర్ణయించింది. ఇప్పటికే కొన్ని ఆస్పత్రులకు నోటీసులు ఇచ్చినట్టు విశ్వసనీయంగా తెలిసింది. దీంతో ఉద్యోగుల నగదు రహిత వైద్యం మరింత జటిలంగా మారింది.
  
  ఆంధ్రప్రదేశ్‌తోపాటు తెలంగాణలోనూ ఇదే పరిస్థితి నెలకొంది. ఏపీలో ప్యాకేజీలు సరిపోవడం లేదని, తెలంగాణలో ఓపీ సేవలు ఉచితంగా చేయలేమని కార్పొరేట్ ఆస్పత్రులు తెగేసి చెప్పాయి. రెండు ప్రభుత్వాలు విధిలేని పరిస్థితుల్లో తాజాగా రీయింబర్స్‌మెంట్‌నే కొనసాగిస్తూ ఉత్తర్వులు జారీ చేశాయి. దీనివల్ల ముఖ్యంగా పెన్షనర్లు లక్షలాది రూపాయలు ముందు చెల్లించాల్సిన పరిస్థితి వస్తోంది. దీంతో రెండు రాష్ట్రాల్లో ఉద్యోగులు, పెన్షనర్లు, వారి కుటుంబీకులు కలిసి దాదాపు 60 లక్షల మంది వైద్యం విషయంలో నలిగిపోతున్నారు.
  
  ఆరోగ్యశ్రీ నెట్‌వర్క్ నుంచి తొలగిస్తాం
  ఆంధ్రప్రదేశ్ ప్రభుత్వం ప్రైవేటు ఆస్పత్రులకు హెచ్చరికలు జారీచేసింది.నిర్ణయించిన ప్యాకేజీలకు ఉద్యోగులకు నగదు రహిత వైద్యానికి ఒప్పుకోకపోతే వాటిని ఆరోగ్యశ్రీ నెట్‌వర్క్ నుంచి కూడా తొలగిస్తామని హెచ్చరించింది. ఎన్‌ఏబీహెచ్(నేషనల్ అక్రిడిటేషన్ బోర్డ్ ఆఫ్ హాస్పిటల్స్) హోదా ఉన్న ఆస్పత్రులకు ప్రస్తుతం ఉన్న ప్యాకేజీలకంటే 25 శాతం ఎక్కువగా ఇస్తున్నామని, ఆ హోదా లేని ఆస్పత్రులకు పేర్కొన్న ప్యాకేజీల రేట్లే ఇస్తామని, అంతకంటే ఒక్క పైసా ఎక్కువ ఇచ్చేది లేదని ఒప్పుకోకుంటే నెట్‌వర్క్‌నుంచి తొలగిస్తామని తెలిపింది.
  
  ఆరోగ్యశ్రీ వదులుకోవడానికీ సిద్ధమే
  ఆరోగ్యశ్రీ కంటే ఉద్యోగుల నగదురహిత వైద్య ప్యాకేజీలు ఘోరంగా ఉన్నాయి.ప్యాకేజీ కంటే మాకే ఎక్కువ ఖర్చవుతుంటే ఆస్పత్రులు ఎలా మనగలుగుతాయి? ఎంవోయూ కుదిరే వరకు ఉద్యోగులకు వైద్యం అందించలేం. ఒకవేళ ఆరోగ్యశ్రీని వదులుకోవాలని ఆదేశిస్తే  సిద్ధమే.
  - డాక్టర్ రమణమూర్తి, ఆంధ్రప్రదేశ్ సూపర్ స్పెషాలిటీ ఆస్పత్రుల సంఘం అధ్యక్షుడు
  
  చిన్న సమస్య పెద్దది చేస్తున్నారు
  ఇది చాలా చిన్న సమస్య. చిన్న చర్చ ద్వారా పరిష్కారం అయ్యేదాన్ని ఎందుకో పెద్దది చేస్తున్నారు. రెండ్రోజుల్లో తెలంగాణ సీఎంను కలవబోతున్నాం. ఏపీ ప్రభుత్వంలా ఉద్యోగుల వైద్యానికి ఒప్పుకోకపోతే ఆరోగ్యశ్రీ నుంచి తప్పిస్తాం అంటే... దానికీ సిద్ధంగా ఉన్నాం.
  - డా. ఏవీ గురవారెడ్డి, తెలంగాణ సూపర్ స్పెషాలిటీ ఆస్పత్రుల సంఘం అధ్యక్షుడు