నాగ్‌పూర్‌: రంజీట్రోఫీలో డిఫెండింగ్‌ చాంపియన్‌గా బరిలోకి దిగిన విదర్భ టైటిల్‌ను నిలబెట్టుకుంది. సౌరాష్ట్రతో జరిగిన ఫైనల్‌ మ్యాచ్‌లో విదర్భ 78 పరుగుల తేడాతో విజయం సాధించి మరోసారి టైటిల్‌ను కైవసం చేసుకుంది. విదర్భ విసిరిన 206 పరుగుల లక్ష్యాన్ని ఛేదించే క్రమంలో సౌరాష్ట్ర తన రెండో ఇన్నింగ్స్‌లో 127 పరుగులకే కుప్పకూలి ఓటమి పాలైంది. దాంతో టైటిల్‌ను సాధించే అవకాశాన్ని కోల్పోయింది. విదర్భ బౌలర్లలో స్పిన్నర్‌ ఆదిత్య సర్వతే ఆరు వికెట్లతో సౌరాష్ట పతనాన్నిశాసించాడు. అతనికి జతగా అక్షయ్‌ వాఖరే మూడు వికెట్లు సాధించగా, ఉమేశ్‌ యాదవ్‌ వికెట్‌ తీశాడు. సౌరాష్ట్ర ఆటగాళ్లలో విశ్వరాజ్‌ జడేజా(52) మినహా ఎవరూ రాణించకపోవడంతో ఆ జట్టు సాధారణ లక్ష్యాన్ని ఛేదించడంలో చతికిలబడింది. నలుగురు మాత్రమే నాలుగు అంకెల స్కోరును దాటడంతో సౌరాష్ట్రకు పరాజయం తప్పలేదు. అంతకుముందు విదర్భ తన రెండో ఇన్నింగ్స్‌లో 200 పరుగులు చేసింది. దాంతో విదర్భకు తొలి ఇన్నింగ్స్‌లో లభించిన ఐదు పరుగుల ఆధిక్యంతో 205 పరుగుల్ని బోర్డుపై ఉంచింది.  ఆదిత్య సర్వతే (49), గణేశ్‌ సతీష్‌(35), మోహిత్‌ కాలే(38)లు క్లిష్ట దశలో మెరిసి జట్టు స్కోరును రెండొందలకు చేర్చారు. ఆ తర్వాత లక్ష్యాన్ని ఛేదించే క్రమంలో సౌరాష్ట్ర 55 పరుగులకే సగం వికెట్లు కోల్పోయి కష్టాల్లో పడింది. 58/5 ఓవర్‌నైట్‌ స్కోరుతో ఆఖరి రోజు ఇన్నింగ్స్‌ను కొనసాగించిన సౌరాష్ట్ర మరో 69 పరుగులు చేసి మిగతా వికెట్లను చేజార్చుకోవడంతో సౌరాష్ట ఓటమి పాలైంది.


 సెంచరీ సాధించిన భారత బ్యాట్స్‌మన్‌
 
 ట్రెంట్‌బ్రిడ్జ్‌: ఒకవైపు భారత వన్డే జట్టు చాంపియన్స్‌ ట్రోఫీ సన్నాహాల్లో ఇంగ్లండ్‌లో బిజీగా ఉంటే... ఈ జట్టులో స్థానం లేని మరో భారత ఆటగాడు చతేశ్వర్‌ పుజారా ఆ దేశంలోనే ఇంకో చోట తన బ్యాట్‌ పదును చూపించాడు. కౌంటీ క్రికెట్‌లో భాగంగా నాటింగ్‌హామ్‌షైర్‌ తరఫున ఆడుతున్న పుజారా, తన రెండో మ్యాచ్‌లో శతకంతో చెలరేగాడు.
 
 గ్లూసెస్టర్‌షైర్‌తో శుక్రవారం ప్రారంభమైన ఈ ఫస్ట్‌క్లాస్‌ మ్యాచ్‌లో పుజారా (206 బంతుల్లో 112; 14 ఫోర్లు) కీలక ఇన్నింగ్స్‌ ఆడాడు. అతనితో పాటు మైకేల్‌ లంబ్‌ (117) కూడా సెంచరీ బాదడంతో తొలి రోజు నాటింగ్‌హామ్‌ 96 ఓవర్లలో 5 వికెట్ల నష్టానికి 357 పరుగులు చేసింది. గత వారం గ్లామోర్గాన్‌తో జరిగిన తొలి మ్యాచ్‌లో పుజారా విఫలమయ్యాడు.