ఇండోర్: ఆంధ్రప్రదేశ్ టెన్నిస్ యువతార సాకేత్ మైనేని కెరీర్‌లో మరో గొప్ప విజయాన్ని సాధించాడు. ఆదివారం ముగిసిన ఇండోర్ ఓపెన్ ఏటీపీ చాలెంజర్ టోర్నీలో విజేతగా అవతరించాడు. హోరాహోరీగా జరిగిన పురుషుల సింగిల్స్ ఫైనల్లో ప్రపంచ 451వ ర్యాంకర్ సాకేత్ 6-3, 6-7 (4/7), 6-3తో టాప్ సీడ్, ప్రపంచ 118వ ర్యాంకర్ అలెగ్జాండర్ నెదోవ్‌యెసోవ్ (కజకిస్థాన్)పై సంచలన విజయం సాధించాడు.
 
 ఆదివారం తన 27వ పుట్టిన రోజును జరుపుకున్న సాకేత్ ఈ గెలుపుతో కెరీర్‌లో తొలి ఏటీపీ చాలెంజర్ టోర్నీ టైటిల్‌ను జమ చేసుకున్నాడు. రెండు గంటల ఒక నిమిషంపాటు జరిగిన అంతిమ పోరులో ఈ వైజాగ్ క్రీడాకారుడు 12 ఏస్‌లు సంధించడంతోపాటు ఐదు డబుల్ ఫాల్ట్‌లు చేశాడు. విజేతగా నిలిచిన సాకేత్‌కు 7,200 డాలర్ల ప్రైజ్‌మనీ (రూ. 4 లక్షల 41 వేలు)తో పాటు 80 ర్యాంకింగ్ పాయింట్లు లభించాయి.


 ఇండోర్: అద్భుతమైన ఫామ్‌లో ఉన్న ఆంధ్రప్రదేశ్ టెన్నిస్ యువతార సాకేత్ మైనేని ఇండోర్ ఓపెన్ ఏటీపీ చాలెంజర్ టోర్నమెంట్‌లో ఫైనల్లోకి దూసుకెళ్లాడు. శనివారం జరిగిన పురుషుల సింగిల్స్ సెమీఫైనల్లో సాకేత్ 6-2, 6-1తో రామ్‌కుమార్ రామనాథన్ (భారత్)పై గెలిచాడు. ఈ విజయంతో సాకేత్ తన కెరీర్‌లో తొలిసారి ఓ ఏటీపీ చాలెంజర్ టోర్నీలో ఫైనల్లోకి ప్రవేశించాడు.
 
 ఆదివారం జరిగే ఫైనల్లో టాప్ సీడ్, ప్రపంచ 118వ ర్యాంకర్ అలెగ్జాండర్ నెదోవ్‌యెసోవ్ (కజకిస్థాన్)తో సాకేత్ తలపడతాడు. మరోవైపు పురుషుల డబుల్స్ విభాగంలో యూకీ బాంబ్రీ-దివిజ్ శరణ్ (భారత్) జంట రన్నరప్‌గా నిలిచింది. ఫైనల్లో యూకీ-దివిజ్ ద్వయం 6-2, 4-6, 3-10తో నెదోవ్‌యెసోవ్ (కజకిస్థాన్)-మెనెన్‌దెజ్ (స్పెయిన్) జోడీ చేతిలో ఓడిపోయింది.