ముంబై: సూపర్‌ స్టార్‌ రజనీకాంత్‌ రాజకీయ ప్రవేశం గురించి పెద్ద ఎత్తున చర్చ నడుస్తున్న సంగతి తెలిసిదే. రజనీ ఇటీవల అభిమానుల సమావేశంలో చేసిన వ్యాఖ్యలు, ఇస్తున్న సంకేతాలు, ఆయన సన్నిహితులు చెప్తున్న మాటలు.. కచ్చితంగా రజనీ రాజకీయాల్లోకి వస్తారనే చాటుతోంది. తన తాజా చిత్రం ‘రోబో-2’ విడుదలైన అనంతరం ‘బిగ్‌ అనౌన్స్‌మెంట్‌’ చేస్తానని రజనీ సైతం ప్రకటించారు. ఆయన సొంతంగా రాజకీయ పార్టీ పెట్టే అవకాశముందని వినిపిస్తోంది. ఇదే విషయాన్ని ఆయన అల్లుడు, హీరో ధనుష్‌ను అడిగితే.. ఆయన ఒకింత దాటవేత ధోరణి అవలంబించారు.
 
 ధనుష్‌ తాజాచిత్రం ‘వీఐపీ-2’ ట్రైలర్‌ లాంచ్‌ కార్యక్రమం ముంబైలో ఘనంగా జరిగింది. ఈ సందర్భంగా రజనీ రాజకీయాల్లోకి రావాల్సిన అవసరముందా? అంటూ ధనుష్‌ను విలేకరులు ప్రశ్నించగా.. ‘మీరు ఆహ్వాన పత్రిక చూశారు కదా.. అందులో రాజకీయాల గురించి ప్రశ్నించకూడదని ఉంది’ అంటూ సమాధానం దాటవేయబోయారు. అయినా విలేకరులు పట్టుబట్టడంతో ధనుష్‌ స్పందించారు. నటులు రాజకీయాల్లోకి రావాల్సిన అవసరముందా? అన్న ప్రశ్నకు ‘వాళ్లు రాజకీయాల్లోకి ఎందుకు రాకూడదనే అభిప్రాయం మీకేమైనా ఉందా? మీ అభిప్రాయం మీ దగ్గర పెట్టుకుండి. నా అభిప్రాయం నాకుంది. అది నాదగ్గరే పెట్టుకుంటాను’ అని ముగించారు.


  నేనా? రాజకీయాల్లోకా? ఇప్పుడే కాదు భవిష్యత్‌లో కూడా వచ్చే ఆలోచన లేదు అంటున్నారు నటి త్రిష. ఇంతకు ముందే త్రిష రాజకీయ రంగ ప్రవేశానికి రంగం సిద్ధం అవుతోందని ప్రచార మాధ్యమాలు సంచలనం సృష్టించాయి. రానున్న శాసన సభ ఎన్నికల్లో అన్నాడీఎంకే పార్టీ తరపున పోటీ చేయనున్నట్లు ప్రచారం హోరెత్తింది. దీంతో రాజకీయాల్లోనూ కలకలం చెలరేగింది. అయితే దీనికి నటి త్రిష కూడా కారణం కాకపోలేదు.
  
  ఆమె ముఖ్యమంత్రి జయలలితతో తీసుకున్న ఫొటోను తన ట్విట్టర్‌లో పోస్ట్ చేయడంతో ఆమెకు రాజకీయ రంగ ప్రవేశ ఆలోచన ఉన్నట్టు మీడియా ప్రచారం దుమ్మురేపింది.దీంతో ఉలిక్కిపడ్డారో, లేక మనసు మార్చుకున్నారో లేక హితులెవరైనా ఇప్పుడే తొందర పడవద్దని హితవు పలికారోగాని త్రిష తనకు రాజకీయ రంగ ప్రవేశ ఆలోచన లేదని వివరణ ఇచ్చారు. దీని గురించి త్రిష తన ట్విట్టర్‌లో పేర్కొంటూ నాకు రాజకీయ రంగ ప్రవేశ ఆలోచన లేదు.
  
  ఇప్పుడే కాదు భవిష్యత్తులో కూడా రాజకీయాల్లోకి రాను అని అన్నారు. అయినా ఇలాంటి సంచలనాలకు కారణం అవడం త్రిషకు మామూలే. ప్రస్తుతం ఈమె నటిగా యమబిజీగా ఉన్నారు. తమిళంలో నాలుగు, తెలుగులో మూడు చిత్రాలు చేస్తున్నారు. తమిళంలో జయంరవితో నటించిన సకలకళావల్లవన్ చిత్రం ఈ నెల 31న విడుదల కానుంది. కమలహాసన్ సరసన తూంగావనంతో పాటు అరణ్మణై2 చిత్రంలో నటిస్తున్నారు.