మధురై: ప్రముఖ హీరో, సూపర్‌స్టార్‌ రజనీకాంత్‌ అల్లుడు ధనుష్‌ అనుకోనిరీతిలో చిక్కుల్లో పడ్డారు. జన్మతః ఆయన తల్లిదండ్రుల విషయమై మేలూర్‌ జ్యూడీషియల్‌ మేజిస్ట్రేట్‌ కోర్టులో పిటిషన్‌ దాఖలైంది. ఈ పిటిషన్‌పై విచారణ చేపట్టిన కోర్టు వచ్చే ఏడాది జనవరి 12లోపు న్యాయస్థానం ముందుకు హాజరుకావాలని ధనుష్‌ను ఆదేశించింది.
 
 
 తమిళనాడు మేలూర్‌ తాలూకాలోని మనంపట్టి గ్రామానికి చెందిన వృద్ధ దంపతులైన ఆర్‌ కథారేసన్‌ (60), కే మీనాక్షి (55) కోర్టును ఆశ్రయించారు. 1985 నవంబర్‌ 7న ధనుష్‌ తమకు పుట్టాడని, అతని అసలు పేరు ‘కాళీసెల్వన్‌’ అని కోర్టుకు తెలిపారు. తమకు పుట్టిన పెద్దకొడుకే ధనుష్‌ అని, తమకు ఒక కూతురు ధనపక్షియం ఉన్నారని పేర్కొన్నారు. అంతేకాకుండా ధనుష్‌ తమ కొడుకు అన్న వాదనకు ఆధారాలుగా పుట్టినరోజు ధ్రువపత్రంతోపాటు చిన్ననాటి ఫొటోలను న్యాయస్థానానికి సమర్పించారు.  
 
 తన కొడుకు పదో తరగతి వరకు మేలూర్‌లోని ఆర్సీ మిడిల్‌ స్కూల్‌లో, బాలుర ప్రభుత్వ పాఠశాలలో చదివాడని, 2002లో శివగంగా జిల్లాలోని  అరుముగం పిళ్లై కాలేజీలో చేర్పించగా.. నటించాలనే కోరికతో అక్కడి నుంచి తప్పించుకొని పారిపోయాడని, ఆ తర్వాత తన పేరు ధనుష్‌ కే రాజాగా మార్చుకున్నాడని రిటైర్డ్‌  ప్రైవేటు బస్సు కండక్టర్‌ అయిన కథరేసన్‌ కోర్టుకు తెలిపారు. అనంతరం కస్తూరిరాజ సంరక్షణలో పెరుగుతూ హీరోగా ఎదిగాడని చెప్పారు. వృద్ధులైన తమకు ధనుష్‌తో నెలకు రూ. 65వేలు జీవనభృతిని ఇప్పించాలని కోర్టును అభ్యర్థించారు.