సాక్షి, నాగర్‌కర్నూల్‌: ఒకేసారి 220 జంటలు ఒక్కటైన అపురూప దృశ్యం ఆదివారం నాగర్‌కర్నూల్‌ జిల్లా కేంద్రంలో ఆవిష్కృతమైంది. ఎంజేఆర్‌ ట్రస్ట్, ఎమ్మెల్యే మర్రి జనార్దన్‌రెడ్డి, ఆయన సతీమణి జమున ఆధ్వర్యంలో నిర్వహించిన సామూహిక వివాహాల మహోత్సవం కన్నులపండువగా సాగింది. కార్యక్రమానికి ముఖ్య అతిథులుగా బీఆర్‌ఎస్‌ ప్రధాన కార్యదర్శి, ఎంపీ కె.కేశవరావు, పార్లమెంటరీ పక్షనేత, ఎంపీ నామా నాగేశ్వరరావు హాజరయ్యారు. ప్రధాన వేదికపై యాదాద్రి లక్ష్మీనర్సింహస్వామి, అమ్మవార్లకు ప్రధాన అర్చకులు కల్యాణం నిర్వహించగా.. ప్రత్యేకంగా ఏర్పాటుచేసిన ముత్యాల పందిరి, పురోహితుల ఆధ్వర్యంలో 220 కొత్త జంటలు ఒకే వేదిక ద్వారా ఒక్కటయ్యాయి. తిరుమల తిరుపతి దేవస్థానం నుంచి వధూవరులకు కంకణాలను అందజేశారు. కొత్తజంటలకు అవసరమైన సామగ్రిని అందజేశారు. సామూహిక వివాహాలకు హాజరైన వారందరికీ భోజనాలు ఏర్పాటుచేశారు.  సంపాదనలో సగం పేదలకే..  ఎమ్మెల్యే మర్రి జనార్దన్‌రెడ్డి సంపాదించిన దాంట్లో సగం పేదల కోసం ఖర్చు చేయాలనుకోవడం గొప్ప నిర్ణయం అని ఎంపీ కె.కేశవరావు అన్నారు. ఎమ్మెల్యే సొంతంగా రూ.3 కోట్లు వెచ్చించి కార్పొరేట్‌ స్థాయిలో ప్రభుత్వ పాఠశాలలను నిర్మించడం అభినందనీయమని ప్రశంసించారు. ఎంపీ నామా నాగేశ్వరరావు మాట్లాడుతూ, తనకు అవకాశం వస్తే అనాథలు, బడుగు, బలహీనులకు వివాహాలు జరిపిస్తానని పేర్కొన్నారు. తాను గెలిచినా, ఓడినా వివాహ కార్యక్రమాలు కొనసాగిస్తానని ఎమ్మెల్యే మర్రి జనార్దన్‌రెడ్డి తెలిపారు. కార్యక్రమంలో ప్రభుత్వ విప్, ఎమ్మెల్యే గువ్వల బాలరాజు, గిడ్డంగుల సంస్థ చైర్మన్‌ సాయిచంద్, కలెక్టర్‌ ఉదయ్‌కుమార్, ఎస్పీ మనోహర్‌ తదితరులు పాల్గొన్నారు. 


 102 జంటలకు సామూహిక వివాహం
 నాగర్‌కర్నూల్: అన్నిదానాల్లో కన్నా కన్యాదానం గొప్పదని గవర్నర్ ఈఎస్‌ఎల్ నరసింహన్ అన్నారు. శుక్రవారం మహబూబ్‌నగర్ జిల్లా నాగర్‌కర్నూల్‌లో స్థానిక ఎమ్మెల్యే మర్రి జనార్దన్‌రెడ్డి ఎంజేఆర్ ట్రస్ట్ ఆధ్వర్యంలో నిర్వహించిన సామూహిక వివాహాల కార్యక్రమానికి ఆయన హాజరై నూతన వధూవరులను ఆశీర్వదించారు. ఈ సందర్భంగా గవర్నర్ మాట్లాడుతూ ఒక్కటైన వధూవరుల ముందు పెద్దబాధ్యత ఉందని, కష్టపడి పనిచేసి బాధ్యతగా మెలగాలని సూచించారు.
 
 భార్యాభర్తలు నిండునూరేళ్లు సంతోషంగా ఉండాలని ఆకాంక్షించారు. ప్రభుత్వం ప్రజలకు అన్నీ చేయాలంటే కష్టమని, ప్రజలు బాధ్యతతో రాష్ట్ర అభివృద్ధిలో భాగస్వాములు కావాలని ఆయన కోరారు. ఎమ్మెల్యేగా మర్రి జనార్దన్‌రెడ్డి ఎంజేఆర్ ట్రస్ట్ ద్వారా పెద్ద బాధ్యతను తీసుకోవడం అభినందనీయమని,102 జంటలకు వివాహం జరిపించడం గొప్ప కార్యమని కితాబిచ్చారు. అనంతరం అర్హులైన జంటలకు కల్యాణలక్ష్మీ పథకం ద్వారా మంజూరైన రూ.51 వేల చెక్కులను గవర్నర్ అందజేశారు.
 
 102జంటలను గవర్నర్ నరసింహన్ ఆశీర్వదించారు. వేడుకల్లో మంత్రులు ఈటల రాజేందర్, జూపల్లి కృష్ణారావు, డాక్టర్ సి.లక్ష్మారెడ్డి, ప్రణాళిక సంఘం ఉపాధ్యక్షుడు నిరంజన్‌రెడ్డి తదితరులు పాల్గొన్నారు.


 నాగర్‌కర్నూల్ : మహబూబ్‌నగర్ జిల్లా నాగర్‌కర్నూలు ఎమ్మెల్యే, ఎంజేఆర్ ట్రస్టు చైర్మన్ మర్రి జనార్ధన్ రెడ్డి ఆధ్వర్యంలో శుక్రవారం 102 జంటలకు సామూహిక వివాహాలు జరిగాయి. ఒకే ముహూర్తంలో (ఉదయం 11.05 గంటలకు) 102 జంటలు ఒక్కటయ్యాయి. ఈ అపూర్వ వేడుకకు నాగర్‌కర్నూలు పట్టణంలోని జిల్లాపరిషత్ ఉన్నత పాఠశాల వేదికయింది. ఎమ్మెల్యే జనార్ధన్ రెడ్డి వధూవరులను ఆశీర్వదించి మంగళసూత్రం అందజేశారు. అలాగే నూతన వధూవరులకు మెట్టెలు, బీరువా, మంచం, పరుపు, వంట సామగ్రితో పాటు పలు వస్తువులను అందజేశారు.
  
 ఈ వివాహ వేడుకలకు రాష్ట్ర గవర్నర్ ఈఎస్ఎల్ నరసింహన్ ముఖ్య అతిధిగా హాజరయ్యారు.  ఈ నేపథ్యంలో ఆ ప్రాంతమంతా గట్టి పోలీసు బందోబస్తు ఏర్పాటు చేశారు.


 మహబూబ్నగర్ : ఒకే ముహూర్తంలో (శుక్రవారం ఉదయం 11.05 గంటలకు) 102 జంటలు ఒక్కటవబోతున్నాయి. అదీ ఒకే వేదికపై. ఈ అపూర్వ వేడుకకు మహబూబ్‌నగర్ జిల్లా నాగర్కర్నూలు పట్టణంలోని జిల్లా పరిషత్ ఉన్నత పాఠశాల శుక్రవారం వేదిక అయింది.  ఎంజేఆర్ ట్రస్ట్ ఆధ్వర్యంలో స్థానిక ఎమ్మెల్యే మర్రి జనార్దన్‌రెడ్డి ఈ సామూహిక వివాహాలను నిర్వహిస్తున్నారు.
 అందుకోసం భారీ ఏర్పాట్లు చేశారు. ఈ వివాహ వేడుకలకు రాష్ట్ర గవర్నర్ ఈఎస్ఎల్ నరసింహన్ ముఖ్య అతిధిగా హాజరు కానున్నారు. ఈ నేపథ్యంలో గట్టి పోలీసు బందోబస్తు ఏర్పాటు చేశారు.